ರಾಕಿ ಭಾಯ್ ಭೇಟಿಯಾದ ಮಲಯಾಳಂ ಸ್ಟಾರ್ ನಟ

ಮೈಸೂರು: ರಾಕಿಂಗ್ ಸ್ಟಾರ್ ಯಶ್ ಈಗ ಬರೀ ಕನ್ನಡಕ್ಕೆ ಮಾತ್ರ ಸೀಮಿತವಾಗಿಲ್ಲ. ಬಾಲಿವುಡ್, ಟಾಲಿವುಡ್, ಕಾಲಿವುಡ್ ಹೀಗೆ ನ್ಯಾಷನಲ್ ಲೆವೆಲ್ ಮಾಸ್ಟರ್ ಪೀಸ್ ಆಗಿ ಹೊರಹೊಮ್ಮಿರುವುದು ಎಲ್ಲರಿಗೂ ತಿಳಿದೇ ಇದೆ. ಹೀಗಾಗಿ ವಿವಿಧ ಭಾಷೆಗಳಿಂದ ಹೆಚ್ಚು ಹೆಚ್ಚು ಆಫರ್ ಗಳು ಬರುತ್ತಿವೆ. ಅದರಂತೆ ಇದೀಗ ವಿಶೇಷ ಅತಿಥಿಯೊಬ್ಬರು ರಾಕಿಂಗ್ ಸ್ಟಾರ್ ಯಶ್‍ರನ್ನು ಭೇಟಿ ಮಾಡಿದ್ದಾರೆ.

ಮಲಯಾಳಂ ಸ್ಟಾರ್ ನಟ ದುಲ್ಕರ್ ಸಲ್ಮಾನ್ ಅವರನ್ನು ಯಶ್ ಭೇಟಿ ಮಾಡಿದ್ದಾರೆ. ಈ ಇಬ್ಬರು ನಟರ ಭೇಟಿ ಸ್ಯಾಂಡಲ್‍ವುಡ್‍ನಲ್ಲಿ ಅಚ್ಚರಿ ಮೂಡಿಸಿದ್ದು, ಯಾಕೆ ಭೇಟಿ ಮಾಡಿದರು? ಏನಿದರ ಉದ್ದೇಶ? ಈ ಇಬ್ಬರು ನಟರ ಭೇಟಿಯ ಮರ್ಮವೇನು ಎಂಬ ಪ್ರಶ್ನೆ ಅಭಿಮಾನಿಗಳಲ್ಲಿ ಮೂಡಿದೆ.

ಮೈಸೂರಿನಲ್ಲೇ ಯಶ್ ಮತ್ತು ಮಾಲಿವುಡ್ ಯೂತ್ ಐಕಾನ್ ದುಲ್ಕರ್ ಸಿನಿಮಾ ಚಿತ್ರೀಕರಣ ನಡೆಯುತ್ತಿದೆ. ಹೀಗಾಗಿ ಇಬ್ಬರೂ ಮೈಸೂರಿನ ರಾಡಿಸನ್ ಬ್ಲೂ ಹೊಟೇಲ್‍ನಲ್ಲಿ ತಂಗಿದ್ದಾರೆ. ಇಂದು ಬೆಳಗ್ಗೆ ಜಿಮ್ ಮಾಡುವ ವೇಳೆ ಇಬ್ಬರೂ ಮುಖಾಮುಖಿಯಾಗಿದ್ದು, ಇದೇ ಸಂದರ್ಭದಲ್ಲಿ ಸಿನಿಮಾಗಳ ಬಗ್ಗೆ ಕೆಲ ಹೊತ್ತು ಚರ್ಚೆ ನಡೆಸಿದ್ದಾರೆ. ಈ ವೇಳೆ ಪಾನಿಪೂರಿ ಕಿಟ್ಟಿ ಸಹ ನಟರಿಗೆ ಸಾಥ್ ನೀಡಿದ್ದಾರೆ. ಈ ಫೋಟೋಗಳನ್ನು ದುಲ್ಕರ್ ಹಾಗೂ ಯಶ್ ತಮ್ಮ ಇನ್‍ಸ್ಟಾಗ್ರಾಮ್‍ನಲ್ಲಿ ಹಂಚಿಕೊಂಡಿದ್ದಾರೆ.

https://www.instagram.com/p/B8LG2rXJmXj/

ಪೋಸ್ಟ್‌ನಲ್ಲಿ ಏನಿದೆ?
ಇಂದು ನಾನು ನನ್ನ ಊರಿನಲ್ಲಿ ದುಲ್ಕರ್ ಅವರನ್ನು ಭೇಟಿ ಮಾಡಿದೆ. ಬುದ್ಧಿವಂತ ನಟ+ಮಾನವೀಯತೆ ಸೇರಿದರೆ ದುಲ್ಕರ್! ಅವರ ಚಲನಚಿತ್ರಗಳ ಆಯ್ಕೆಯನ್ನು ನಾನು ಮೆಚ್ಚುತ್ತೇನೆ. ನಮ್ಮ ಪೀಳಿಗೆ ಕಂಡ ಅತ್ಯುತ್ತಮ ನಟರಲ್ಲಿ ದುಲ್ಕರ್ ಕೂಡ ಒಬ್ಬರು. ನೀವು ಕುರುಪ್ ಪಾತ್ರವನ್ನು ಉತ್ತಮವಾಗಿ ನಿಭಾಯಿಸುತ್ತೀರ ಎಂದು ನಾನು ಖಚಿತವಾಗಿ ಹೇಳಬಲ್ಲೆ. ಮುಂದಿನ ಸಲ ನೀವು ನನ್ನ ಊರಿಗೆ ಬಂದಾಗ ಸ್ಥಳೀಯ ಔತಣ ನಿಮಗಾಗಿ ಕಾಯುತ್ತಿರುತ್ತೆ. ಅದು ಹಬ್ಬದ ರೀತಿ ಇರುತ್ತೆ ಎಂದು ಬರೆದು, ತಾವು ಹಾಗೂ ದುಲ್ಕರ್ ಇರುವ ಫೋಟೋವನ್ನು ಯಶ್ ತಮ್ಮ ಇನ್‍ಸ್ಟಾಗ್ರಾಮ್‍ನಲ್ಲಿ ಹಂಚಿಕೊಂಡಿದ್ದಾರೆ.

https://www.instagram.com/p/B8LXqKtn5Zk/

ಇತ್ತ ದುಲ್ಕರ್ ಅವರು ಕೂಡ ತಮ್ಮ ಇನ್‍ಸ್ಟಾಗ್ರಾಮ್‍ನಲ್ಲಿ ರಾಕಿ ಭಾಯ್ ಜೊತೆಗಿರುವ ಫೋಟೋವನ್ನು ಪೋಸ್ಟ್ ಮಾಡಿ, ಯಶ್ ಅವರನ್ನು ಭೇಟಿ ಮಾಡಿದ್ದು ಖುಷಿಯಾಯ್ತು. ನಿಮ್ಮ ವ್ಯಕ್ತಿತ್ವ ಮತ್ತು ಆತಿಥ್ಯ ನನ್ನ ಮನ ಮುಟ್ಟಿದೆ. ನಮ್ಮ ಮುಂದಿನ ಶೆಡ್ಯೂಲ್‍ನಲ್ಲಿ ಮತ್ತೆ ಭೇಟಿ ಆಗೋಣ. ರಾಕಿ ಭಾಯ್ ಅವರ ಕೆಜಿಎಫ್-2 ಸಿನಿಮಾಕ್ಕಾಗಿ ಕಾಯುತ್ತಿದ್ದೇನೆ ಎಂದು ಬರೆದುಕೊಂಡಿದ್ದಾರೆ.

ಯಶ್ ಕೆಜಿಎಫ್-2 ಸಿನಿಮಾ ಕೆಲಸದಲ್ಲಿ ಬ್ಯುಸಿಯಾಗಿದ್ದು, ಶೂಟಿಂಗ್ ಫೈನಲ್ ಹಂತ ತಲುಪಿದೆ ಎನ್ನಲಾಗಿದೆ. ಇತ್ತ ದುಲ್ಕರ್ ಸಲ್ಮಾನ್ ನಾಲ್ಕು ಸಿನಿಮಾಗಳ ಕೆಲಸದಲ್ಲಿ ಬ್ಯುಸಿಯಿದ್ದಾರೆ. ಈ ನಡುವೆಯೇ ಇಬ್ಬರು ಸ್ಟಾರ್ ನಟರು ಭೇಟಿ ಮಾಡಿ ಸಿನಿಮಾಗಳ ಕುರಿತು ಪರಸ್ಪರ ಮಾತನಾಡಿಕೊಂಡಿದ್ದಾರೆ. ಯಶ್ ಅವರಿಗೆ ಮಾಲಿವುಡ್‍ನಲ್ಲಿಯೂ ಅಭಿಮಾನಿ ಬಳಗ ಹುಟ್ಟಿಕೊಂಡಿದ್ದು, ದುಲ್ಕರ್, ರಾಕಿ ಭಾಯ್ ಭೇಟಿ ಮಾಡಿರುವುದು ಮಲಯಾಳಂ ಅಭಿಮಾನಿಗಳಲ್ಲಿಯೂ ಸಂತಸವನ್ನುಂಟು ಮಾಡಿದೆ.