– ಇದು ಶೀತಲ್ ಶೆಟ್ಟಿಯ ಕಾಮಿಡಿ ಟ್ರ್ಯಾಕ್!

ಆಂಕರ್ ಆಗಿ ತನ್ನ ಸ್ಫುಟವಾದ ಕನ್ನಡ ಉಚ್ಛಾರದಿಂದಲೇ ಖ್ಯಾತರಾಗಿದ್ದವರು ಶೀತಲ್ ಶೆಟ್ಟಿ. ಆಂಕರಿಂಗ್ ಗೆ ಗುಡ್ ಬೈ ಹೇಳಿದ ನಂತರ ಬಿಗ್ ಬಾಸ್ ಪ್ರವೇಶ ಮಾಡಿದ್ದ ಶೀತಲ್ ಇದೀಗ ನಟನೆಯತ್ತಲೇ ಗಮನ ಕೇಂದ್ರೀಕರಿಸಿದ್ದಾರೆ. ಸದ್ಯ ಅವರು ವಿಶಿಷ್ಟವಾದ ಪಾತ್ರದಲ್ಲಿ ಪೂರ್ಣ ಪ್ರಮಾಣದ ನಾಯಕಿಯಾಗಿ ನಟಿಸುತ್ತಿರುವ ಚಿತ್ರ `ಪತಿಬೇಕು ಡಾಟ್ ಕಾಮ್’!

ಈ ಚಿತ್ರದ ಕಡೆಯಿಂದ ಇದೀಗ ಖುಷಿಯ ವಿಚಾರವೊಂದು ಹೊರ ಬಿದ್ದಿದೆ. ಸೆನ್ಸಾರ್ ಮುಗಿಸಿಕೊಂಡ ಬೆನ್ನಲ್ಲಿಯೇ ನಾಳೆ ಈ ಚಿತ್ರದ ಟ್ರೈಲರ್ ಕಿಚ್ಚ ಸುದೀಪ್ ಅವರಿಂದಲೇ ಬಿಡುಗಡೆಯಾಗಲಿದೆ. ರಾಕೇಶ್ ನಿರ್ದೇಶನ ಮಾಡಿ ನಿರ್ಮಾಪಕರಾಗಿಯೂ ಕಾರ್ಯನಿರ್ವಹಿಸಿರುವ ಪತಿ ಬೇಕು ಡಾಟ್ ಕಾಮ್ ಚಿತ್ರ ಈ ಹಿಂದೆ ಟೀಸರ್ ಮೂಲಕವೇ ಅಲೆಯೆಬ್ಬಿಸಿತ್ತು. ಆದ್ದರಿಂದಲೇ ನಾಳೆ ಬಿಡುಗಡೆಯಾಗಲಿರುವ ಟ್ರೇಲರ್ ಬಗ್ಗೆ ಸಹಜವಾಗಿಯೇ ಕುತೂಹಲವಿದೆ.

ರಾಕೇಶ್ ಒಂದು ಸರಳವಾದ ಆದರೆ ಸಂಕೀರ್ಣವಾದ, ಬದುಕಿಗೆ ಹತ್ತಿರಾದ ಕಥಾ ಹಂದರವೊಂದನ್ನು ಹಾಸ್ಯದ ಶೈಲಿಯಲ್ಲಿ ಪ್ರೇಕ್ಷಕರಿಗೆ ದಾಟಿಸಲು ಸನ್ನದ್ಧರಾಗಿದ್ದಾರೆ. ಮಧ್ಯಮ ವರ್ಗದ ಪೋಷಕರ ಪಾಲಿಗೆ ಮಗಳಿಗೆ ಮದುವೆ ಮಾಡೋದೆಂದರೆ ಜೀವನದ ಪ್ರಮುಖ ಘಟ್ಟ. ಅದರಲ್ಲಿಯೂ ಮಗಳು ಮೂವತ್ತು ವರ್ಷ ದಾಟಿಸಿದರೆ ಅದರ ಪಡಿಪಾಟಲುಗಳನ್ನು ಹೇಳಲಾಗೋದಿಲ್ಲ. ಅಂಥಾ ಮೂವತ್ತು ವರ್ಷ ದಾಟಿದ ಮದುವೆಗೆ ತಯಾರಾದ ಹುಡುಗಿಯ ಪಾತ್ರದಲ್ಲಿ ಶೀತಲ್ ಈ ಚಿತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ. ಈವರೆಗೂ ಶೀತಲ್ ಸಾಕಷ್ಟು ಚಿತ್ರಗಳಲ್ಲಿ ನಟಿಸಿದ್ದಾರೆ. ಆದರೆ ಅದೆಲ್ಲವೂ ಗಂಭೀರವಾದ ಪಾತ್ರಗಳೇ. ಆದರೆ ಈ ಚಿತ್ರದಲ್ಲಿ ಶೀತಲ್ ನಗಿಸುವಂಥಾ ನಟನೆಯನ್ನು ನೀಡಲಿದ್ದಾರಂತೆ.