ಹಿಂದೂ ಮಹಿಳೆಯೊಂದಿಗೆ ಹೋಟೆಲಿಗೆ ಬಂದ ಮುಸ್ಲಿಂ ಯುವಕನ ಮೇಲೆ ಹಲ್ಲೆ

ಬಾರ್ಮರ್: ಮುಸ್ಲಿಂ ಯುವಕನೊಬ್ಬನನ್ನು ಹೊಟೇಲ್ ನಿಂದ ಹೊರಗಡೆ ಎಳೆದುಕೊಂಡು ಬಂದು ಗುಂಪೊಂದು ಹಲ್ಲೆ ಮಾಡಿರುವ ಘಟನೆ ರಾಜಸ್ತಾನದ ಬಾರ್ಮರ್ ಜಿಲ್ಲೆಯ ಬಲೋತ್ರ ಪ್ರದೇಶದಲ್ಲಿ ನಡೆದಿದೆ.

25 ವರ್ಷದ ಪದು ಖಾನ್ ಎಂಬ ಯುವಕ ಮಧ್ಯ ವಯಸ್ಸಿನ ಮಹಿಳೆಯೊಂದಿಗೆ ಸುಮಾರು 10 ಗಂಟೆಯ ವೇಳೆಗೆ ಹೊಟೇಲಿಗೆ ಬಂದಿದ್ದನು. ಮಹಿಳೆ ರಾಜಸ್ತಾನ ಸಂಪ್ರದಾಯದಂತೆ ಡ್ರೆಸ್ ಮಾಡಿದ್ದರು. ಅವರು ಬಂದು ಅರ್ಧ ಗಂಟೆಯಲ್ಲೇ ಮಹಿಳೆ ಬಂದಿರುವ ಮಾಹಿತಿ ಪಡೆದು ಆಕೆಯ 5 ಮಂದಿ ಸಂಬಂಧಿಕರು ಹೊಟೇಲಿಗೆ ನುಗ್ಗಿದ್ದಾರೆ ಅಂತ ಹೊಟೇಲ್ ಮಾಲೀಕ ಮುಲ್ತಾನ್ ಪರಿಹಾರ್ ತಿಳಿಸಿದ್ದಾರೆ.

ದಿಢೀರ್ ಆಗಿ ಐವರು ಹೊಟೇಲ್ ಗೆ ಬಂದಿರುವುದನ್ನು ಸಿಬ್ಬಂದಿಗಳು ನನಗೆ ತಿಳಿಸಿದ್ದಾರೆ. ಅಲ್ಲದೇ ಶಿವಸೇನಾ ಕಾರ್ಯಕರ್ತರು ಕೂಡ ಹೊಟೇಲಿನ ಹೊರಗಡೆ ಸೇರಿರುವ ಕುರಿತು ಮಾಹಿತಿ ನೀಡಿದ್ದಾರೆ. ಖಾನ್ ನನ್ನು ಹೊಟೇಲ್ ನಿಂದ ಹೊರಗಡೆ ಎಳೆದು ಹಲ್ಲೆ ಮಾಡಿದ್ದಾರೆ ಅಂತ ಅವರು ಹೇಳಿದ್ರು.

ಖಾನ್ ಮೇಲೆ ಹಲ್ಲೆ ಮಾಡುತ್ತಿದ್ದ ವೇಳೆ ಅವರೆಲ್ಲಾ `ಜೈ ಶ್ರೀ ರಾಮ್’ ಅಂತ ಪಠಿಸುತ್ತಿದ್ದರು. ಅಲ್ಲದೇ ಇದು ಲವ್-ಜಿಹಾದ್ ಕೇಸ್ ಅಂತಾನೂ ಹೇಳುತ್ತಿದ್ದರು ಅಂತ ಪರಿಹಾರ್ ನುಡಿದಿದ್ದಾರೆ.

ಮುಸ್ಲಿಂ ವ್ಯಕ್ತಿಯೊಬ್ಬ ಹಿಂದೂ ರಜಪೂತ ಮಹಿಳೆ ಜೊತೆ ಬಲೋತ್ರಾದಲ್ಲಿರೋ ಹೊಟೇಲ್ ಗೆ ಬಂದಿದ್ದರು. ಇವರು ಬಂದ ಕೆಲವೇ ಕ್ಷಣಗಳಲ್ಲಿ ಮಹಿಳೆಯ ಸಂಬಂಧಿಕರ ಗುಂಪೊಂದು ನೇರವಾಗಿ ಹೊಟೇಲಿನೊಳಗೆ ನುಗ್ಗಿ ಮುಸ್ಲಿಂ ವ್ಯಕ್ತಿ ಮೇಲೆ ಹಲ್ಲೆ ನಡೆಸಿದ್ದಾರೆ ಅಂತ ಬಾರ್ಮಾರ್ ನ ಎಡಿಎಸ್‍ಪಿ ಕೈಲಾಸ್ ಧನ್ ರಾಥ್ನೋ ಮಾಧ್ಯಮಕ್ಕೆ ತಿಳಿಸಿದ್ದಾರೆ.

ಘಟನೆಗೆ ಸಂಬಂಧಿಸಿದಂತೆ ಖಾನ್ ನನ್ನು ಬಾರ್ಮಾರ್ ಆಸ್ಪತ್ರೆಗೆ ದಾಖಲಿಸಿ ಪ್ರಥಮ ಚಿಕಿತ್ಸೆ ನೀಡಲಾಗಿದ್ದು, ಬಳಿಕ ಜೋಧಪುರ್ ದಲ್ಲಿರೋ ಆಸ್ಪತ್ರೆಗೆ ಕರೆದುಕೊಂಡು ಹೋಗಲಾಗಿದೆ ಅಂತ ಎಡಿಎಸ್‍ಪಿ ರಥ್ನೋ ತಿಳಿಸಿದ್ದಾರೆ.