ಮೈ ನೇಮ್ ಈಸ್ ಕಿರಾತಕ ಸದ್ಯಕ್ಕಿಲ್ಲ!

ಬೆಂಗಳೂರು: ಕೆ.ಜಿ.ಎಫ್. ಸಿನಿಮಾ ರಿಲೀಸಿಗೆ ರೆಡಿಯಾಗುತ್ತಿದ್ದಂತೇ ಯಶ್ ಸೈಲೆಂಟಾಗಿ ಒಂದು ಸಿನಿಮಾದಲ್ಲಿ ನಟಿಸಲು ಆರಂಭಿಸಿದ್ದರು. ಅದರ ಹೆಸರು ಮೈ ನೇಮ್ ಈಸ್ ಕಿರಾತಕ. ಈ ಚಿತ್ರಕ್ಕಾಗಿ ಹತ್ತು ದಿನಗಳ ಶೂಟಿಂಗ್ ಕೂಡಾ ನೆರವೇರಿತ್ತು. ಅಷ್ಟರಲ್ಲಿ ಕೆ.ಜಿ.ಎಫ್. ಪಬ್ಲಿಸಿಟಿ ಶುರುವಾಯ್ತು. ಕೆಜಿಎಫ್ ಭಾರತೀಯ ಚಿತ್ರರಂಗದಲ್ಲಿ ಬೇರೆ ರೀತಿಯಲ್ಲಿ ಹೆಸರು ಮಾಡಿತು. ಅಲ್ಲಿಗೆ ಮೈ ನೇಮ್ ಈಸ್ ಕಿರಾತಕ ಸ್ಥಗಿತಗೊಂಡಿತ್ತು.

ಕೆ.ಜಿ.ಎಫ್. ಹಿಟ್ ಅನ್ನಿಸಿಕೊಳ್ಳುತ್ತಿದ್ದಂತೇ ಯಶ್ ಕೆ.ಜಿ.ಎಫ್. ಚಾಪ್ಟರ್-2 ಗೆ ತಯಾರಾಗಲು ಶುರು ಮಾಡಿದರು. ಮೈ ನೇಮ್ ಈಸ್ ಕಿರಾತಕ ಸಿನಿಮಾಗಾಗಿ ಕತ್ತರಿಸಿದ್ದ ಕೂದಲು ಗಡ್ಡವನ್ನೆಲ್ಲಾ ಮತ್ತೆ ಬಿಡಲಾರಂಭಿಸಿದರು. ಅಷ್ಟೊತ್ತಿಗೆಲ್ಲಾ ಕಿರಾತಕ ಚಿತ್ರದ ನಿರ್ದೇಶಕ ಅನಿಲ್ ಕುಮಾರ್ ಧೀರೇನ್ ರಾಮ್ ಕುಮಾರ್ ಗಾಗಿ ದಾರಿ ತಪ್ಪಿದ ಮಗ ಸಿನಿಮಾವನ್ನು ಆರಂಭಿಸಿದರು. ಅಲ್ಲಿಗೆ ಮೈ ನೇಮ್ ಈಸ್ ಕಿರಾತಕ ಸಿನಿಮಾ ನಿಂತೇ ಹೋಯಿತು ಅನ್ನುವಷ್ಟರ ಮಟ್ಟಿಗೆ ಗಾಳಿ ಸುದ್ದಿ ಹರಡಿತ್ತು. ಈಗ ಸ್ವತಃ ಮೈ ನೇಮ್ ಈಸ್ ಕಿರಾತಕ ಚಿತ್ರದ ನಿರ್ದೇಶಕ ಅನಿಲ್ ಯಶ್ ಅವರನ್ನು ಭೇಟಿ ಮಾಡಿ ಬಂದಿದ್ದಾಗಿಯೂ, ಕೆ.ಜಿ.ಎಫ್.-2 ಮುಗಿದ ನಂತರ ತಮ್ಮ ಚಿತ್ರವನ್ನು ಆರಂಭಿಸುವುದಾಗಿ ಯಶ್ ಹೇಳಿದ್ದಾಗಿಯೂ ತಿಳಿಸಿದ್ದಾರೆ. ಅಲ್ಲಿಗೆ ಕಿರಾತಕ ಆರಂಭವಾಗಲು ಏನಿಲ್ಲವೆಂದರೂ ವರ್ಷ ಕಾಲ ಬೇಕೇಬೇಕು.