ಶೂ ಬಾಕ್ಸ್ ಒಳಗಡೆ ಪತ್ತೆಯಾದ್ವು ಮೂರು ಉಡಗಳು!

ಬೆಂಗಳೂರು: ಕೊರಿಯರ್ ಮೂಲಕ ತಮಿಳುನಾಡಿಗೆ ಅಕ್ರಮವಾಗಿ ಉಡ ಕಳುಹಿಸುತ್ತಿದ್ದ ಪ್ರಕರಣವೊಂದು ಬೆಳಕಿಗೆ ಬಂದಿದೆ.

ಬೆಂಗಳೂರಿನ ಮೈಸೂರ್ ರಸ್ತೆಯ ಮಹಾಲಕ್ಷ್ಮೀ ಕೊರಿಯರ್ ಆಫೀಸ್ ಬಳಿ ಇಂದು ಸಂಜೆ ನಾಲ್ಕು ಗಂಟೆಗೆ ಅನಾಮಿಕ ವ್ಯಕ್ತಿಯೊಬ್ಬ ಶೂ ಬಾಕ್ಸ್ ನೀಡಿ ತಮಿಳುನಾಡಿನ ಬಸ್ ಗೆ ಪಾರ್ಸಲ್ ಕಳಿಸುವಂತೆ ಹೇಳಿದ್ದ.

ಪಾರ್ಸೆಲ್ ಒಳಗಡೆ ಉಡವನ್ನು ಅಕ್ರಮವಾಗಿ ಸಾಗಾಣಿಕೆ ಮಾಡಲಾಗುತ್ತಿದೆ ಎನ್ನುವ ಖಚಿತ ಮಾಹಿತಿ ಮೇರೆಗೆ ಸಿಐಡಿ ಅರಣ್ಯ ಘಟಕದ ಅಧಿಕಾರಿಗಳಾದ ಪಿ.ಐ ಪುರುಷೋತ್ತಮ್, ಎಂ.ಎಸ್ ರಾಮಮೂರ್ತಿ, ಮುಂಕುಂದ ಅವರು ಕೊರಿಯರ್ ಆಫೀಸ್ ಮೇಲೆ ದಾಳಿ ಮಾಡಿ ಬಾಕ್ಸ್ನಲ್ಲಿದ್ದ ಮೂರು ಉಡಾಗಳು ಪತ್ತೆಮಾಡಿ ವಶಕ್ಕೆ ಪಡೆದಿದ್ದಾರೆ. ನಂತರ ಕೊರಿಯರ್ ಬಾಯ್ ವಿಚಾರಣೆಗೆ ಒಳಪಡಿಸಿದಾಗ ಯಾರೋ ಅನಾಮಿಕ ವ್ಯಕ್ತಿ ನೀಡಿರುವುದಾಗಿ ತಿಳಿಸಿದ್ದಾನೆ.

ಮೂರು ಉಡಾಗಳು ರಾಜಸ್ಥಾನ ಜಾತಿಗೆ ಸೇರಿದ ಉಡಾಗಳು ಎಂದು ಪತ್ತೆ ಹಚ್ಚಿದ್ದಾರೆ. ಘಟನೆಯ ಕುರಿತು ಬ್ಯಾಟರಾಯನಪುರ ಪೊಲೀಸ್ ಠಾಣೆ ದೂರು ದಾಖಲಿಸಲಾಗಿದ್ದು, ತನಿಖೆಯನ್ನು ಮುಂದುವರಿಸಿದ್ದಾರೆ.