ಶಿವಣ್ಣನಿಗೆ ನಾಯಕಿಯಾದ ತೆಲುಗಿನ ಚೆಲುವೆ!

ಏಕಾಏಕಿ ಯಾವ್ಯಾವ ಚಿತ್ರಗಳಲ್ಲಿ ನಟಿಸ್ತಿದ್ದೀರಿ ಎಂಬ ಪ್ರಶ್ನೆ ಎದುರಾದರೆ ಖುದ್ದು ಶಿವರಾಜ್ ಕುಮಾರ್ ಅವರೇ ತಡಕಾಡ ಬೇಕಾದೀತೇನೋ… ಯಾಕೆಂದರೆ ಸದ್ಯ ಅವರು ಒಪ್ಪಿಕೊಂಡಿರೋ ಚಿತ್ರಗಳ ಪಟ್ಟಿಯೇ ಅಷ್ಟು ದೊಡ್ಡದಿದೆ. ಹೀಗೆ ಶಿವಣ್ಣ ಒಪ್ಪಿಕೊಂಡಿರೋ ಸಾಲು ಸಾಲು ಚಿತ್ರಗಳಲ್ಲಿ ಎಸ್‍ಆರ್ ಕೆ ಕೂಡಾ ಒಂದು. ಈ ಚಿತ್ರಕ್ಕೆ ಕೊಂಚ ತಡವಾಗಿಯಾದರೂ ಅದ್ಧೂರಿಯಾಗಿಯೇ ಚಾಲನೆ ಸಿಕ್ಕಿದೆ. ಈ ಚಿತ್ರದಲ್ಲಿ ಶಿವಣ್ಣನಿಗೆ ನಾಯಕಿಯ ಆಯ್ಕೆಯೂ ನಡೆದಿದೆ.

ಲಕ್ಕಿ ಗೋಪಾಲ್ ನಿರ್ದೇಶಕನಾಗ್ತಿರೋ ಈ ಚಿತ್ರಕ್ಕೀಗ ವೇಗದಿಂದ ಕೆಲಸ ಕಾರ್ಯ ಆರಂಭವಾಗಿದೆ. ಶಿವಣ್ಣನ ಕಡೆಯಿಂದ ಚಿತ್ರೀಕರಣಕ್ಕೆ ಗ್ರೀನ್ ಸಿಗ್ನಲ್ ಸಿಗುತ್ತಲೇ ಅಲರ್ಟ್ ಆಗಿರೋ ಚಿತ್ರ ತಂಡ ನಾಯಕಿಯನ್ನೂ ಆಯ್ಕೆ ಮಾಡಿದೆ. ಈಗಾಗಲೇ ತೆಲುಗಿನಲ್ಲಿ ಬೇಡಿಕೆಯ ನಟಿಯಾಗಿರೋ ಇಶಾ ರಬ್ಬಾ ಎಸ್‍ಆರ್‍ಕೆಯಲ್ಲಿ ಶಿವಣ್ಣನಿಗೆ ಜೋಡಿಯಾಗಿ ನಟಿಸೋಕೆ ಆಯ್ಕೆಯಾಗಿದ್ದಾರೆ.

ಈ ಚಿತ್ರದಲ್ಲಿ ಶಿವರಾಜ್ ಕುಮಾರ್ ಅವರು ಡ್ಯಾನ್ಸ್ ಮಾಸ್ಟರ್ ಆಗಿ ನಟಿಸುತ್ತಿದ್ದಾರೆ. ಇದರಲ್ಲಿ ಇಶಾ ಉಪನ್ಯಾಸಕಿಯ ಪಾತ್ರವನ್ನು ನಿರ್ವಹಿಸಲಿದ್ದಾರಂತೆ. ಈಗಾಗಲೇ ಒಂದಷ್ಟು ಚಿತ್ರಗಳಿಗೆ ನಿರ್ದೇಶನ ವಿಭಾಗದಲ್ಲಿ ಕೆಲಸ ಮಾಡಿರೋ ಲಕ್ಕಿ ಕೃಷ್ಣಗೆ ಮೊದಲ ಚಿತ್ರದಲ್ಲಿಯೇ ಲಕ್ಕು ಖುಲಾಯಿಸಿದೆ. ಯಾಕೆಂದರೆ ಅವರಿಗೆ ಮೊದಲ ಪ್ರಯತ್ನದಲ್ಲಿಯೇ ಶಿವಣ್ಣನ ಚಿತ್ರವನ್ನು ನಿರ್ದೇಶನ ಮಾಡೋ ಅವಕಾಶ ಒಲಿದು ಬಂದಿದೆ.