ರಾಂಚಿ: ಮಾಡೆಲ್‍ಯೊಬ್ಬಳ ಶವ ಕೆರೆಯಲ್ಲಿ ಪತ್ತೆಯಾದ ಘಟನೆ ಮಂಗಳವಾರ ಸಂಜೆ ಜಾರ್ಖಂಡ್‍ನ ದಂಥಾರಿ ಜಿಲ್ಲೆಯಲ್ಲಿ ನಡೆದಿದೆ.
ಆಂಚಲ್ ಯಾದವ್(32) ಮೃತ ಮಾಡೆಲ್. ಆಂಚಲ್ ದಂಥಾರಿಯ ನಿವಾಸಿಯಾಗಿದ್ದು, ಮಾಡೆಲಿಂಗ್ ಜೊತೆ ವಿಮಾ ಕಂಪನಿಯ ಏಜೆಂಟ್ ಆಗಿ ಕೆಲಸ ಮಾಡುತ್ತಿದ್ದಳು. ನಗರದಲ್ಲಿ ಯಾವುದೇ ಗಣ್ಯ ವ್ಯಕ್ತಿಗಳ ಪಾರ್ಟಿ ನಡೆದರೂ ಅಲ್ಲಿಗೆ ಆಂಚಲ್ ಕೂಡ ಆಗಮಿಸುತ್ತಿದ್ದಳು.
ಆಂಚಲ್ ಸೋಮವಾರ ರಾತ್ರಿ ಸುಮಾರು 9 ಗಂಟೆಗೆ ರಾಯ್‍ಪುರದಿಂದ ದಾಂಥಾರಿ ನಿವಾಸಕ್ಕೆ ಆಗಮಿಸಿದ್ದಳು. ಆಂಚಲ್ ಮನೆಗೆ ಬರುತ್ತಿದ್ದಂತೆ ಆಕೆಗೆ ಒಂದು ಕರೆ ಬಂದಿದೆ. ಆಗ ಅವಳು ಮನೆ ಹೊರಗೆ ಬೈಕಿನಲ್ಲಿ ಕಾಯುತ್ತಿದ್ದ ವ್ಯಕ್ತಿಯನ್ನು ಭೇಟಿ ಮಾಡಲು ಹೋದಳು. ಅಲ್ಲದೆ ತನ್ನ ತಾಯಿಯ ಬಳಿ ಅರ್ಧ ಗಂಟೆಯಲ್ಲಿ ಮನೆಗೆ ಮರಳುತ್ತೇನೆ ಎಂದು ಹೇಳಿ ಹೋಗಿದ್ದಳು. ಆದರೆ ಮಂಗಳವಾರ ಆಕೆ ಶವವಾಗಿ ಪತ್ತೆ ಆಗಿದ್ದಾಳೆ.
ಮಂಗಳವಾರ ಸಂಜೆ ಆಂಚಲ್ ಸಹೋದರನಿಗೆ ಕರೆ ಮಾಡಿ ಆಕೆಯ ಮೃತದೇಹವನ್ನು ತಲುಪಿಸಲಾಗಿದೆ. ಆಂಚಲ್‍ನನ್ನು ಕೊಲೆ ಮಾಡಲಾಗಿದ್ದು, ಆಕೆಯ ಕೈ-ಕಾಲು ಹಾಗೂ ಕುತ್ತಿಗೆಯನ್ನು ಹಗ್ಗದಿಂದ ಕಟ್ಟಲಾಗಿತ್ತು. ಅಲ್ಲದೆ ಆಕೆಯ ಹೊಟ್ಟೆಗೆ ಚಾಕು ಇರಿದ ಗುರುತು ಕೂಡ ಪತ್ತೆಯಾಗಿದೆ. ಆಂಚಲ್‍ನನ್ನು ಕೊಲೆ ಮಾಡಿದ ವ್ಯಕ್ತಿ ಮೊದಲೇ ಆಕೆಯ ಪರಿಚಯಸ್ಥನು ಎಂದು ಪೊಲೀಸರು ಅನುಮಾನ ವ್ಯಕ್ತಪಡಿಸಿದ್ದಾರೆ.
ಪೊಲೀಸರು ಸಾಕ್ಷಿಗಾಗಿ ಆಂಚಲ್‍ನ ಸಾಮಾಜಿಕ ಜಾಲತಾಣ ಹಾಗೂ ಕಾಲ್ ಡಿಟೇಲ್ಸ್ ಕೂಡ ಪರಿಶೀಲಿಸುತ್ತಿದ್ದಾರೆ. ಆಂಚಲ್ ಮೃತದೇಹ ಪತ್ತೆಯಾದ ಸ್ಥಳದಲ್ಲಿ ಮೊಬೈಲ್ ಸಿಗಲಿಲ್ಲ. ಆಂಚಲ್ ಮೃತದೇಹ ಕೆರೆಯಲ್ಲಿ 12 ಗಂಟೆಕ್ಕಿಂತ ಹೆಚ್ಚು ಹೊತ್ತು ತೇಲಾಡಿದೆ ಎಂದು ಪೊಲೀಸರು ಅನುಮಾನ ಪಡುತ್ತಿದ್ದಾರೆ. ಅಲ್ಲದೆ ವ್ಯಕ್ತಿ ಜೊತೆ ಬೈಕಿನಲ್ಲಿ ಹೋದ ಸ್ವಲ್ಪ ಸಮಯದಲ್ಲಿ ಆಕೆಯ ಕೊಲೆ ಆಗಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.
2014ರಲ್ಲಿ ಬರನಾವಾಪಾರಾದಲ್ಲಿ ಅರಣ್ಯ ಅಧಿಕಾರಿಗೆ ಸೆಕ್ಸ್ ವಿಡಿಯೋ ತೋರಿಸಿ ಬ್ಲಾಕ್‍ಮೇಲ್ ಮಾಡಿದ ಆರೋಪದ ಅಡಿಯಲ್ಲಿ ಆಂಚಲ್‍ಳನ್ನು ಬಂಧಿಸಲಾಗಿತ್ತು.
