– ಪಬ್ಲಿಕ್ ಟಿವಿ ವರದಿ ಬೆನ್ನಲ್ಲೇ ಎಚ್ಚೆತ್ತ ಆರೋಗ್ಯ ಇಲಾಖೆ
ಕಲಬುರಗಿ: ಫರಹತಾಬಾದ್ (Farhatabad) ಪಿಹೆಚ್‌ಸಿ ಹಳೆ ಕಟ್ಟಡದಲ್ಲಿ ಸ್ಯಾನಿಟರಿ ಪ್ಯಾಡ್ (Sanitary Pad) ಸುಟ್ಟ ವರದಿಯನ್ನು ನಿಮ್ಮ ಪಬ್ಲಿಕ್ ಟಿವಿಯಲ್ಲಿ ಪ್ರಸಾರ ಮಾಡಿದ್ದು, ವರದಿ ಬಳಿಕ ಆರೋಗ್ಯ ಇಲಾಖೆ ಎಚ್ಚೆತ್ತುಕೊಂಡು ಪಿಹೆಚ್‌ಸಿ ವೈದ್ಯಾಧಿಕಾರಿಗೆ ನೋಟಿಸ್ ಜಾರಿ ಮಾಡಿದೆ. ಈ ಮಧ್ಯೆ ಆರೋಗ್ಯ ಇಲಾಖೆ ಜೊತೆಗೆ ಫರಹತಾಬಾದ್ ಸರ್ಕಾರಿ ಪ್ರೌಡ ಶಾಲೆ ಶಿಕ್ಷಕರ ಎಡವಟ್ಟು ಸಹ ಇದೀಗ ಕಂಡು ಬರುತ್ತಿದೆ.
ಸರ್ಕಾರ ಗ್ರಾಮೀಣ ಭಾಗದ ಮಹಿಳೆಯರಿಗೆ ಮುಟ್ಟಿನ ಸಮಯದಲ್ಲಿ ಸಮಸ್ಯೆ ಆಗಬಾರದು, ಶುಚಿತ್ವ ಕಾಪಾಡಿಕೊಳ್ಳಬೇಕು ಅಂತಾ ಆರೋಗ್ಯ ಇಲಾಖೆ ಮುಖಾಂತರ ಸರ್ಕಾರಿ ಪ್ರೌಡ ಶಾಲೆಗಳು ಸೇರಿದಂತೆ ಮಹಿಳೆಯರಿಗೆ ಶುಚಿ ಪ್ಯಾಡ್‌ಗಳನ್ನು ಉಚಿತವಾಗಿ ಕೊಡುತ್ತದೆ. ಅದೇ ರೀತಿ ಕಲಬುರಗಿಯ ಫರಹತಾಬಾದ್ ಪಿಹೆಚ್‌ಸಿಗೆ 2017ರಲ್ಲಿ ನೂರಾರು ಬಾಕ್ಸಗಳಲ್ಲಿ ಒಂದೂವರೆ ಲಕ್ಷಕ್ಕೂ ಅಧಿಕ ಶುಚಿ ಪ್ಯಾಡ್‌ಗಳನ್ನು ನೀಡಲಾಗಿತ್ತು. ಆದರೆ ಹೀಗೆ ಸರ್ಕಾರದಿಂದ ಬಡ ಮಹಿಳೆಯರಿಗಾಗಿ ವಿತರಿಸಬೇಕಾದ ಪ್ಯಾಡ್‌ಗಳು 8 ವರ್ಷಗಳಾದರೂ ಸಹ ವಿತರಣೆಯಾಗಿರಲಿಲ್ಲ. ಆ ಹಳೆ ಪಿಹೆಚ್‌ಸಿ ಕಟ್ಟಡ ಡೆಮಾಲಿಶ್ ಮಾಡಲು ಮುಂದಾದ ಸಮಯದಲ್ಲಿ ಸ್ಯಾನಿಟರಿ ಪ್ಯಾಡ್ ವಿತರಣೆಯಾಗದಿರುವದು ಬೆಳಕಿಗೆ ಬಂದಿದೆ. ಈ ವೇಳೆ ವಿತರಣೆಯಾಗದ ಪ್ಯಾಡ್‌ಗಳನ್ನು ಆರೋಗ್ಯ ಇಲಾಖೆಯ ಕೆಲ ಸಿಬ್ಬಂದಿ ಸುಟ್ಟು ಹಾಕಿದ್ದಾರೆ. ಈ ಬಗ್ಗೆ ಪಬ್ಲಿಕ್ ಟಿವಿ ವಿಸ್ತೃತ ವರದಿ ಪ್ರಸಾರ ಮಾಡಿದ ಬೆನ್ನಲ್ಲೇ ಆರೋಗ್ಯ ಇಲಾಖೆ ಅಧಿಕಾರಿಗಳು ಎಚ್ಚೆತ್ತುಕೊಂಡಿದ್ದು, ಫರಹತಾಬಾದ್ ಪಿಹೆಚ್‌ಸಿಯ ವೈದ್ಯಾಧಿಕಾರಿಗೆ ನೋಟಿಸ್ ನೀಡಿದ್ದಾರೆ. ಇದನ್ನೂ ಓದಿ: ಆರ್‌ಸಿಬಿ ಸ್ಟಾರ್‌ ವೇಗಿ ಯಶ್ ದಯಾಳ್‌ ವಿರುದ್ಧ ಲೈಂಗಿಕ ಕಿರುಕುಳ ಆರೋಪ – FIR ದಾಖಲು
ಫರಹತಾಬಾದ್ ಪಿಹೆಚ್‌ಸಿಗೆ ಸರಬರಾಜು ಆದ ಪ್ಯಾಡ್‌ಗಳು ಅಲ್ಲಿನ ಸರ್ಕಾರಿ ಪ್ರೌಢಶಾಲೆಗೆ ವಿತರಣೆಯಾಗಬೇಕಿತ್ತು. ಆದರೆ ಆರೋಗ್ಯ ಅಧಿಕಾರಿಗಳು ಆ ಶಾಲೆಗೆ ವಿತರಣೆ ಮಾಡಿಲ್ಲ. ಇನ್ನೂ ಪ್ರೌಢ ಶಾಲೆಯ ಹೆಣ್ಣುಮಕ್ಕಳಿಗೆ ವಿತರಿಸುವ ಕೆಲಸವನ್ನು ಶಾಲೆಯವರು ಸಹ ಮಾಡಿಲ್ಲ. ಹೀಗಾಗಿ ಈ ಎರಡು ಇಲಾಖೆಯ ಅಧಿಕಾರಿಗಳ ನಿರ್ಲಕ್ಷ್ಯದಿಂದಲೇ ಲಕ್ಷಾಂತರ ಪ್ಯಾಡ್‌ಗಳು ವಿತರಣೆಯಾಗದೇ ಹಾಳಾಗಿವೆ. ಸದ್ಯ ಪ್ರಕರಣ ಗಂಭೀರವಾಗಿ ಪರಿಗಣಿಸಿರುವ ಇಲಾಖೆ 2017ರಿಂದ 2025ರವರೆಗೆ ಪಿಹೆಚ್‌ಸಿಯಲ್ಲಿ ಕಾರ್ಯನಿರ್ವಹಿಸಿದ ಎಲ್ಲಾ ವೈದ್ಯಾಧಿಕಾರಿಗಳನ್ನು ನೋಟಿಸ್ ಕೊಡುವುದಕ್ಕೆ ಇದೀಗ ಮುಂದಾಗಿದೆ. ಇದನ್ನೂ ಓದಿ: ರಂಗನತಿಟ್ಟು ಪಕ್ಷಿಧಾಮದಲ್ಲಿ ಬೋಟಿಂಗ್ ರದ್ದು
