ಆಧುನಿಕ ಜೀವನಶೈಲಿಯು ಮನುಷ್ಯನ ಆರೋಗ್ಯದ ಮೇಲೆ ನಾನಾ ಪರಿಣಾಮಗಳನ್ನು ಬೀರುತ್ತಿದೆ. ಉತ್ತಮ ಆರೋಗ್ಯಕ್ಕೆ ನಿಗದಿತ ದೈಹಿಕ ಚಟುವಟಿಕೆ ಮತ್ತು ವ್ಯಾಯಾಮ ಅತ್ಯಗತ್ಯ. ಆದರೆ, ಒತ್ತಡದ ಬದುಕು, ಆಲಸ್ಯ ಮನೋಭಾವದಿಂದ ಮನುಷ್ಯ ಆರೋಗ್ಯ ಸುಲಭ ಮಾರ್ಗಗಳನ್ನು ಅನುಸರಿಸುತ್ತಿದ್ದಾನೆ. ವೈದ್ಯಕೀಯ ವಲಯದಲ್ಲಿ ಅದಕ್ಕೆ ಪೂರಕವಾದ ಚಿಕಿತ್ಸೆ, ಔಷಧಿಗಳು ಹೊರಬರುತ್ತಿವೆ. ಇವುಗಳ ಮೇಲಿನ ಅವಲಂಬನೆ ಕೂಡ ಹೆಚ್ಚಾಗುತ್ತಿದೆ. ಈಗಿನ ದಿನಮಾನಗಳಲ್ಲಿ ಜನರನ್ನು ಹೆಚ್ಚಾಗಿ ಬಾಧಿಸುತ್ತಿರುವುದು ಶುಗರ್ ಮತ್ತು ಬೊಜ್ಜುತನ. ದಿಲ್ಲಿಯಿಂದ ಹಳ್ಳಿವರೆಗೆ, ಶ್ರೀಮಂತನಿಂದ ಬಡವನವರೆಗೆ ಸಕ್ಕರೆ ಕಾಯಿಲೆ ತಲುಪಾಗಿದೆ. ಅಂತೆಯೇ, ದೊಡ್ಡವರಿಂದ ಚಿಕ್ಕ ಮಕ್ಕಳವರೆಗೆ ಬೊಜ್ಜು ಆವರಿಸಿಕೊಂಡಿದೆ. ಇವೆರಡೂ ಗಂಭೀರ ಆರೋಗ್ಯ ಸಮಸ್ಯೆಗಳನ್ನು ತಂದೊಡ್ಡುತ್ತಿದ್ದು, ನಿಭಾಯಿಸುವುದು ಕಷ್ಟಕರ ಎನಿಸಿದೆ.
ಓಝೆಂಪಿಕ್ಸ್ ಟ್ರೆಂಡ್
ಇತ್ತೀಚಿನ ವರ್ಷಗಳಲ್ಲಿ ಓಝೆಂಪಿಕ್ (Ozempic) ಸಖತ್ ಟ್ರೆಂಡಿಂಗ್ ಆಗಿದೆ. ಮೆಡಿಕಲ್ನಲ್ಲಿ ಹೊಸ ಅಲೆ ಸೃಷ್ಟಿಸುತ್ತಿರುವ GLP-1 ಅಗೋನಿಸ್ಟ್ ಆಗಿರುವ ಓಝೆಂಪಿಕ್ ಅನ್ನು ಭಾರತದಲ್ಲೂ ಪರಿಚಯಿಸಲಾಗಿದೆ. ಈ ಹೊಸ ಚಿಕಿತ್ಸೆಯು ನೈಸರ್ಗಿಕ ಕರುಳಿನ ಹಾರ್ಮೋನ್ ಅನ್ನು ಅನುಕರಿಸುತ್ತದೆ. ಟೈಪ್ 2 ಮಧುಮೇಹ ಮತ್ತು ಬೊಜ್ಜುತನವನ್ನು ನಿರ್ವಹಿಸಲು ನೂತನ ವಿಧಾನವನ್ನು ಒದಗಿಸುತ್ತದೆ. ಇನ್ಸುಲಿನ್ ಉತ್ಪಾದನೆಯನ್ನು ಹೆಚ್ಚಿಸುವ ಮತ್ತು ಗ್ಲುಕಗನ್ ಮಟ್ಟವನ್ನು ಕಡಿಮೆ ಮಾಡುವ ಮೂಲಕ ಇದು ರಕ್ತದಲ್ಲಿನ ಸಕ್ಕರೆಯನ್ನು ಸ್ಥಿರಗೊಳಿಸಲು ಸಹಾಯ ಮಾಡುತ್ತದೆ. ಜೊತೆಗೆ, ಇದು ಜೀರ್ಣಕ್ರಿಯೆಯನ್ನು ನಿಧಾನಗೊಳಿಸುತ್ತದೆ. ನಿಮ್ಮ ಮೆದುಳಿಗೆ ಎಚ್ಚರಿಕೆ ನೀಡುವ ಮೂಲಕ ನೀವು ದೀರ್ಘಕಾಲದ ವರೆಗೆ ತೃಪ್ತಿಯನ್ನು ಅನುಭವಿಸಲು ಸಹಾಯ ಮಾಡುತ್ತದೆ. ಟೈಪ್ 2 ಮಧುಮೇಹ ಮತ್ತು ಬೊಜ್ಜುತನಕ್ಕೆ ಚಿಕಿತ್ಸೆ ನೀಡುವ ವಿಧಾನವನ್ನೇ ಓಝೆಂಪಿಕ್ ಬದಲಾಯಿಸಿದೆ. ನೈಸರ್ಗಿಕ ಕರುಳಿನ ಹಾರ್ಮೋನ್ ಅನ್ನು ಇದು ಅನುಕರಿಸುತ್ತದೆ. ರಕ್ತದಲ್ಲಿನ ಸಕ್ಕರೆ, ಹಸಿವು ಮತ್ತು ದೀರ್ಘಕಾಲೀನ ಚಯಾಪಚಯ ಆರೋಗ್ಯದ ಮೇಲೆ ನಿಯಂತ್ರಣವನ್ನು ಮರಳಿ ಪಡೆಯಲು ಇದು ಸಹಕಾರಿ ಎಂದು ವೈದ್ಯಕೀಯ ವಲಯ ತಿಳಿಸಿದೆ.
ಏನಿದು ಓಝೆಂಪಿಕ್?
ಓಝೆಂಪಿಕ್ ಎಂಬುದು ಸೆಮಾಗ್ಲುಟೈಡ್ ಎಂಬ ಅಂಶ ಹೊಂದಿರುವ ಪ್ರಿಸ್ಕ್ರಿಪ್ಷನ್ ಔಷಧಿಯಾಗಿದೆ.
ಯಾರ ಬಳಕೆಗೆ ಈ ಔಷಧಿ?
ಪ್ರಾಥಮಿಕವಾಗಿ ಟೈಪ್ 2 ಮಧುಮೇಹ ಹೊಂದಿರುವ ವಯಸ್ಕರಿಗೆ ಚಿಕಿತ್ಸೆ ನೀಡಲು ಅನುಮೋದಿಸಲಾಗಿದೆ. ವಾರಕ್ಕೊಮ್ಮೆ ನೀಡಲಾಗುವ ಈ ಇಂಜೆಕ್ಷನ್ ರಕ್ತದಲ್ಲಿನ ಸಕ್ಕರೆಯನ್ನು ನಿರ್ವಹಿಸಲು ಸಹಾಯ ಮಾಡುತ್ತದೆ. ಹೃದಯಾಘಾತ ಅಥವಾ ಪಾರ್ಶ್ವವಾಯುವಿನಂತಹ ಪ್ರಮುಖ ಹೃದಯ ಸಂಬಂಧಿ ಸಮಸ್ಯೆಗಳ ಅಪಾಯವನ್ನು ಕಡಿಮೆ ಮಾಡುತ್ತದೆ.
ಮೊದಲು ಅನುಮೋದಿಸಿದ್ದು ಯಾರು?
ಓಝೆಂಪಿಕ್ (ಚುಚ್ಚುಮದ್ದು ರೂಪದ ಸೆಮಗ್ಲುಟೈಡ್) ಅನ್ನು ಮೊದಲು 2017ರ ಡಿಸೆಂಬರ್ನಲ್ಲಿ ಯು.ಎಸ್. ಆಹಾರ ಮತ್ತು ಔಷಧ ಆಡಳಿತ (ಎಫ್ಡಿಎ) ಅನುಮೋದಿಸಿತು.
ಭಾರತದಲ್ಲಿ ಲಾಂಚ್ ಆಗಿದ್ದು ಯಾವಾಗ?
2025ರ ಡಿಸೆಂಬರ್ 12 ರಂದು ಭಾರತದಲ್ಲಿ ಓಝೆಂಪಿಕ್ ಅನ್ನು ನೊವೊ ನಾರ್ಡಿಸ್ಕ್ (ಹೆಲ್ತ್ ಕೇರ್ ಕಂಪನಿ) ಬಿಡುಗಡೆ ಮಾಡಿದೆ.
ದರ ಎಷ್ಟು?
ವಾರಕ್ಕೆ 0.25 ಮಿಗ್ರಾಂ ಡೋಸ್ಗೆ 2,180 ರೂ. ಬೆಲೆ ನಿಗದಿಪಡಿಸಲಾಗಿದೆ. ತಿಂಗಳಿಗೆ ಡೋಸೇಜ್ಗೆ 8,800 ರಿಂದ 11,175 ರೂ. ವರೆಗೆ ಬೆಲೆ ಇದೆ.
ವಿಶೇಷತೆ ಏನು?
ಓಝೆಂಪಿಕ್ GLP-1 ರಿಸೆಪ್ಟರ್ ಅಗೊನಿಸ್ಟ್ಗಳು ಎಂಬ ಔಷಧಿಗಳ ಗುಂಪಿಗೆ ಸೇರಿದೆ. ದೇಹದ GLP-1 ಹಾರ್ಮೋನ್ ಅನ್ನು ಅನುಕರಿಸುವ ಔಷಧಿಗಳು. ಈ ಹಾರ್ಮೋನ್ ದೇಹದಲ್ಲಿ ಹೇಗೆ ವರ್ತಿಸುತ್ತದೆ ಎಂಬುದನ್ನು ಓಝೆಂಪಿಕ್ ಅರ್ಥಮಾಡಿಕೊಳ್ಳುತ್ತದೆ.
ಔಷಧಿ ಹೇಗೆ ಕೆಲಸ ಮಾಡುತ್ತೆ?
ಓಝೆಂಪಿಕ್ ಎಂಬುದು ಸೆಮಾಗ್ಲುಟೈಡ್ ಅನ್ನು ಒಳಗೊಂಡಿರುವ ಪ್ರಿಸ್ಕ್ರಿಪ್ಷನ್ ಔಷಧಿಯ ಹೆಸರು. ನಾವು ಏನನ್ನಾದರು ತಿಂದ ನಂತರ ಕರುಳು ಬಿಡುಗಡೆ ಮಾಡುವ ಹಾರ್ಮೋನ್ GLP-1 ನಂತೆ ಇದು ವರ್ತಿಸುತ್ತದೆ. ಸೆಮಾಗ್ಲುಟೈಡ್ ಎಂಬುದು ಸಕ್ಕರೆ ಕಾಯಿಲೆ ಹೊಂದಿರುವ ಜನರು ತಮ್ಮ ರಕ್ತದಲ್ಲಿನ ಸಕ್ಕರೆ ಮಟ್ಟವನ್ನು ಕಡಿಮೆ ಮಾಡುವ ಮೂಲಕ ಟೈಪ್ 2 ಮಧುಮೇಹವನ್ನು ನಿರ್ವಹಿಸಲು ಸಹಾಯ ಮಾಡುವ ಔಷಧಿ. GLP-1 ದೇಹ ಜೀರ್ಣಕ್ರಿಯೆಯನ್ನು ನಿಧಾನಗೊಳಿಸಲು, ಹಸಿವನ್ನು ನಿರ್ವಹಿಸಲು ಮತ್ತು ಸರಿಯಾದ ಸಮಯದಲ್ಲಿ ಇನ್ಸುಲಿನ್ ಬಿಡುಗಡೆ ಮಾಡಲು ಸಂಕೇತಿಸುತ್ತದೆ. ಓಝೆಂಪಿಕ್ ಈ ನೈಸರ್ಗಿಕ ಸಿಗ್ನಲ್ ವ್ಯವಸ್ಥೆಯನ್ನು ಉತ್ತಮಗೊಳಿಸುತ್ತದೆ. ಅದನ್ನು ದೀರ್ಘಕಾಲದವರೆಗೆ ಸಕ್ರಿಯವಾಗಿರಿಸುತ್ತದೆ. ಈ ಅನುಕರಣೆಯು ಮಧುಮೇಹ ನಿಯಂತ್ರಣ ಮತ್ತು ದೇಹದ ತೂಕ ನಷ್ಟ ಎರಡಕ್ಕೂ ಹೇಗೆ ಸಹಾಯ ಮಾಡುತ್ತದೆ ಎಂಬುದಕ್ಕೆ ಅಡಿಪಾಯವಾಗಿದೆ ಎಂದು ಹಾರ್ವರ್ಡ್ ಹೆಲ್ತ್ ತಿಳಿಸಿದೆ.
ರಕ್ತದಲ್ಲಿನ ಸಕ್ಕರೆಯ ಮೇಲೆ ನಿಯಂತ್ರಣ ಹೇಗೆ?
ಟೈಪ್ 2 ಮಧುಮೇಹದಲ್ಲಿ ದೇಹವು ರಕ್ತಪ್ರವಾಹದಿಂದ ಜೀವಕೋಶಗಳಿಗೆ ಸಕ್ಕರೆಯನ್ನು ಸಾಗಿಸಲು ಹೆಣಗಾಡುತ್ತದೆ. ಓಝೆಂಪಿಕ್ ಇದನ್ನು ಸರಿಪಡಿಸಲು ಸಹಾಯ ಮಾಡುತ್ತದೆ. ಎಲ್ಲಾ ಸಮಯದಲ್ಲೂ ಅಲ್ಲ, ಸಕ್ಕರೆ ಹೆಚ್ಚಾದಾಗ ಮಾತ್ರ ಇನ್ಸುಲಿನ್ ಹೆಚ್ಚಿಸುವುದು. ಸಕ್ಕರೆ ಮಟ್ಟವನ್ನು ಹೆಚ್ಚಿಸುವ ಹಾರ್ಮೋನ್ ಗ್ಲುಕಗನ್ ಅನ್ನು ಕಡಿಮೆ ಮಾಡುವುದು. ಈ ಔಷಧಿ ರಕ್ತದಲ್ಲಿನ ಸಕ್ಕರೆ ಹೆಚ್ಚಾದಾಗ ಇನ್ಸುಲಿನ್ ಬಿಡುಗಡೆಗೆ ಉತ್ತೇಜಿಸಲು ಸಹಾಯ ಮಾಡುತ್ತದೆ. ಯಕೃತ್ತು ಬಿಡುಗಡೆ ಮಾಡುವ ಸಕ್ಕರೆ ಪ್ರಮಾಣವನ್ನು ನಿಯಂತ್ರಿಸುತ್ತದೆ.
ಜನರಿಗೆ ಬೇಗನೆ ಹೊಟ್ಟೆ ತುಂಬಿದ ಅನುಭವ ನೀಡುತ್ತಾ?
ಓಝೆಂಪಿಕ್ ಹಸಿವಿನ ಮೇಲೆ ಪ್ರಭಾವ ಬೀರುತ್ತದೆ. ಹೇಗೆಂದರೆ, GLP-1 ಸಂಕೇತಗಳು ನೇರವಾಗಿ ಮೆದುಳಿನ ಹಸಿವಿನ ಕೇಂದ್ರಗಳಿಗೆ ಹೋಗಿ, ದೇಹಕ್ಕೆ ಸಾಕಷ್ಟು ಆಹಾರವನ್ನು ಸೇವಿಸಲಾಗಿದೆ ಎಂದು ತಿಳಿಸುತ್ತವೆ. ಅವು ಹೊಟ್ಟೆ ಖಾಲಿಯಾಗುವುದನ್ನು ನಿಧಾನಗೊಳಿಸುತ್ತವೆ. ಅಂದರೆ, ಊಟವು ಹೊಟ್ಟೆಯಲ್ಲಿ ಹೆಚ್ಚು ಸಮಯ ಇರುತ್ತದೆ. ಹೆಚ್ಚು ಸಮಯದವರೆಗೆ ಹಸಿವನ್ನು ದೂರವಿಡುತ್ತದೆ. ಆಗ ಜನರು ಅನಗತ್ಯವಾಗಿ ಆಹಾರ ಸೇವನೆ ಕ್ರಮದಿಂದ ದೂರಾಗಿ, ನಿಗದಿತ ಪ್ರಮಾಣದಲ್ಲಿ ತಿನ್ನಲು ಪ್ರಾರಂಭಿಸುತ್ತಾರೆ. ಹಾರ್ವರ್ಡ್ ಹೆಲ್ತ್ ವರದಿಯ ಪ್ರಕಾರ, ಕೆಲವು GLP-1 ಔಷಧಿಗಳು ಒಂದು ವರ್ಷದಲ್ಲಿ ದೇಹದ ತೂಕದಲ್ಲಿ 10-20% ರಷ್ಟು ಇಳಿಕೆಗೆ ಕಾರಣವಾಗಬಹುದು ಎಂದು ತಿಳಿಸಿದೆ.
ಶುಗರ್ & ಬೊಜ್ಜಿನಿಂದ ರಕ್ಷಣೆ
GLP-1 ಔಷಧಿಗಳಿಂದ ಹಲವಾರು ಪ್ರಯೋಜನಗಳಿವೆ ಎಂದು ಹಾರ್ವರ್ಡ್ ಹೆಲ್ತ್ ಹೇಳುತ್ತದೆ.
ಹೃದಯ ರಕ್ಷಣೆ: ಹೃದಯಾಘಾತ ಮತ್ತು ಪಾರ್ಶ್ವವಾಯುವಿನ ಕಡಿಮೆ ಸಾಧ್ಯತೆಗಳು.
ಕಿಡ್ನಿಗೆ ಸಹಾಯಕ: ಮಧುಮೇಹಿಗಳಲ್ಲಿನ ಮೂತ್ರಪಿಂಡ ಹಾನಿ ಕಡಿಮೆ ಮಾಡುತ್ತದೆ.
ಮಿದುಳಿನ ಆರೋಗ್ಯ ಸಾಮರ್ಥ್ಯ: ಅರಿವಿನ ಕೊರತೆ ವಿರುದ್ಧ ರಕ್ಷಣೆ.
ಯಕೃತ್ತಿನ ಪ್ರಯೋಜನಗಳು: MASLD/MASH ಗಾಗಿ ಯಕೃತ್ತಿನ ಕೊಬ್ಬಿನಲ್ಲಿ ಕಡಿತ ಮಾಡುತ್ತದೆ.
ಸೈಡ್ ಎಫೆಕ್ಟ್ಸ್ ಏನು?
ಹೆಚ್ಚಿನ ಜನರ ದೇಹಕ್ಕೆ ಓಝೆಂಪಿಕ್ ಹೊಂದಿಕೊಳ್ಳಲು ಸಮಯ ತೆಗೆದುಕೊಳ್ಳುತ್ತದೆ. ಇದನ್ನು ತೆಗೆದುಕೊಳ್ಳುವುದರಿಂದ ಆರಂಭಿಕ ಅಡ್ಡಪರಿಣಾಮಗಳಿವೆ ಎಂದು ಹಾರ್ವರ್ಡ್ ಹೆಲ್ತ್ ಹೇಳುತ್ತದೆ. ವಾಕರಿಕೆ, ವಾಂತಿ, ಮಲಬದ್ಧತೆ, ಅತಿಸಾರ, ಹೊಟ್ಟೆಯ ಅಸ್ವಸ್ಥತೆ ಕಂಡುಬರುತ್ತದೆ. ತಲೆತಿರುಗುವಿಕೆ, ತಲೆನೋವು, ಸ್ವಲ್ಪ ಆಯಾಸ ಮತ್ತು ಇಂಜೆಕ್ಷನ್ ಹಾಕುವ ಜಾಗದಲ್ಲಿ ಕೆಂಪಾಗುವುದು ಸೇರಿದಂತೆ ಕೆಲವು ಸಾಮಾನ್ಯ ಅಡ್ಡಪರಿಣಾಮಗಳಾಗುತ್ತವೆ.
ಈ ಸಮಸ್ಯೆ ತುಂಬಾ ಕಡಿಮೆಯಿದ್ದರೂ ಸಂಭವ ಸಾಧ್ಯತೆ
ಅಪಧಮನಿಯ ಉರಿಯೂತ, ಪಿತ್ತಕೋಶದ ಸಮಸ್ಯೆಗಳು, ತ್ವರಿತ ತೂಕ ಇಳಿಕೆ ಸಮಯದಲ್ಲಿ ಸ್ನಾಯು ಸಮಸ್ಯೆ, ಥೈರಾಯ್ಡ್ ಗೆಡ್ಡೆಗಳ ಬಗ್ಗೆ ಇರಬೇಕು ಕಾಳಜಿ (ಪ್ರಾಣಿಗಳಲ್ಲಿ ಕಂಡುಬರುತ್ತದೆ, ಮಾನವರಲ್ಲಿ ದೃಢೀಕರಿಸಲಾಗಿಲ್ಲ).
ಯಾರು ತೆಗೆದುಕೊಳ್ಳಬಾರದು?
ತೀವ್ರ ಕರುಳಿನ ಸಮಸ್ಯೆ ಹೊಂದಿರುವ ಜನರು, ಗರ್ಭಿಣಿಯರು ಮತ್ತು ಹಾಲುಣಿಸುವ ತಾಯಂದಿರು GLP-1 ಔಷಧಿಗಳನ್ನು ತೆಗೆದುಕೊಳ್ಳಬಾರದು.
ಔಷಧಿ ಈಗ ಎಷ್ಟು ಪ್ರಸ್ತುತ?
ಡಬ್ಲ್ಯೂಹೆಚ್ಒ 2023-24ರ ಅಂದಾಜಿನ ಪ್ರಕಾರ, ಭಾರತದಲ್ಲಿ 10.1 ಕೋಟಿ ಜನರು ಮಧುಮೇಹದಿಂದ ಬಳಲುತ್ತಿದ್ದಾರೆ. 13.6 ಕೋಟಿ ಜನರಿಗೆ ಪ್ರೀ-ಡಯಾಬಿಟಿಸ್ ಮತ್ತು 25.4 ಕೋಟಿ ಜನರಿಗೆ ಸ್ಥೂಲಕಾಯತೆ ಸಮಸ್ಯೆ ಇದೆ. ಇದರಿಂದ ಅನಾರೋಗ್ಯ ಸಮಸ್ಯೆಗಳು ತೀವ್ರಗೊಳ್ಳುತ್ತಿದ್ದು, ಸಾವುಗಳು ಸಂಭವಿಸುತ್ತಿವೆ. ಇಂತಹ ನಿರ್ಣಾಯಕ ಸಂದರ್ಭದಲ್ಲಿ ಓಝೆಂಪಿಕ್ ಬಿಡುಗಡೆಯಾಗಿದೆ.
ವೈದ್ಯರ ಸಲಹೆ ಏನು?
ಆದರೆ FDA ಸಂಯುಕ್ತ ಔಷಧಿಗಳ ಸುರಕ್ಷತೆ, ಶುದ್ಧತೆ ಅಥವಾ ಪರಿಣಾಮಕಾರಿತ್ವವನ್ನು ಪರಿಶೀಲಿಸುವುದಿಲ್ಲ. ಈ ಕಾರಣದಿಂದಾಗಿ, ಅಡ್ಡಪರಿಣಾಮಗಳು ಮತ್ತು ಡೋಸಿಂಗ್ ದೋಷಗಳು ವರದಿಯಾಗಿವೆ. ರೋಗಿಗಳು FDA-ಅನುಮೋದಿತ ಅಥವಾ ಅಧಿಕೃತವಾಗಿ ನಿರ್ವಹಿಸುತ್ತಿರುವ ಔಷಧಿಗಳನ್ನು ತೆಗೆದುಕೊಳ್ಳುವಂತೆ ಸೂಚಿಸಲಾಗಿದೆ. ಈಗ ನೊವೊ ನಾರ್ಡಿಸ್ಕ್ ಭಾರತದಲ್ಲಿ ವಿಶ್ವಾಸಾರ್ಹ ಪೂರೈಕೆ ಸರಪಳಿಯೊಂದಿಗೆ ಓಝೆಂಪಿಕ್ (ಚುಚ್ಚುಮದ್ದು ರೂಪದ ಸೆಮಾಗ್ಲುಟೈಡ್) ಅನ್ನು ಬಿಡುಗಡೆ ಮಾಡಿದೆ. ವೈದ್ಯರ ಸಲಹೆ, ಪ್ರಿಸ್ಕ್ರಿಪ್ಷನ್ ಮೇರೆಗೆ ಇದನ್ನು ಜನರು ತೆಗೆದುಕೊಳ್ಳಬೇಕು.
