ಪಶ್ಚಿಮ ಏಷ್ಯಾದ ಸಂಘರ್ಷದ ಬಿಸಿ ಭಾರತಕ್ಕೂ (India) ತಟ್ಟಿದೆ. ದೇಶದಲ್ಲಿ ಎಲ್ಪಿಜಿ (LPG) ಸಿಲಿಂಡರ್ ಕೊರತೆಯು ಜನತೆಯನ್ನು ಹೈರಾಣಾಗಿಸಿದೆ. ಅನಿಲ ಅಭಾವದಿಂದ ಹೋಟೆಲ್ ಉದ್ಯಮ ತತ್ತರಿಸಿ ಹೋಗಿದೆ. ಗೃಹಬಳಕೆಗೂ ಸಮಸ್ಯೆ ತಲೆದೋರಿದ್ದು, ಜನರು ಕಂಗಾಲಾಗಿದ್ದಾರೆ. ಎಲ್ಪಿಜಿ ಕೊರತೆಯು 6ನೇ ದಿನಕ್ಕೆ ಕಾಲಿಟ್ಟಿದೆ. ಹೀಗೆಯೇ ಮುಂದುವರಿದರೆ ಪರಿಸ್ಥಿತಿ ಏನಾಗಬಹುದು ಎಂಬ ಆತಂಕ ಮನೆಮಾಡಿದೆ. ಮತ್ತೊಂದೆಡೆ, ಪೈಪ್ಡ್ ನೈಸರ್ಗಿಕ ಅನಿಲ (PNG) ಪೂರೈಕೆಯ ಮೇಲೆ ಮಾತ್ರ ಯುದ್ಧದ ಬಿಸಿ ತಾಗಿಲ್ಲ. ಪಿಎನ್ಜಿ ಬಳಕೆದಾರರು ಇನ್ನೂ ಸ್ಥಿರವಾದ ಅನಿಲ ಪೂರೈಕೆಯನ್ನು ಪಡೆಯುತ್ತಿದ್ದಾರೆ. ಪಿಎನ್ಜಿ ಭಾರತಕ್ಕೆ ಆಶಾದಾಯಕ ಸೌಕರ್ಯವಾಗಿ ಕಂಡಿದೆ. ಆದರೆ, ಎಲ್ಪಿಜಿ ಮೇಲೆ ಮಾತ್ರ ಎಫೆಕ್ಟ್ ಯಾಕೆ ಎಂಬ ಪ್ರಶ್ನೆ ಸಾರ್ವಜನಿಕ ವಲಯದಲ್ಲಿ ವ್ಯಕ್ತವಾಗಿದೆ.
ಏನಿದು ಎಲ್ಪಿಜಿ ಮತ್ತು ಪಿಎನ್ಜಿ? ಇವುಗಳ ನಡುವಿನ ವ್ಯತ್ಯಾಸ ಏನು? ಇವುಗಳಿಗೆ ಪೂರೈಕೆ ಸರಪಳಿಗಳು, ಆಮದು ಅವಲಂಬನೆ ಮತ್ತು ವಿತರಣಾ ವ್ಯವಸ್ಥೆಗಳಲ್ಲಿನ ವ್ಯತ್ಯಾಸಗಳೇನು ಎಂಬ ಪ್ರಶ್ನೆಗಳಿಗೆ ವಿವರ ಇಲ್ಲಿದೆ.
ಎಲ್ಪಿಜಿ
ದ್ರವೀಕೃತ ಪೆಟ್ರೋಲಿಯಂ ಅನಿಲ. ಎಲ್ಪಿಜಿ- ಪ್ರೋಪೇನ್ ಮತ್ತು ಬ್ಯುಟೇನ್ ಅನಿಲಗಳ ಮಿಶ್ರಣವಾಗಿದೆ. ಇದನ್ನು ಮುಖ್ಯವಾಗಿ ಅಡುಗೆ ಮತ್ತು ಕೈಗಾರಿಕಾ ಇಂಧನವಾಗಿ ಬಳಸಲಾಗುತ್ತದೆ. ಪೆಟ್ರೋಲಿಯಂ ಸಂಸ್ಕರಣೆ ಅಥವಾ ನೈಸರ್ಗಿಕ ಅನಿಲ ಹೊರತೆಗೆಯುವಿಕೆಯಿಂದ ಇದನ್ನು ಪಡೆಯಲಾಗುತ್ತದೆ. ಇದು ಹೆಚ್ಚು ಶಾಖದ ಮೌಲ್ಯವನ್ನು ಹೊಂದಿದ್ದು, ಪರಿಸರ ಸ್ನೇಹಿ ಮತ್ತು ಕಡಿಮೆ ಮಾಲಿನ್ಯವನ್ನು ಉಂಟುಮಾಡುತ್ತದೆ. ಇದನ್ನೂ ಓದಿ: ನೌಕಾಪಡೆಯ ಬೆಂಗಾವಲಿನೊಂದಿಗೆ ಹಾರ್ಮುಜ್ ಜಲಸಂಧಿ ದಾಟಿ ಭಾರತದತ್ತ ಬರುತ್ತಿದೆ ಎಲ್ಪಿಜಿ ಟ್ಯಾಂಕರ್
ಪಿಎನ್ಜಿ
ಕೊಳವೆ ಮೂಲಕ ನೈಸರ್ಗಿಕ ಅನಿಲ. ಪಿಎನ್ಜಿ ಸುರಕ್ಷಿತ, ಪರಿಸರ ಸ್ನೇಹಿ ಇಂಧನವಾಗಿದೆ. ಪ್ರಾಥಮಿಕವಾಗಿ ಮಿಥೇನ್ನಿಂದ ಕೂಡಿದೆ. ಇದನ್ನು ಮನೆಗಳು ಮತ್ತು ವಾಣಿಜ್ಯ ಅಡುಗೆಮನೆಗಳಿಗೆ ನೇರವಾಗಿ ಭೂಗತ ಪೈಪ್ಲೈನ್ ಜಾಲಗಳ ಮೂಲಕ ಸರಬರಾಜು ಮಾಡಲಾಗುತ್ತದೆ. ಇದರ ನಿರಂತರ ಪೂರೈಕೆ (24/7), ಕಡಿಮೆ ವೆಚ್ಚ ಮತ್ತು ಸುರಕ್ಷತೆ ಕಾರಣದಿಂದಾಗಿ LPG ಗಿಂತ ಹೆಚ್ಚಾಗಿ ಆದ್ಯತೆ ನೀಡಲಾಗುತ್ತದೆ.
PNGಯು LPG ಗಿಂತ ಹೇಗೆ ಭಿನ್ನ?
ಭಾರತೀಯರಿಗೆ LPG ಸಿಲಿಂಡರ್ಗಳು ಅತ್ಯಂತ ಸಾಮಾನ್ಯ ಅಡುಗೆ ಇಂಧನವಾಗಿದೆ. ಆದಾಗ್ಯೂ, PNG ಅಥವಾ ಪೈಪ್ಡ್ ನ್ಯಾಚುರಲ್ ಗ್ಯಾಸ್ ಕ್ರಮೇಣ ದೇಶಾದ್ಯಂತ ಜನಪ್ರಿಯ ಪರ್ಯಾಯವಾಗುತ್ತಿದೆ. PNG ಎಂದರೆ, ಮನೆಗಳು ಮತ್ತು ವ್ಯವಹಾರಗಳಿಗೆ ನೇರವಾಗಿ ಕೊಳವೆ ಮೂಲಕ ಸಾಗಿಸಲಾಗುವ ನೈಸರ್ಗಿಕ ಅನಿಲ. ನೀರು ಸರಬರಾಜಿನಂತೆ ಇದು ಕೂಡ. ಆದರೆ ಇದಕ್ಕೆ ಎಲ್ಪಿಜಿ ತದ್ವಿರುದ್ಧವಾಗಿದೆ. LPGಯನ್ನು ಸಿಲಿಂಡರ್ಗಳಲ್ಲಿ ಸಂಗ್ರಹಿಸಲಾಗುತ್ತದೆ. ಅನಿಲ ಏಜೆನ್ಸಿಗಳ ಮೂಲಕ ವಾಣಿಜ್ಯ ಮತ್ತು ಗೃಹಬಳಕೆಗೆ ತಲುಪಿಸಲಾಗುತ್ತದೆ.
ಭಾರತದಲ್ಲಿ ಪಿಎನ್ಜಿ ಬಳಕೆ ಹೇಗಿದೆ?
ಭಾರತದ 34 ರಾಜ್ಯಗಳು ಮತ್ತು ಕೇಂದ್ರಾಡಳಿತ ಪ್ರದೇಶಗಳನ್ನು ಪಿಎನ್ಜಿ ಜಾಲ ವ್ಯಾಪಿಸಿದೆ. ಸುಮಾರು 1.59 ಕೋಟಿ ಮನೆಗಳು PNG ಗೆ ಸಂಪರ್ಕ ಹೊಂದಿವೆ. 2034 ರ ವೇಳೆಗೆ ಇದನ್ನು 12.63 ಕೋಟಿ PNG ಸಂಪರ್ಕಗಳಿಗೆ ವಿಸ್ತರಿಸಲು ಕೇಂದ್ರ ಸರ್ಕಾರ ಯೋಜಿಸಿದೆ. LPG ಪೂರೈಕೆಯ ಮೇಲಿನ ಒತ್ತಡವನ್ನು ಕಡಿಮೆ ಮಾಡಲು PNG ಸಂಪರ್ಕಗಳನ್ನು ತೆಗೆದುಕೊಳ್ಳುವಂತೆ ಬಳಕೆದಾರರಿಗೆ ಕೇಂದ್ರ ಸರ್ಕಾರ ಸಲಹೆ ನೀಡಿದೆ.
ದೇಶದಲ್ಲಿ PNG ಉತ್ಪಾದನೆ ಎಷ್ಟು?
ಭಾರತವು ತನ್ನ ನೈಸರ್ಗಿಕ ಅನಿಲದ ಅರ್ಧದಷ್ಟು ಉತ್ಪಾದಿಸುತ್ತದೆ. ಸ್ಥಿರವಾದ PNG ಪೂರೈಕೆಗೆ ಪ್ರಮುಖ ಕಾರಣವೆಂದರೆ, ಅದು ದೇಶೀಯ ಉತ್ಪಾದನೆ. ಭಾರತದ ಪ್ರಸ್ತುತ ನೈಸರ್ಗಿಕ ಅನಿಲ ಬಳಕೆ ಸುಮಾರು 189 MMSCMD (ದಿನಕ್ಕೆ ಮಿಲಿಯನ್ ಮೆಟ್ರಿಕ್ ಸ್ಟ್ಯಾಂಡರ್ಡ್ ಕ್ಯೂಬಿಕ್ ಮೀಟರ್ಗಳು). ಸರಿಸುಮಾರು 97.5 MMSCMD, ಸುಮಾರು 50%ನಷ್ಟು ದೇಶದಲ್ಲೇ ಉತ್ಪಾದಿಸಲಾಗುತ್ತದೆ. ‘ದೇಶೀಯ ಉತ್ಪಾದನೆಯು ಪೂರೈಕೆ ಸ್ಥಿರತೆಯನ್ನು ಕಾಪಾಡಿಕೊಳ್ಳಲು ಸಹಾಯ ಮಾಡುತ್ತದೆ’ ಎಂದು ರೇಟಿಂಗ್ ಏಜೆನ್ಸಿ ಐಸಿಆರ್ಎ ಹಿರಿಯ ಉಪಾಧ್ಯಕ್ಷ ಪ್ರಶಾಂತ್ ವಸಿಷ್ಠ ತಿಳಿಸಿದ್ದಾರೆ.
ಜಾಗತಿಕ ಪೂರೈಕೆಯಲ್ಲಿ ಅಡಚಣೆಗಳು ಉಂಟಾದರೂ, ಭಾರತವು ತನ್ನದೇ ಆದ ನೈಸರ್ಗಿಕ ಅನಿಲ ಉತ್ಪಾದನೆಯನ್ನು ಅವಲಂಬಿಸಬಹುದು. ಇದು ಹಠಾತ್ ಕೊರತೆಯಿಂದ ಎದುರಾಗುವ ಸಮಸ್ಯೆಯನ್ನು ಕಡಿಮೆ ಮಾಡುತ್ತದೆ. ದೇಶೀಯ ಅನಿಲ ಪೂರೈಕೆಯು ಕುಶನ್ ಒದಗಿಸುತ್ತದೆ. ಹೆಚ್ಚಿನ ಬಳಕೆದಾರರು PNGಗೆ ಬದಲಾದರೆ, LPGಗೆ ಹೋಲಿಸಿದರೆ ಬೇಡಿಕೆಯನ್ನು ಹೆಚ್ಚು ಸರಾಗವಾಗಿ ನಿಭಾಯಿಸಬಹುದು ಎಂದು ಪ್ರಶಾಂತ್ ವಿಶ್ಲೇಷಿಸಿದ್ದಾರೆ. ಇದನ್ನೂ ಓದಿ: ಎಲ್ಪಿಜಿ ಗ್ಯಾಸ್ ದರ ಏರಿಕೆ, ವಿತರಣೆಯೂ ಇಲ್ಲ – ಆಟೋ ಚಾಲಕರ ಪರದಾಟ
ಬೇರೆ ದೇಶಗಳಿಂದ ಪಿಎನ್ಜಿ ಭಾರತಕ್ಕೆ ಬರುತ್ತಾ?
ಹಲವು ದೇಶಗಳಿಂದಲೂ ಪಿಎನ್ಜಿ ಭಾರತಕ್ಕೆ ಬರುತ್ತದೆ. ಈ ನೈಸರ್ಗಿಕ ಅನಿಲವು ಅಮೆರಿಕ, ರಷ್ಯಾ ಮತ್ತು ಆಸ್ಟ್ರೇಲಿಯಾ ಸೇರಿದಂತೆ ಹಲವಾರು ದೇಶಗಳಿಂದ ಬರುತ್ತದೆ. ಆಮದು ವೈವಿಧ್ಯತೆಯಿಂದ ಕೂಡಿದೆ. ಈ ವಿಧಾನವು ಯಾವುದೇ ಒಂದು ದೇಶದ ಮೇಲಿನ ಅವಲಂಬನೆಯನ್ನು ಕಡಿಮೆ ಮಾಡುತ್ತದೆ. ಯುನೈಟೆಡ್ ಅರಬ್ ಎಮಿರೇಟ್ಸ್ ಅಥವಾ ಸೌದಿ ಅರೇಬಿಯಾದಂತಹ ಮಧ್ಯಪ್ರಾಚ್ಯದ ಪ್ರಮುಖ ಉತ್ಪಾದಕರು ಇರಾನ್ ಒಳಗೊಂಡ ಭೌಗೋಳಿಕ ರಾಜಕೀಯ ಉದ್ವಿಗ್ನತೆಗಳಿಂದಾಗಿ ಅಡೆತಡೆಗಳನ್ನು ಎದುರಿಸಿದರೂ, ಭಾರತದ ನೈಸರ್ಗಿಕ ಅನಿಲ ಪೂರೈಕೆಗೆ ತೊಂದರೆಯಾಗಿಲ್ಲ.
ಎಲ್ಪಿಜಿ ಮೇಲೆ ಭಾರತ ಹೆಚ್ಚು ಅವಲಂಬನೆ?
ಪಿಎನ್ಜಿಗೆ ಹೋಲಿಸಿದರೆ, ಎಲ್ಪಿಜಿ ಪರಿಸ್ಥಿತಿ ಭಿನ್ನವಾಗಿದೆ. ಭಾರತವು ತನ್ನ ಎಲ್ಪಿಜಿ ಅಗತ್ಯಗಳಲ್ಲಿ ಸುಮಾರು 62% ಅನ್ನು ಹೊರಗಿನಿಂದ ಆಮದು ಮಾಡಿಕೊಳ್ಳುತ್ತದೆ. ಆ ಆಮದುಗಳಲ್ಲಿ ಸುಮಾರು 90%ರಷ್ಟ ಹಾರ್ಮುಜ್ ಜಲಸಂಧಿಯ ಮೂಲಕ ಭಾರತಕ್ಕೆ ಬರುತ್ತದೆ. ಆದರೆ ಈಗ ಮಧ್ಯಪ್ರಾಚ್ಯ ಸಂಘರ್ಷದಿಂದಾಗಿ ಹಾರ್ಮುಜ್ ಜಲಸಂಧಿ ಮಾರ್ಗದಲ್ಲಿ ಹಡಗುಗಳ ಸಂಚಾರಕ್ಕೆ ಬಿಕ್ಕಟ್ಟು ಎದುರಾಗಿದೆ. ಭೌಗೋಳಿಕ ರಾಜಕೀಯ ಉದ್ವಿಗ್ನತೆಯಿಂದ LPG ಪೂರೈಕೆ ಕಷ್ಟವಾಗಿದೆ. ಪರಿಸ್ಥಿತಿಯನ್ನು ನಿರ್ವಹಿಸಲು ಕೇಂದ್ರ ಸರ್ಕಾರವು ವಾಣಿಜ್ಯ ಎಲ್ಪಿಜಿ ಪೂರೈಕೆಯನ್ನು ನಿರ್ಬಂಧಿಸಿದೆ. ಗೃಹಬಳಕೆಗೆ ಮಾತ್ರ ಆದ್ಯತೆ ನೀಡಿದೆ. ವಾಣಿಜ್ಯ ಸಿಲಿಂಡರ್ಗಳ ಅಭಾವದಿಂದ ರೆಸ್ಟೋರೆಂಟ್ಗಳು ಮತ್ತು ಸಣ್ಣ ಹೋಟೆಲ್ ಉದ್ಯಮಗಳಿಗೆ ಭಾರಿ ಹೊಡೆತ ಬಿದ್ದಿದೆ.
ಕರ್ನಾಟಕ ಸೇರಿ ಹಲವೆಡೆ ಎಲ್ಪಿಜಿ ಬಿಕ್ಕಟ್ಟು
ಈ ಬಿಕ್ಕಟ್ಟಿನ ಸಂದರ್ಭದಲ್ಲಿ ಎಲ್ಪಿಜಿ ವಿತರಣೆ ನಿರ್ವಹಿಸಲು ಕೇಂದ್ರ ಸರ್ಕಾರವು ಎಸ್ಮಾ (ESMA) ಜಾರಿಗೊಳಿಸಿದೆ. ಕರ್ನಾಟಕದಲ್ಲೂ ಎಸ್ಮಾ ಜಾರಿಯಲ್ಲಿದೆ. ಕರ್ನಾಟಕದಲ್ಲಿ ವಾಣಿಜ್ಯ ಉಪಯೋಗಿ ಸಿಲಿಂಡರ್ಗಾಗಿ 8 ಸಾವಿರ ಗ್ರಾಹಕರಿದ್ದಾರೆ. ಸಾಮಾನ್ಯ ದಿನಗಳಲ್ಲಿ ನಿತ್ಯವೂ 850 ಸಿಲಿಂಡರ್ ಬೇಡಿಕೆ ಇರುತ್ತದೆ. ಈಗ ಕೃತಕ ಅಭಾವ ಸೃಷ್ಟಿಯಾಗಿದೆ. ಆದ್ದರಿಂದ ವಾಣಿಜ್ಯ ಉಪಯೋಗಿ ಬದಲು ಗೃಹಬಳಕೆ ಸಿಲಿಂಡರ್ ಪೂರೈಕೆಗೆ ಮೊದಲ ಆದ್ಯತೆ ನೀಡಲಾಗಿದೆ.
ಆದ್ಯತೆ ಹೇಗಿದೆ?
* ದೇಶೀಯ PNG ಬಳಕೆದಾರರಿಗೆ ಹೆಚ್ಚಿನ ಆದ್ಯತೆ ನೀಡಲಾಗುತ್ತದೆ.
* ಸಾರಿಗೆಗಾಗಿ CNG ನಂತರ ಬರುತ್ತದೆ.
* ವಾಣಿಜ್ಯ PNG ಪೂರೈಕೆಯನ್ನು ಸುಮಾರು 30% ರಷ್ಟು ಕಡಿಮೆ ಮಾಡಲಾಗಿದೆ.
ನೈಸರ್ಗಿಕ ಅನಿಲವನ್ನು ಬಳಸುವ ಕೈಗಾರಿಕೆಗಳು ಪ್ರೋಪೇನ್ ಅಥವಾ ಕಲ್ಲಿದ್ದಲಿನಂತಹ ಪರ್ಯಾಯಗಳಿಗೆ ಬದಲಾಗಬಹುದು. ಆದಾಗ್ಯೂ, LPG ಬಳಸುವ ವ್ಯವಹಾರಗಳು ಬಹಳ ಸೀಮಿತ ಪರ್ಯಾಯಗಳನ್ನು ಹೊಂದಿವೆ. ಸೌದೆ ಒಲೆ ಅಡುಗೆಗೆ ಹೋಟೆಲ್ಗಳು ಮುಂದಾಗಿವೆ. ಆದರೆ, ರೆಸ್ಟೋರೆಂಟ್ಗಳು, ಸ್ಟಾರ್ ಹೋಟೆಲ್ಗಳು ಅದನ್ನೇ ಹೆಚ್ಚಾಗಿ ಅವಲಂಬಿಸಲು ಸಾಧ್ಯವಾಗುವುದಿಲ್ಲ.
PNG ಬಳಕೆದಾರರಿಗಿಲ್ಲ ಚಿಂತೆ, ಯಾಕೆ?
ಯುದ್ಧದ ಬಿಕ್ಕಟ್ಟಿನ ಸಂದರ್ಭದಲ್ಲೂ ಪಿಎನ್ಜಿ ಪೂರೈಕೆಯಲ್ಲಿ ಯಾವುದೇ ತೊಂದರೆಯಾಗಿಲ್ಲ. ಏಕೆಂದರೆ,
* ಕೊಳವೆ ಮೂಲಕ ವಿತರಣೆ: ಪಿಎನ್ಜಿ ಪೈಪ್ಲೈನ್ಗಳ ಮೂಲಕ ನಿರಂತರವಾಗಿ ಹರಿಯುತ್ತದೆ. ಸಿಲಿಂಡರ್ ಲಾಜಿಸ್ಟಿಕ್ಸ್ ಮೇಲಿನ ಅವಲಂಬನೆಯನ್ನು ಕಡಿಮೆ ಮಾಡುತ್ತದೆ.
* ದೇಶೀಯ ಉತ್ಪಾದನೆ: ಭಾರತದ ನೈಸರ್ಗಿಕ ಅನಿಲ ಬೇಡಿಕೆಯ ಅರ್ಧದಷ್ಟು ದೇಶೀಯ ಮೂಲಗಳ ಮೂಲಕ ಪೂರೈಸಲ್ಪಡುತ್ತದೆ.
* ಹಲವು ದೇಶಗಳಿಂದ ಆಮದು: ನೈಸರ್ಗಿಕ ಅನಿಲ ಆಮದುಗಳು ಕೇವಲ ಒಂದು ದೇಶಕ್ಕೆ ಸೀಮಿತವಾಗಿಲ್ಲ. ವಿವಿಧ ದೇಶಗಳಿಂದ ಆಮದಾಗುತ್ತದೆ.
* ಸರ್ಕಾರಿ ಆದ್ಯತೆ: ಪೂರೈಕೆ ವ್ಯವಸ್ಥೆಯಲ್ಲಿ ದೇಶೀಯ PNG ಬಳಕೆದಾರರಿಗೆ ಆದ್ಯತೆ ನೀಡಲಾಗುತ್ತದೆ.
ಭಾರತಕ್ಕೆ ಪೆಟ್ಟು ಯಾಕೆ?
ಭಾರತವು ಇನ್ನೂ ತನ್ನ ನೈಸರ್ಗಿಕ ಅನಿಲ ಅಗತ್ಯಗಳಲ್ಲಿ ಸುಮಾರು 50% ಅನ್ನು ಆಮದು ಮಾಡಿಕೊಳ್ಳುತ್ತದೆ. ಭೌಗೋಳಿಕ ರಾಜಕೀಯ ಉದ್ವಿಗ್ನತೆ ಉಂಟಾದರೆ ಅಥವಾ LNG ಪೂರೈಕೆಯಲ್ಲಿ ಅಡಚಣೆಯಾದರೆ, ದೇಶೀಯ ಲಭ್ಯತೆಯನ್ನು ಸ್ಥಿರವಾಗಿಡಲು ಅಧಿಕಾರಿಗಳು ವಾಣಿಜ್ಯ ಅನಿಲ ಪೂರೈಕೆಯನ್ನು ಕಡಿತಗೊಳಿಸಬೇಕಾಗುತ್ತದೆ. ‘ನಾವು ನೈಸರ್ಗಿಕ ಅನಿಲದಲ್ಲಿ ಸಂಪೂರ್ಣವಾಗಿ ಸ್ವಾವಲಂಬಿಯಾಗಿಲ್ಲ. ಭವಿಷ್ಯದ ಬೇಡಿಕೆಯನ್ನು ಪೂರೈಸಲು ಆಮದುಗಳು ಇನ್ನೂ ಅಗತ್ಯವಾಗಿರುತ್ತದೆ’ ಎನ್ನುತ್ತಾರೆ GAIL ನ ಹಿರಿಯ ಅಧಿಕಾರಿ. ಇದನ್ನೂ ಓದಿ: ಎಲ್ಪಿಜಿ ಸಿಲಿಂಡರ್ಗಳ ಕೃತಕ ಅಭಾವ – ಬುಕ್ಕಿಂಗ್ ಅವಧಿಯನ್ನು 21ರಿಂದ 25 ದಿನಕ್ಕೆ ಹೆಚ್ಚಿಸಿದ ಕೇಂದ್ರ
ಭಾರತಕ್ಕಿದು ಪಾಠ?
ಭಾರತಕ್ಕೆ ಈಗ ಎದುರಾಗಿರುವ LPG ಬಿಕ್ಕಟ್ಟು, PNG ಮೂಲಸೌಕರ್ಯದ ತ್ವರಿತ ವಿಸ್ತರಣೆಯ ಅಗತ್ಯವನ್ನು ಒತ್ತಿಹೇಳುತ್ತದೆ. ಪೈಪ್ಲೈನ್ ಜಾಲಗಳನ್ನು ಹೆಚ್ಚಿಸುವುದು, ದೇಶೀಯ ಅನಿಲ ಉತ್ಪಾದನೆಯನ್ನು ಹೆಚ್ಚಿಸುವುದು, ಆಮದು ಮಾಡಿಕೊಂಡ LPG ಮೇಲಿನ ಅವಲಂಬನೆಯನ್ನು ಕಡಿಮೆ ಮಾಡುವುದರಿಂದ ಭಾರತದ ಇಂಧನ ವ್ಯವಸ್ಥೆಯು ಬಲಗೊಳ್ಳಬಹುದು. ದೇಶಾದ್ಯಂತ PNG ಸಂಪರ್ಕವನ್ನು ವಿಸ್ತರಿಸುವುದರಿಂದ LPG ಪೂರೈಕೆಯ ಮೇಲಿನ ಒತ್ತಡ ಕಡಿಮೆಯಾಗುತ್ತದೆ. ಜೊತೆಗೆ ಇಂಧನ ಸುರಕ್ಷತೆಯನ್ನು ಹೆಚ್ಚಿಸುತ್ತದೆ ಎಂಬುದನ್ನು ಈ ಪರಿಸ್ಥಿತಿ ನೆನಪಿಸುತ್ತದೆ ಎಂಬುದು ತಜ್ಞರ ಅಭಿಪ್ರಾಯ.
