ಒಂದು ದಿನದ ನವಜಾತ ಗಂಡು ಶಿಶು ಹಾವೇರಿಯ ಚರಂಡಿಯಲ್ಲಿ ಪತ್ತೆ

ಹಾವೇರಿ: ಆಗ ತಾನೆ ಜನಿಸಿದ ನವಜಾತ ಗಂಡು ಶಿಶು ಹಾವೇರಿ ನಗರದ ಪುರದ ಓಣಿಯ ಹಮ್ನಾಬಾದ್ ನಲ್ಲಿರುವ ಚರಂಡಿಯಲ್ಲಿ ಪತ್ತೆಯಾಗಿದೆ.

ಬೆಳಗ್ಗೆ ಚರಂಡಿಯಲ್ಲಿ ಹಂದಿಗಳು ಎಳೆದಾಡುವ ವೇಳೆ ಶಂಷಾದ್ ಗುತ್ತಲ ಎಂಬ ಮಹಿಳೆ ನವಜಾತ ಶಿಶುವನ್ನ ರಕ್ಷಣೆ ಮಾಡಿದ್ದಾರೆ. ಈಗ ಮಗುವನ್ನು ಜಿಲ್ಲಾಸ್ಪತ್ರೆಗೆ ದಾಖಲಿಸಿ ಚಿಕಿತ್ಸೆ ನೀಡಲಾಗುತ್ತಿದೆ. ಜಿಲ್ಲಾಸ್ಪತ್ರೆಯ ವೈದ್ಯರು ಐಸಿಯುನಲ್ಲಿ ದಾಖಲು ಮಾಡಿಕೊಂಡು ಶಿಶುವಿಗೆ ಚಿಕಿತ್ಸೆ ನೀಡುತ್ತಿದ್ದಾರೆ.

ನವಜಾತ ಶಿಶುವಿನ ತೂಕ 1 ಕೆ.ಜಿ 700 ಗ್ರಾಂ ತೂಕವಿದ್ದು, ಮಗು ಆರೋಗ್ಯವಾಗಿದೆ ಎನ್ನುವ ಮಾಹಿತಿ ಸಿಕ್ಕಿದೆ. ಜಿಲ್ಲಾ ಮಕ್ಕಳ ರಕ್ಷಣಾ ಘಟಕದ ಅಧಿಕಾರಿಗಳು ಭೇಟಿ ನೀಡಿ ಪರಿಶೀಲನೆ ನಡೆಸಿದ್ದಾರೆ. ಅಲ್ಲದೆ ನಗರ ಪೊಲೀಸರು ಭೇಟಿ ನೀಡಿ ಪರಿಶೀಲನೆ ನಡೆಸಿ ಪ್ರಕರಣವನ್ನ ದಾಖಲಿಸಿಕೊಂಡಿದ್ದಾರೆ. ಆದರೆ ಮಗುವನ್ನ ರಕ್ಷಣೆ ಮಾಡಿದ ಮಹಿಳೆ ಮಾತ್ರ ನನಗೆ ಮಗುವನ್ನ ನೀಡಿ ಎಂದು ಅಂಗಲಾಚಿದ್ದಾರೆ.

ಜನಿಸಿದ ಒಂದೇ ದಿನದಲ್ಲಿ ಮಗುವನ್ನ ಚರಂಡಿಗೆ ಎಸೆದ ನಿಷ್ಕರುಣಿ ತಾಯಿಗೆ ಜಿಲ್ಲಾಸ್ಪತ್ರೆಯಲ್ಲಿ ಸಾರ್ವಜನಿಕರು ಹಿಡಿಶಾಪ ಹಾಕಿದ್ದಾರೆ.