ಇಷ್ಟರಲ್ಲೇ ಬರಲಿದೆ ಶೀತಲ್ ಶೆಟ್ಟಿ ನಿರ್ದೇಶನದ ಕಾರು!

ಈ ಹಿಂದೆ ಸಂಗಾತಿ ಎಂಬ ಕಿರುಚಿತ್ರವನ್ನು ನಿರ್ದೇಶನ ಮಾಡುವ ಮೂಲಕ ನಿರ್ದೇಶಕಿಯಾಗಿ ಗಮನ ಸೆಳೆದಿದ್ದವರು ಶೀತಲ್ ಶೆಟ್ಟಿ. ಪತಿಬೇಕು ಡಾಟ್ ಕಾಮ್ ಚಿತ್ರದಲ್ಲಿ ನಾಯಕಿಯಾಗಿ ನಟಿಸಿ ಯಶಸ್ವಿಯಾಗಿದ್ದರೂ ನಿರ್ದೇಶನದತ್ತಲೇ ಪ್ರಧಾನ ಆಸಕ್ತಿ ಹೊಂದಿರುವ ಅವರೀಗ ಕಾರು ಎಂಬ ಮತ್ತೊಂದು ಕಿರು ಚಿತ್ರವನ್ನು ನಿರ್ದೇಶನ ಮಾಡಿದ್ದಾರೆ. ಇದನ್ನು ಇದೇ ತಿಂಗಳ ಹದಿನೈದನೇ ತಾರೀಕಿನಂದು ಬಿಡುಗಡೆ ಮಾಡಲು ಶೀತಲ್ ಮುಂದಾಗಿದ್ದಾರೆ.

ಸಂಗಾತಿ ಚಿತ್ರದಲ್ಲಿ ಸಂಬಂಧಗಳ ಬಗೆಗಿನ ಸೂಕ್ಷ್ಮ ಕಥೆಯನ್ನು ಶೀತಲ್ ಪ್ರೇಕ್ಷಕರ ಮುಂದಿಟ್ಟಿದ್ದರು. ಈ ಬಾರಿ ಬಾಲ್ಯದಲ್ಲಿ ಎಲ್ಲರನ್ನೂ ಕಾಡಬಹುದಾದ ಕನಸಿನಂಥಾ ವಿಚಾರವನ್ನು ಕಾರು ಕಿರುಚಿತ್ರದ ಮೂಲಕ ಕಟ್ಟಿ ಕೊಟ್ಟಿದ್ದಾರೆ. ಸಾಮಾನ್ಯವಾಗಿ ಎಳೇ ವಯಸ್ಸಿನಲ್ಲಿ ಮನಸೆಳೆಯುವ ಯಾವುದೇ ವಸ್ತಗಳ ಬಗ್ಗೆ ಥರ ಥರದ ಕಲ್ಪನೆಗಳು ಹುಟ್ಟಿಕೊಳ್ಳುತ್ತವೆ. ಅದರಲ್ಲಿ ಏನೇನಿರಬಹುದೆಂಬುದರ ಬಗ್ಗೆ ವಾಸ್ತವವನ್ನು ಮೀರಿಕೊಂಡ ರೋಮಾಂಚಕ ಕಲ್ಪನೆಗಳು ಕಾಡುತ್ತವೆ. ಹಾಗೆ ಎಳೇ ಜೀವವೊಂದನ್ನು ಕಾರೆಂಬ ಮಾಯೆ ಕಲ್ಪನೆಯಾಗಿ, ಬೆರಗಾಗಿ ಕಾಡುವಂಥಾ ಕಥೆ ಈ ಕಿರುಚಿತ್ರದ್ದು.

ಕಾರು ಕಥೆಗೆ ಸರಿ ಹೊಂದುವಂಥಾ ಹೆಣ್ಣು ಮಗುವನ್ನು ಆಡಿಷನ್ ನಡೆಸಿ ಆಯ್ಕೆ ಮಾಡಿಕೊಳ್ಳಲಾಗಿದೆ. ಆ ಮಗು ನಿರೀಕ್ಷೆಗಿಂತಲೂ ಹೆಚ್ಚೇ ಪರಿಣಾಮಕಾರಿಯಾಗಿ ನಟಿಸಿದೆಯಂತೆ. ಇದರ ಚಿತ್ರೀಕರಣ ಮಾಕೋನಹಳ್ಳಿ ಡ್ಯಾಂನ ಸುತ್ತಮುತ್ತಲ ರಮಣೀಯ ಪ್ರದೇಶಗಳಲ್ಲಿ ನಡೆಸಲಾಗಿದೆ. ಯೋಗೀಶ್ವರ್ ಛಾಯಾಗ್ರಹಣ, ಋತ್ವಿಕ್ ಸಂಕಲನ, ಅನಂತ್ ಕಾಮತ್ ಸಂಗೀತ ನಿರ್ದೇಶನ ಈ ಕಿರು ಚಿತ್ರಕ್ಕಿದೆ. ಕಾರು ಎಂಬ ಕನಸಿನಂಥಾ ಕಥೆಯ ಮೂಲಕ ಮತ್ತೊಂದು ಸಲ ಪ್ರೇಕ್ಷಕರನ್ನು ಮುಖಾಮುಖಿಯಾಗುವ ಖುಷಿಯಲ್ಲಿ ಶೀತಲ್ ಅವರಿದ್ದಾರೆ. ಈ ಹಿಂದೆ ಸಂಗಾತಿ ಕಿರುಚಿತ್ರಕ್ಕೆ ಸಿಕ್ಕಂಥಾದ್ದೇ ಸ್ಪಂದನೆ ಕಾರಿಗೂ ಸಿಗುತ್ತದೆಂಬ ನಿರೀಕ್ಷೆಯೂ ಅವರಲ್ಲಿದೆ.

🙂 pic.twitter.com/jqQflUjMpp

— sheetal shetty (@isheetalshetty) December 10, 2019