– ನಾಲ್ಕು ಬಾರಿ ಪ್ರೇಯಸಿ ತಲೆಗೆ ಬುಲೆಟ್ ಇಳಿಸಿದ್ದ
ನವದೆಹಲಿ: ನಾಲ್ಕು ಬಾರಿ ಪ್ರೇಯಸಿಯ ತಲೆಗೆ ಗುಂಡಿಕ್ಕಿ ಕೊಂದು ಬಾಡಿಗೆ ಕಾರಿನಲ್ಲಿ ಪರಾರಿಯಾಗಿ ನಂತರ ಕಾರು ಚಾಲಕನನ್ನು ಶೂಟ್ ಮಾಡಿದ್ದ ಅಂತಾರಾಷ್ಟ್ರೀಯ ಬಾಡಿ ಬಿಲ್ಡರ್ ನನ್ನು ಪೊಲೀಸರು ಅರೆಸ್ಟ್ ಮಾಡಿದ್ದಾರೆ.
ಅಂತಾರಾಷ್ಟ್ರೀಯ ಬಾಡಿ ಬಿಲ್ಡರ್ ಮತ್ತು ಜಿಮ್ ಒಂದರ ಮಾಲೀಕನಾಗಿದ್ದ ಹೇಮಂತ್ ಲಂಬಾ, 22 ವರ್ಷದ ತನ್ನ ಪ್ರೇಯಸಿಯನ್ನು ಡಿಸೆಂಬರ್ 7 ರಂದು ಹರ್ಯಾಣದ ರೇವಾರಿ ಎಂಬಲ್ಲಿ ತಲೆಗೆ ನಾಲ್ಕು ಬಾರಿ ಗುಂಡು ಹಾರಿಸಿ ಕೊಂದು ಮೃತದೇಹವನ್ನು ನಿರ್ಜನ ಪ್ರದೇಶದಲ್ಲಿ ಬಿಸಾಡಿ ಬಾಡಿಗೆ ಕಾರಿನಲ್ಲಿ ಪರಾರಿಯಾಗಿದ್ದ.
ಈ ವಿಚಾರದ ಬಗ್ಗೆ ಮಾಹಿತಿ ನೀಡಿದ್ದ ರೇವಾರಿ ಜಿಲ್ಲೆಯ ಡಿಎಸ್‍ಪಿ ಜಮ್ಮಲ್ ಖಾನ್, ಕೊಲೆಯಾದ ಸಂತ್ರಸ್ತೆ ರಾಜಸ್ಥಾನದ ಮೂಲದವಳಾಗಿದ್ದು, ದೆಹಲಿಯ ರೋಹಿಣಿಯಲ್ಲಿ ಸಂಬಂಧಿಕರ ಮನೆಯಲ್ಲಿ ತಂದೆಯ ಜೊತೆ ವಾಸಿಸುತ್ತಿದ್ದಳು, ಆಕೆಯ ಮರಣೋತ್ತರ ಪರೀಕ್ಷೆ ಮಾಡಿಸಲಾಗಿದೆ. ಘಟನೆಯಾದ ನಂತರ ಪರಾರಿಯಾಗಿದ್ದ ಹೇಮಂತ್ ಲಂಬಾನ ವಿರುದ್ಧ ಕೊಲೆ ಪ್ರಕರಣದ ದಾಖಲಾಗಿತ್ತು ಎಂದು ಹೇಳಿದ್ದರು.
ಸಂತ್ರಸ್ತೆಯನ್ನು ಕೊಲೆ ಮಾಡಿ ಬಾಡಿಗೆ ಕಾರಿನಲ್ಲಿ ಎಸ್ಕೇಪ್ ಆಗಿದ್ದ ಹೇಮಂತ್ ಲಂಬಾ ನಂತರ ಬಾಡಿಗೆ ಕಾರು ಚಾಲಕ ದೇವೇಂದ್ರನಿಗೆ ಗನ್ ತೋರಿಸಿ ಜೈಪುರಕ್ಕೆ ಕರೆದುಕೊಂಡು ಹೋಗು ಎಂದು ಹೇಳಿದ್ದಾನೆ. ಆದರೆ ಇದಕ್ಕೆ ಒಪ್ಪದ ಚಾಲಕ ದೇವೇಂದ್ರನನ್ನು ಸಹ ಶೂಟ್ ಮಾಡಿ ಕೊಲೆ ಮಾಡಿದ್ದಾನೆ. ನಂತರ ಆತನೇ ಕಾರನ್ನು ತೆಗೆದುಕೊಂಡು ಜೈಪುರಕ್ಕೆ ಹೋಗಿದ್ದಾನೆ.
ಆರೋಪಿಯನ್ನು ಹಿಡಿದು ಕೊಟ್ಟ ಕಾರ್ ಡೀಲರ್
ಕಾರ್ ಚಾಲಕನನ್ನು ಕೊಲೆ ಮಾಡಿ ಕಾರು ತೆಗೆದುಕೊಂಡು ಬಂದಿದ್ದ ಹೇಮಂತ್ ಲಂಬಾ ಜೈಪುರದಲ್ಲಿ ಸ್ಥಳೀಯ ಕಾರ್ ಡೀಲರ್ ಬಳಿ ಕಾರನ್ನು ಮಾರಲು ಹೋಗಿದ್ದಾನೆ. ಆದರೆ ಹೇಮಂತ್ ಲಂಬಾನ ನಡುವಳಿಕೆ ನೋಡಿ ಅನುಮಾನಗೊಂಡ ಕಾರು ವ್ಯಾಪಾರಿ ಅಲ್ಪೇಶ್ ಕಾರಿನ ಹಿಂಭಾಗದಲ್ಲಿ ಇದ್ದ ಫೋನ್ ನಂಬರ್ ಗೆ ಕರೆ ಮಾಡಿದ್ದಾರೆ. ಆಗ ಕರೆಯನ್ನು ಕಾರು ಚಾಲಕನ ಪತ್ನಿ ಸ್ವೀಕರಿಸಿದ್ದಾರೆ. ಇದರಿಂದ ಮತ್ತಷ್ಟು ಅನುಮಾನಗೊಂಡ ವ್ಯಾಪಾರಿ ಪೊಲೀಸರಿಗೆ ಮಾಹಿತಿ ನೀಡಿದ್ದಾರೆ. ಆಗ ತಕ್ಷಣ ಸ್ಥಳಕ್ಕೆ ಬಂದ ಪೊಲೀಸರು ಹೇಮಂತ್ ನನ್ನು ಬಂಧಿಸಿದ್ದಾರೆ.
