ವಿದೇಶ ಪ್ರವಾಸದಲ್ಲಿ ಕೈ ಶಾಸಕ-ಪತಿಯ ಅನುಪಸ್ಥಿತಿಯಲ್ಲಿ ಪತ್ನಿಯಿಂದ ಅಧಿಕಾರ ಚಲಾವಣೆ

ತುಮಕೂರು: ಶಾಸಕರು ವಿದೇಶ ಪ್ರಯಾಣಕ್ಕೆ ಹೋದಾಗ ಶಾಸಕರ ಪತ್ನಿಯೇ ಕ್ಷೇತ್ರದಲ್ಲಿ ನಾನೇನು ಕಡಿಮೆ ಇಲ್ಲಾ ಅಂತಾ ಆಡಳಿತ ನಡೆಸುತ್ತಿದ್ದಾರೆ.

ಜಿಲ್ಲೆಯ ಕುಣಿಗಲ್ ಕಾಂಗ್ರೆಸ್ ಶಾಸಕ ಡಾ.ರಂಗನಾಥ್ ವಿದೇಶ ಪ್ರವಾಸದಲ್ಲಿದ್ದಾರೆ. ಈ ಸಮಯದಲ್ಲಿ ಶಾಸಕರ ಪತ್ನಿ ಸುಮಾ ಕ್ಷೇತ್ರ ಪ್ರವಾಸದಲ್ಲಿ ತೊಡಗಿದ್ದಾರೆ. ಪತಿಯ ಅನುಪಸ್ಥಿತಿಯಲ್ಲಿ ಸುಮಾ ರಂಗನಾಥ್ ಕುಣಿಗಲ್ ಸರ್ಕಾರಿ ಆಸ್ಪತ್ರೆಗೆ ಭೇಟಿ ನೀಡಿ ಪರಶೀಲನೆ ನಡೆಸಿದ್ದಾರೆ. ಆಸ್ಪತ್ರೆಯಲ್ಲಿನ ಕುಂದು ಕೊರತೆಗಳ ಬಗ್ಗೆ ಅಧಿಕಾರಿಗಳಿಂದ ಮಾಹಿತಿ ಪಡೆದಿದ್ದಾರೆ.

ಆಸ್ಪತ್ರೆಯ ಆಡಳಿತ ವೈದ್ಯಾಧಿಕಾರಿ ಡಾ.ಗಣೇಶ್ ಬಾಬು ಹಾಗೂ ಹಿರಿಯ ಔಷದ ವಿತರಕ ಸಣ್ಣೀರಪ್ಪ ಶಾಸಕರ ಪತ್ನಿಗೆ ಸಾಥ್ ನೀಡಿದ್ದರು. ಹೀಗೆ ದಿಢೀರ್ ಭೇಟಿ ನೀಡಿದ ಶಾಸಕರ ಪತ್ನಿಗೆ ಅಧಿಕಾರಿಗಳು ಎಲ್ಲ ಮಾಹಿತಿಯನ್ನು ನೀಡಿದ್ದಾರೆ.

ಈ ಸಂದರ್ಭದಲ್ಲಿ ಸುಮಾ ರಂಗನಾಥ್ ಚುನಾವಣೆ ಸಂದರ್ಭದಲ್ಲಿ ನನ್ನ ಪತಿಯ ಪರವಾಗಿ ನಾನೂ ಮತ ಯಾಚಿಸಿದ್ದೇನೆ. ಹಾಗಾಗಿ ಜನ ನಮ್ಮನ್ನು ಗೆಲ್ಲಿಸಿದ್ದಾರೆ. ಈಗ ಜನರ ಸನಸ್ಯೆ ಆಲಿಸಿ ಅವರ ಋಣ ತೀರಿಸಲು ಬಂದಿದ್ದೇನೆ ಎಂದರು.

ಸುಮಾ ರಂಗನಾಥ್ ರವರು ಪತಿಯ ಅಧಿಕಾರವನ್ನು ಚಲಾಯಿಸಿದ್ದಕ್ಕೆ ಸಾರ್ವಜನಿಕರಿಂದ ವ್ಯಾಪಕ ಖಂಡನೆ ವ್ಯಕ್ತವಾಗಿದೆ.