ದಾಂಪತ್ಯ ಜೀವನಕ್ಕೆ ಕಾಲಿಟ್ಟ ಬಾಲಿವುಡ್ ಬೆಡಗಿ ಸೋನಮ್ ಕಪೂರ್

ಮುಂಬೈ: ಬಾಲಿವುಡ್ ಮೋಸ್ಟ್ ಹ್ಯಾಂಡ್‍ಸಮ್ ಸ್ಟಾರ್ ಅನಿಲ್ ಕಪೂರ್ ಪುತ್ರಿ ಸೋನಮ್ ಕಪೂರ್ ಇಂದು ಬಹು ದಿನಗಳ ಗೆಳೆಯ ದೆಹಲಿ ಮೂಲದ ಉದ್ಯಮಿ ಆನಂದ್ ಅಹುಜಾ ಜೊತೆ ದಾಂಪತ್ಯ ಜೀವನಕ್ಕೆ ಕಾಲಿಟ್ಟಿದ್ದಾರೆ.

ಸೋನಮ್ ಬಾಂದ್ರಾದಲ್ಲಿರುವ ತನ್ನ ಆಂಟಿಯ ಬಂಗಲೆಯಲ್ಲಿ ಸಿಖ್ ಸಂಪ್ರದಾಯದಂತೆ ಆನಂದ್ ಅಹುಜಾ ಅವರನ್ನು ಇಂದು ಬೆಳಗ್ಗೆ ಮದುವೆಯಾಗಿದ್ದಾರೆ.

ಸೋನಮ್ ಅನುರಾಧ ವಾಕೀಲ್ ಅವರು ತಯಾರಿಸಿದ ಚೋಕರ್ ಹಾಗೂ ನೆಕ್ಲೆಸ್ ಗೆ ಹೊಂದುವ ಬೈತಲೆ ಬೊಟ್ಟು ಹಾಗೂ ಜುಮ್ಕಾವನ್ನು ತೊಟ್ಟಿದ್ದರು. ಇನ್ನೂ ಆನಂದ್ ಗೋಲ್ಡನ್ ಶೇರ್ವಾನಿ ಜೊತೆ ಕೆಂಪು ಬಣ್ಣದ ರೂಬಿ ಮಾಲೆ ತೊಟ್ಟು ಮಿಂಚಿದ್ದಾರೆ.

ಸೋನಮ್ ಕಪೂರ್ ಮದುವೆಗೆ ಬಾಲಿವುಡ್‍ನ ಗಣ್ಯಾತಿಗಣ್ಯರು ಹಾಜರಾಗಿದ್ದರು. ಅಮಿತಾಬ್ ಬಚ್ಚನ್, ಅಮೀರ್ ಖಾನ್, ಕರೀನಾ ಕಪೂರ್, ಜಾಕ್ವೇಲಿನ್ ಫರ್ನಾಂಡಿಸ್ ಎಲ್ಲರು ಸೋನಮ್ ಮದುವೆಗೆ ಸಾಕ್ಷಿಯಾಗಿದ್ದರು.

ಸದ್ಯಕ್ಕೆ ಸೋನಮ್ ‘ವೀರೆ ದಿ ವೆಡ್ಡಿಂಗ್’ ಚಿತ್ರದಲ್ಲಿ ಕರೀನಾ ಕಪೂರ್ ಜೊತೆ ನಟಿಸುತ್ತಿದ್ದು, ಮದುವೆಗೆ ಕರೀನಾ ಕಪೂರ್ ತನ್ನ ಪತಿ ಸೈಫ್ ಅಲಿ ಖಾನ್, ಮಗ ತೈಮೂರ್ ಹಾಗೂ ಸಹೋದರಿ ಕರೀಶ್ಮಾ ಕಪೂರ್ ಜೊತೆ ಸಬ್ಯಾಸಾಚಿ ಲೆಹೆಂಗಾದಲ್ಲಿ ಮಿಂಚಿದ್ದರು.

ಇನ್ನೂ ಸೋನಮ್ ಅವರ ಸೋದರ ಸಂಬಂಧಿಗಳಾದ ಜಾನ್ವಿ ಕಪೂರ್ ಹಾಗೂ ಖುಷಿ ಕಪೂರ್ ತನ್ನ ತಂದೆ ಬೋನಿ ಕಪೂರ್ ಜೊತೆ ಮದುವೆಗೆ ಆಗಮಿಸಿದ್ದರು. ಜಾನ್ವಿ ಹಾಗೂ ಖುಷಿ ಮನೀಶ್ ಮಲ್ಹೋತ್ರ ಡಿಸೈನ್ ಮಾಡಿದ ಲೆಹೆಂಗಾ ತೊಟ್ಟಿದ್ದರು.

ಸೋನಮ್ ಆತ್ಮೀಯ ಗೆಳತಿ ಜಾಕ್ವೇಲಿನ್ ಫರ್ನಾಂಡಿಸ್ ಕೂಡ ಪಿಂಕ್ ಲೆಹೆಂಗಾದಲ್ಲಿ ಕಾಣಿಸಿಕೊಂಡಿದ್ದರು. ಜಾಕ್ವೇಲಿನ್ ಜೊತೆ ರಾಣಿ ಮುಖರ್ಜಿ, ಸ್ವರ ಭಾಸ್ಕರ್ ಕಾಣಿಸಿಕೊಂಡರು. ಇನ್ನೂ ಸೋನಮ್ ಮದುವೆಗೆ ಅಮಿತಾಬ್ ಮಕ್ಕಳು ಅಭಿಷೇಕ್ ಹಾಗೂ ಶ್ವೇತಾ ಕೂಡ ಆಗಮಿಸಿದ್ದರು.