ಅಚ್ಚರಿಯಾದ್ರೂ ಸತ್ಯ- 39ನೇ ವಯಸ್ಸಿಗೆ 38 ಮಕ್ಕಳನ್ನ ಹೆತ್ತ ಮಹಾತಾಯಿ

ಮರಿಯಾಮ್ ನಬಾಟಾಂಜಿ ಎಂಬ 39 ವರ್ಷದ ಮಹಿಳೆ ಬರೋಬ್ಬರಿ 38 ಮಕ್ಕಳನ್ನು ಪಡೆದಿದ್ದಾರೆ. ಉಗಾಂಡದ ನಿವಾಸಿಯಾಗಿರುವ ಮರಿಯಾಮ್ ಒಟ್ಟು 38 ಮಕ್ಕಳನ್ನು ಏಕಾಂಗಿಯಾಗಿ ಸಲಹುತ್ತಿದ್ದಾರೆ. ಮೂರು ವರ್ಷಗಳ ಹಿಂದೆ ಮರಿಯಾಮ್ ಳನ್ನು ಪತಿ ಬಿಟ್ಟು ಹೋಗಿದ್ದು, ಇದೀಗ ಎಲ್ಲ ಮಕ್ಕಳು ತಾಯಿಯ ಆರೈಕೆಯಲ್ಲಿವೆ.

12ನೇ ವಯಸ್ಸಿನಲ್ಲಿಯೇ ಸಾಂಸರಿಕ ಜೀವನಕ್ಕೆ ಕಾಲಿಟ್ಟ ಮರಿಯಾಮ್ ಐದಕ್ಕಿಂತ ಹೆಚ್ಚು ಹೆರಿಗೆಯಲ್ಲಿ ಅವಳಿ ಮಕ್ಕಳಿಗೆ ಜನ್ಮ ನೀಡಿದ್ದಾರೆ. ನಾಲ್ಕು ಬಾರಿ ತ್ರಿವಳಿ ಮತ್ತು ಐದು ಬಾರಿ 4 ಮಕ್ಕಳಿಗೆ ಜನ್ಮ ನೀಡಿದ್ದಾರೆ. ಸದ್ಯ ಉತ್ತರ ಕಂಪಾಲಾದಿಂದ 50 ಕಿ.ಮೀ. ದೂರದಲ್ಲಿರುವ ಕಾಫಿ ತೋಟಗಳ ಬಳಿಯ ಹಳ್ಳಿಯೊಂದರ ನಾಲ್ಕು ಪುಟ್ಟ ಮನೆಯಲ್ಲಿ ಮರಿಯಾಮ್ ವಾಸವಾಗಿದ್ದಾರೆ. ಮೊದಲಿಗೆ ಅವಳಿ ಮಕ್ಕಳಿಗೆ ಜನ್ಮ ನೀಡಿದಾಗ ಮರಿಯಾಮ್ ಸ್ಥಳೀಯ ವೈದ್ಯರೊಬ್ಬರನ್ನ ಸಂಪರ್ಕಿಸಿದ್ದರು. ಅಂಡಾಶಯ ಸಾಮನ್ಯ ಗಾತ್ರಕ್ಕಿಂತ ದೊಡ್ಡದಾಗಿದೆ. ಗರ್ಭ ನಿರೋಧಕ ಮಾತ್ರೆಗಳನ್ನು ತೆಗೆದುಕೊಳ್ಳುವದರಿಂದ ಆರೋಗ್ಯದ ಮೇಲೆ ಪರಿಣಾಮ ಬೀರುತ್ತೆ ಎಂದು ಹೇಳಿದ್ದರಂತೆ. ಅಂದಿನಿಂದ ಮಕ್ಕಳು ಬರತೊಡಗಿವೆ.

ಎರಡೂವರೆ ವರ್ಷಗಳ ಹಿಂದೆ ಕೊನೆಯ ಬಾರಿ ಅವಳಿ ಮಕ್ಕಳಿಗೆ ಮರಿಯಾಮ್ ಜನ್ಮ ನೀಡಿದ್ದರು. ಅದರಲ್ಲಿ ಒಂದು ಮಗು ಸೇರಿದಂತೆ ಒಟ್ಟು 6 ಮಕ್ಕಳು ಸಾವನ್ನಪ್ಪಿವೆ. ಕಣ್ಣೀರಿನಲ್ಲಿ ನನ್ನ ಜೀವನ ಸಾಗುತ್ತಾ ಬಂದಿದೆ. ಚಿಕ್ಕ ವಯಸ್ಸಿನಲ್ಲಿಯೇ ಮದುವೆ, ಇಷ್ಟು ಮಕ್ಕಳ ಪಾಲನೆಗಾಗಿ ಕೆಲಸ ಮಾಡುವುದು. ಗಂಡ ನಬಾಟಂಜಿ ಮಕ್ಕಳನ್ನು ನೋಡಿಕೊಳ್ಳಲಾಗದೇ ಬಿಟ್ಟು ಹೋದ ಎಂದು ಮರಿಯಾಮ್ ಕಣ್ಣೀರು ಹಾಕುತ್ತಾರೆ.

ಮನೆಯ ಎಲ್ಲ ಕೆಲಸಗಳನ್ನು ಮಾಡುವುದರ ಜೊತೆಗೆ ಹೊರಗಡೆ ಹೋಗಿ ದುಡಿಯುತ್ತಾರೆ. ಬಟ್ಟೆ-ಪಾತ್ರೆ ತೊಳೆಯುವುದು, ಅಡುಗೆ ಮಾಡುವದರಲ್ಲಿ ಅಮ್ಮನಿಗೆ ಸಹಾಯ ಮಾಡುತ್ತೇನೆ ಎಂದು 23 ವರ್ಷದ ಹಿರಿಯ ಮಗ ಕಿಬುಕಾ ಹೇಳುತ್ತಾನೆ.

ಅಜ್ಜಿ ನೀಡಿದ ಚಿಕ್ಕ ಭೂಮಿಯಲ್ಲಿ ಇಟ್ಟಿಗೆಗಳಿಂದ ನಾಲ್ಕು ಚಿಕ್ಕ ಕೋಣೆಗಳನ್ನು ಇಟ್ಟಿಗೆಗಳಿಂದ ಕಟ್ಟಿಕೊಂಡಿದ್ದೇನೆ. 38 ಮಕ್ಕಳನ್ನು ಸಾಕುವುದೇ ದೊಡ್ಡ ಸವಾಲಿನ ಕೆಲಸವಾಗಿದೆ. 12 ಮಕ್ಕಳು ಬೆಡ್ ಮೇಲೆ ಒಂದು ಕೋಣೆಯಲ್ಲಿ ಮಲಗಿದ್ರೆ, ಉಳಿದು ನೆಲದ ಮೇಲೆ ಹಾಸಿದ ದೊಡ್ಡ ಹಾಸಿಗೆಯಲ್ಲಿ ಹೊಂದಿಕೊಂಡು ಮಲಗುತ್ತಾರೆ. ಒಂದು ದಿನಕ್ಕೆ 25 ಕೆ.ಜಿ. ಮೆಕ್ಕೆಜೋಳದ ಹಿಟ್ಟು ಬಳಕೆ ಆಗುತ್ತದೆ. ಮಾಂಸ ಅಥವಾ ಮೀನೂಟ ತುಂಬಾ ಕಡಿಮೆ. ಇನ್ನು ಕೆಲಸದ ವೇಳಾ ಪಟ್ಟಿಯನ್ನು ನಾವೆಲ್ಲ ಸಿದ್ಧ ಮಾಡಿಕೊಳ್ಳುತ್ತೇವೆ. ಹೀಗೆ ಮನೆಯ ನಿರ್ವಹಣೆಯ ಮರಿಯಾಮ್ ಹೇಳಿಕೊಂಡರು.

ಪ್ರತಿ ಶನಿವಾರ ಎಲ್ಲರೂ ಒಟ್ಟಾಗಿ ಮನೆಯ ಕೆಲಸವನ್ನು ಮಾಡುತ್ತೇವೆ. ಕೆಲ ಮಕ್ಕಳು ಪದವಿ ಪಡೆದು ಉದ್ಯೋಗದಲ್ಲಿದ್ದು, ಕೆಲವರು ಕೂಲಿ ಕೆಲಸ ಮಾಡಿಕೊಂಡಿದ್ದಾರೆ. ನನ್ನ ಬಾಲ್ಯದಲ್ಲಿಯೇ ಸಂಸಾರ ಜೀವನಕ್ಕೆ ಕಾಲಿಟ್ಟ ನಾನು ಒಂದು ದಿನವೂ ಖುಷಿಯನ್ನು ಕಂಡಿಲ್ಲ. ಮಕ್ಕಳ ಲಾಲನೆ-ಪಾಲನೆ, ಸಂಸಾರ ನಿರ್ವಹಣೆ ಮಾಡುತ್ತಾ ಇಲ್ಲಿಯವರೆಗೆ ಬಂದಿದ್ದೇನೆ. ನನ್ನ ಮಕ್ಕಳನ್ನು ಸಂತೋಷವಾಗಿ ಇಡುವುದೇ ನನ್ನ ಜೀವನದ ಗುರಿ ಎಂದು ಮರಿಯಾಮ್ ಹೇಳಿದ್ದಾರೆ.