ನವದೆಹಲಿ: ಮನೆಯಿಂದಲೇ ಕಾರು ಹಾಗೂ ಲಕ್ಷಾಂತರ ರೂ. ಕದ್ದು ಪರಾರಿಯಾಗಿದ್ದಾನೆ ಅಂತ ಸ್ವಂತ ಮಗನ ವಿರುದ್ಧ ದೆಹಲಿಯ ಪೋಷಕರು ದೂರು ನೀಡಿದ್ದಾರೆ.
18 ವರ್ಷದ ಯುವಕನೊಬ್ಬ ಗೆಳೆಯನಿಗಾಗಿ ಮನೆಯಲ್ಲಿದ್ದ 50 ಸಾವಿರ ರೂ. ಹಣವನ್ನು ಕದ್ದಿದ್ದಾನೆ. ಅಷ್ಟೇ ಅಲ್ಲದೆ ತಾಯಿಯ ಬ್ಯಾಂಕ್ ಖಾತೆಯಿಂದ ಸುಮಾರು 13 ಲಕ್ಷ ರೂ. ಜೊತೆಗೆ ತಂದೆಯ ಕಾರನ್ನು ಕದ್ದು ಪರಾರಿಯಾಗಿದ್ದಾನೆ. ಹಣವನ್ನು ಬಳಸಿಕೊಂಡು ಕೆಟ್ಟ ಚಟಕ್ಕೆ ಬಿದ್ದು ಮಗ ಹಾಳಾಗುತ್ತಿದ್ದಾನೆ. ಕೆಟ್ಟ ಕೆಲಸಕ್ಕೆ ಕಾರು ಹಾಗೂ ದುಡ್ಡನ್ನು ಬಳಸಿಕೊಳ್ಳುತ್ತಿದ್ದಾನೆ ಎಂದು ಡಿ. 19 ರಂದು ಮಗನ ವಿರುದ್ಧವೇ ಹೆತ್ತವರು ಕಳ್ಳತನದ ದೂರು ನೀಡಿದ್ದು ಪ್ರಕರಣ ದಾಖಲಾಗಿದೆ.
ಮನೆಯಿಂದ ಹಣವನ್ನು ಕದ್ದು, ಅದರಿಂದ ಮಗ ಡ್ರಗ್ಸ್ ಖರೀದಿಸಿ ಮಾರಾಟ ಮಾಡುತ್ತಿದ್ದಾನೆ ಅಂತ ಅನುಮಾನವಿದೆ ಎಂದು ಪೋಷಕರು ನೀಡಿರುವ ದೂರಿನಲ್ಲಿ ತಿಳಿಸಿದ್ದಾರೆ. ಈ ಕುರಿತು ಸಂಬಂಧಿಸಿದಂತೆ ಪೊಲೀಸರು ತನಿಖೆ ನಡೆಸುತ್ತಿದ್ದ ವೇಳೆ ಯುವಕನ ಪ್ರೇಯಸಿಯನ್ನು ವಿಚಾರಿಸಿದರೂ ಆತನ ಬಗ್ಗೆ ಯಾವುದೇ ಸುಳಿವು ದೊರಕಿರಲಿಲ್ಲ.
ಮಂಗಳವಾರ ಯುವಕ ಪೋಷಕರಿಗೆ ಕರೆ ಮಾಡಿ ನನ್ನನ್ನು ಹುಡುಕಬೇಡಿ. ನಾನು ಮತ್ತೆ ಮನೆಗೆ ಬರುವುದಿಲ್ಲ ಎಂದು ಹೇಳಿದ್ದಾನೆ. ಸದ್ಯ ಪೊಲೀಸರು ಈ ಕುರಿತು ತನಿಖೆ ನಡೆಸುತ್ತಿದ್ದು, ಯುವಕನ ಫೋನ್ ಟ್ರಾಕ್ ಮಾಡಿದಾಗ ಜೈಪುರ ಲೋಕೆಶನ್ ಸಿಕ್ಕಿದೆ. ಆದರೆ ಫೋನ್ ಸ್ವಿಚ್ ಆಫ್ ಆಗಿದೆ ಎಂದು ದೆಹಲಿಯ ಪೊಲೀಸ್ ಅಧಿಕಾರಿ ಹೇಳಿದ್ದಾರೆ.
ಪಬ್ಲಿಕ್ ಟಿವಿಯನ್ನು ಇನ್ ಸ್ಟಾಗ್ರಾಮ್ ನಲ್ಲಿ ಫಾಲೋ ಮಾಡಿ www.instagram.com/publictv , ಪಬ್ಲಿಕ್ ಟಿವಿ ಆ್ಯಪ್ ಡೌನ್ಲೋಡ್ ಮಾಡಿ: play.google.com/publictv