ಶಿವಮೊಗ್ಗ: ನಾಲ್ಕೈದು ಯುವಕರ ಗುಂಪೊಂದು ಹುಕ್ಕಾ ಸೇವಿಸಿ ಪಾನಗೋಷ್ಠಿ ಮಾಡುತ್ತಾ ಪೊಲೀಸರು ಮತ್ತು ಕೆಲವರಿಗೆ ವಿಡಿಯೋ ಮೂಲಕ ಬೆದರಿಕೆ ಹಾಕಿರುವ ಘಟನೆ ಶಿವಮೊಗ್ಗದಲ್ಲಿ ನಡೆದಿದ್ದು, ಇದೀಗ ವಿಡಿಯೋ ವೈರಲ್ ಆಗಿದೆ.
ಬಣ್ಣದ ಅಂಗಡಿಯೊಂದರಲ್ಲಿ ಕುಳಿತು ಮದ್ಯ ಹಾಗೂ ಹುಕ್ಕಾ ಸೇವಿಸುತ್ತಿರುವ ಯುವಕರ ಗುಂಪು ಅಪರಾಧ ವಿಭಾಗದ ಕೆಲವು ಪೊಲೀಸರ ಹೆಸರು ಉಲ್ಲೇಖಿಸಿ ಬೆದರಿಕೆ ಹಾಕಿದ್ದಾರೆ. ಶಿವಮೊಗ್ಗದಲ್ಲಿ ಇನ್ನು ಮುಂದೆ ನಮ್ಮದೇ ಹವಾ ಇರಬೇಕು. ರೌಡಿಶೀಟರ್ ಮಾರ್ಕೆಟ್ ಲೋಕಿ ರೆಕಾರ್ಡ್ ಮುರಿಯುತ್ತೇವೆ. ರೌಡಿಶೀಟರ್ ಕಡೆಕಲ್ ಅಬೀದ್‍ನ ಮುಗಿಸುತ್ತೀವಿ. ಶಿವಮೊಗ್ಗದಲ್ಲಿ ಶೇಕ್ ಅಹಮದ್ ಅಲಿಯಾಸ್ ಶಾರು ಹೆಸರು ಮಾತ್ರ ಇರಬೇಕು ಎಂದು ಏರು ಧ್ವನಿಯಲ್ಲಿ ಮಾತನಾಡಿದ್ದಾರೆ.
ವಿಡಿಯೋದಲ್ಲಿಯ ಪೋಲಿಗಳನ್ನ ನಗರದ ಸೂಳೆಬೈಲ್ ನ ಶೇಕ್ ಅಹಮದ್, ಸೋನು ಮತ್ತು ಇತರರು ಎಂದು ಪೊಲೀಸರು ಗುರುತಿಸಿದ್ದಾರೆ. ಈಗಾಗಲೇ ಇವರೆಲ್ಲರ ಮೇಲೆ ದೊಡ್ಡಪೇಟೆ, ತುಂಗಾನಗರ ಠಾಣೆಗಳಲ್ಲಿ ಹಲವು ಪ್ರಕರಣಗಳು ದಾಖಲಾಗಿದ್ದು, ಜಾಮೀನಿನ ಮೇಲೆ ಹೊರಗಿರುವ ಸಮಯದಲ್ಲಿ ಇಂತಹ ವಿಡಿಯೋ ಮಾಡಿ ಹರಿ ಬಿಟ್ಟಿದ್ದಾರೆ. ವಿಡಿಯೋ ವೈರಲ್ ಆಗುತ್ತಿದ್ದಂತೆ ಎಚ್ಚೆತ್ತ ಪೊಲೀಸರು ಇವರ ಪತ್ತೆಗೆ ಬಲೆ ಬೀಸಿದ್ದಾರೆ.
