ಸಹೋದರಿಯರಿಬ್ಬರ ಅಪಹರಣ – ಅಪ್ರಾಪ್ತೆ ಮೇಲೆ ಅತ್ಯಾಚಾರವೆಸಗಿ ಸಿಕ್ಕಿಬಿದ್ದ ಪಾಗಲ್ ಪ್ರೇಮಿ

ಚಾಮರಾಜನಗರ: ಅಪ್ರಾಪ್ತ ಸಹೋದರಿಯರಿಬ್ಬರನ್ನು ಅಪಹರಿಸಿ ಒಬ್ಬಳ ಮೇಲೆ ಅತ್ಯಾಚಾರ ಎಸಗಿರುವ ಪ್ರಕರಣ ಕೊಳ್ಳೇಗಾಲ ತಾಲೂಕಿನ ಜಾಗೇರಿ ಸಮೀಪದ ಸೆಲ್ವೈಪುರಿದೊಡ್ಡಿಯಲ್ಲಿ ನಡೆದಿದೆ.

ಆರ್ಮುಗಂ ಅತ್ಯಾಚಾರವೆಸಗಿ ಅರೆಸ್ಟ್ ಆದ ಆರೋಪಿ. ಜಾಗೇರಿ ಸಮೀಪದ ಪಿ.ಜಿ ದೊಡ್ಡಿ ಗ್ರಾಮದವನಾಗಿರುವ ಆರ್ಮುಗಂ ಸೆಲ್ವೈಪುರಿ ಗ್ರಾಮದ 16 ವರ್ಷದ ಬಾಲಕಿಯಲ್ಲಿ ಪ್ರೀತಿಸುತ್ತಿದ್ದನು ಎಂದು ತಿಳಿದು ಬಂದಿದೆ.

ಕಳೆದ 29ರಂದು ಸಂಜೆ ಅಪ್ರಾಪ್ತೆ ತನ್ನ 9 ವರ್ಷದ ತಂಗಿ ಜೊತೆ ನೀರು ತರಲು ಹೊರ ಬಂದಿದ್ದಳು. ಈ ವೇಳೆ ಆರೋಪಿ ಆರ್ಮುಗಂ ಇಬ್ಬರಿಗೂ ಮತ್ತು ಬರುವ ಮಾತ್ರೆ ಬೆರೆಸಿದ ಜ್ಯೂಸ್ ಅನ್ನು ಕುಡಿಸಿದ್ದಾನೆ. ಬಳಿಕ ಇಬ್ಬರನ್ನು ಅಪಹರಿಸಿ ಸೇಲಂಗೆ ಕರೆದುಕೊಂಡು ಹೋಗಿದ್ದಾನೆ.

ಕಳೆದ ಫೆ. 1ರಂದು ಆರ್ಮುಗಂ ಅಪ್ರಾಪ್ತೆಯ 9 ವರ್ಷದ ತಂಗಿಯನ್ನು ಬಸ್ಸಿಗೆ ಹತ್ತಿಸಿ ಕಳುಹಿಸಿದ್ದಾನೆ. ಇತ್ತ ಮಕ್ಕಳ ಪೋಷಕರು ನಾಪತ್ತೆ ಪ್ರಕರಣ ದಾಖಲು ಮಾಡಿದ್ದರು. ಈ ಹಿನ್ನೆಲೆಯಲ್ಲಿ ಕೊಳ್ಳೇಗಾಲ ಪೊಲೀಸರು ಆತನ ಇರುವಿಕೆ ಪತ್ತೆ ಹಚ್ಚಿ ಬಾಲಕಿಯನ್ನು ರಕ್ಷಿಸಿದ್ದಾರೆ.

ವೈದ್ಯಕೀಯ ಪರೀಕ್ಷೆ ನಡೆಸಿದ ವೇಳೆ ಅತ್ಯಾಚಾರ ಎಸಗಿರುವುದು ದೃಢಪಟ್ಟಿದೆ ಎಂದು ತಿಳಿದುಬಂದಿದ್ದು, ಆರೋಪಿಯನ್ನು ನ್ಯಾಯಾಂಗ ಬಂಧನಕ್ಕೆ ಒಪ್ಪಿಸಲಾಗಿದೆ.