ನವದೆಹಲಿ: ವೃದ್ಧೆಯೊಬ್ಬರು ತನ್ನ 107ನೇ ಹುಟ್ಟುಹಬ್ಬದಂದು ಎಐಸಿಸಿ ಅಧ್ಯಕ್ಷ ರಾಹುಲ್ ಗಾಂಧಿಯನ್ನ ಭೇಟಿಯಾಗಬಯಸಿದ್ದರು. ಇದನ್ನ ಅವರ ಮೊಮ್ಮಗಳು ಟ್ವಿಟ್ಟರ್ ಮೂಲಕ ಹಂಚಿಕೊಂಡಿದ್ದು, ತನ್ನ ಅಜ್ಜಿ ರಾಹುಲ್ ಗಾಂಧಿಯನ್ನ ಯಾಕೆ ಭೇಟಿಯಾಗಲು ಆಸೆ ಪಟ್ಟಿದ್ದಾರೆ ಎಂಬುದನ್ನೂ ತಿಳಿಸಿದ್ದರು. ಇದಕ್ಕೆ ರಾಹುಲ್ ಗಾಂಧಿ ಪ್ರತಿಕ್ರಿಯೆ ನೀಡಿದ್ದಾರೆ.
ಇವತ್ತು(ಸೋಮವಾರ) ನನ್ನ ಅಜ್ಜಿಗೆ 107ನೇ ಹುಟ್ಟುಹಬ್ಬ. ಅವರ ಒಂದೇ ಒಂದು ಆಸೆ ಎಂದರೆ ರಾಹುಲ್ ಗಾಂಧಿಯನ್ನ ಭೇಟಿಯಾಗುವುದು. ನಾನು ಯಾಕೆ ಎಂದು ಕೇಳಿದೆ. ಮೆಲುಧ್ವನಿಯಲ್ಲಿ, ಆತ ಹ್ಯಾಂಡ್ಸಮ್ ಆಗಿದ್ದಾನೆ ಎಂದ್ರು ಅಂತ ವೃದ್ಧೆಯ ಮೊಮ್ಮಗಳು ದೀಪಾಲಿ ಟ್ವೀಟ್ ಮಾಡಿದ್ದು, ಜೊತೆಗೆ ಹುಟ್ಟುಹಬ್ಬ ಆಚರಿಸಿಕೊಳ್ತಿರೋ ತನ್ನ ಅಜ್ಜಿಯ ಫೋಟೋವನ್ನೂ ಹಾಕಿದ್ದರು. ಇದನ್ನ ರಾಹುಲ್ ಗಾಂಧಿಗೆ ಟ್ಯಾಗ್ ಮಾಡಿದ್ದರು.
ಈ ಟ್ವೀಟ್ಗೆ ಕೆಲವೇ ಗಂಟೆಗಳಲ್ಲಿ ರಾಹುಲ್ ಗಾಂಧಿಯಿಂದ ಪ್ರತಿಕ್ರಿಯೆಯೂ ಸಿಕ್ಕಿದೆ. ಡಿಯರ್ ದೀಪಾಲಿ, ನಿಮ್ಮ ಸುಂದರವಾದ ಅಜ್ಜಿಗೆ ಹುಟ್ಟುಹಬ್ಬದ ಶುಭಾಶಯಗಳನ್ನು ತಿಳಿಸಿ ಜೊತೆಗೆ ಮೆರಿ ಕ್ರಿಸ್ಮಸ್. ನನ್ನ ಕಡೆಯಿಂದ ಆಕೆಗೆ ದೊಡ್ಡ ಅಪ್ಪುಗೆ ನೀಡಿ ಎಂದು ರಾಹುಲ್ ಟ್ವೀಟ್ ಮಾಡಿದ್ದಾರೆ.
ಆದ್ರೆ ಇಷ್ಟೇ ಅಲ್ಲ. ರಾಹುಲ್ ಅಂದು ಸಂಜೆ ಸ್ವತಃ ಕರೆ ಮಾಡಿ ತನ್ನ ಅಜ್ಜಿಗೆ ಶುಭಾಶಯ ಕೋರಿದ್ದಾಗಿ ದೀಪಾಲಿ ಮತ್ತೊಂದು ಟ್ವೀಟ್ ಮಾಡಿದ್ದಾರೆ.