ಮಂಗಳೂರು: ನಗರದ ಪಣಂಬೂರು ಬೀಚ್ ನಲ್ಲಿ ಸೋಮವಾರ ಸಂಜೆ ಭಾರೀ ಸುಂಟರಗಾಳಿ ಕಾಣಿಸಿಕೊಂಡಿದ್ದು, ಖಗೋಳ ವಿಸ್ಮಯ ಕಂಡುಬಂದಿದೆ.
ಭಾರೀ ಸುಂಟರಗಾಳಿಯಿಂದ ಆಕಾಶದಲ್ಲಿ ಕಾರ್ಮುಗಿಲಿನ ನಡುವಿನಿಂದ ಸುರುಳಿ ಸುತ್ತುತ್ತಾ ಸಮುದ್ರಕ್ಕೆ ಇಳಿದ ಸುಂಟರಗಾಳಿ ಬಳಿಕ ದಡದತ್ತ ಸಾಗಿ ತನ್ನ ವೇಗವನ್ನು ಕಳೆದುಕೊಂಡಿತು. ದಡದತ್ತ ಪ್ರವೇಶಿಸುತ್ತಿದ್ದಂತೆ ವೇಗ ಕಳೆದುಕೊಂಡಿದ್ದರಿಂದ ಅದೃಷ್ಟವಶಾತ್ ಯಾವುದೇ ಹಾನಿ ಸಂಭವಿಸಿಲ್ಲ.
ಸಾಮಾನ್ಯವಾಗಿ ಮೋಡ ಹಾಗೂ ಭೂಮಿಯ ಸಂಪರ್ಕದೊಂದಿಗೆ ಮುನ್ನುಗ್ಗುವ ಸುಂಟರಗಾಳಿಗಳು ಅಪಾಯಕಾರಿಯಾಗಿವೆ. ಸಮುದ್ರದಲ್ಲಿ ಈ ಸುಂಟರಗಾಳಿಗಳ ಚಲನೆ ಅತೀ ವೇಗವಾಗಿದ್ದು, ದಡ ತಲುಪುತ್ತಿದ್ದಂತೆ ವೇಗ ಕುಗ್ಗಿ ಬಳಿಕ ಕಣ್ಮರೆಯಾಗುತ್ತವೆ. ಇನ್ನು ಎರಡು ಮೂರು ದಿನಗಳ ಕಾಲ ಕರಾವಳಿ ಮತ್ತು ಪಶ್ಚಿಮ ಘಟ್ಟಗಳಲ್ಲಿ ಭಾರೀ ಮಳೆ ಆಗಲಿದೆ ಎಂದು ಹವಾಮಾನ ಇಲಾಖೆ ಮುನ್ಸೂಚನೆ ನೀಡಿದೆ.
