ಫೋಟೋಗಾಗಿ ಬೈಕ್ ಏರಿದ್ದವರು ಮಾಲೀಕನಿಗೆ ಥಳಿಸಿ ಎಸ್ಕೇಪ್

ಬೆಂಗಳೂರು: ಬೈಕ್ ಚೆನ್ನಾಗಿದೆ ಎಂದು ಫೋಟೋ ತೆಗೆದುಕೊಂಡು ಅಪರಿಚಿತರು ಅದರ ಜೊತೆನೇ ಎಸ್ಕೇಪ್ ಆದ ಘಟನೆ ಬೆಂಗಳೂರಿನ ಬೆಥಾನಿ ಸ್ಕೂಲ್ ಬಳಿ ನಡೆದಿದೆ.

ಬೈಕ್ ಮಾಲೀಕ ಗಣೇಶ್ ಗೌಡ ಎಂಬಾತನಿಗೆ ಹಲ್ಲೆ ನಡೆಸಿ ಇಬ್ಬರು ದುಷ್ಕರ್ಮಿಗಳು ಎಸ್ಕೇಪ್ ಆಗಿದ್ದಾರೆ. ಇಬ್ಬರು ಅಪರಿಚಿತರು ಹೋಂಡಾ ಆಕ್ಟೀವಾದಲ್ಲಿ ಬಂದಿದ್ದರು. ಈ ವೇಳೆ ಗಣೇಶ್ ಗೌಡ ಅವರ ವಿದೇಶಿ ಬೈಕ್ ಹೋಂಡಾ ಗೋಲ್ಡ್ ವಿಂಗ್ ನೋಡಿದ್ದಾರೆ.

ಇಬ್ಬರು ದುಷ್ಕರ್ಮಿಗಳು ಬೈಕ್ ಮಾಲೀಕ ಗಣೇಶ್ ಗೌಡ ಬಳಿ ಹೋಗಿ ನಿಮ್ಮ ವಿದೇಶಿ ಬೈಕ್ ಚೆನ್ನಾಗಿದೆ. ನಾವು ಒಂದು ಫೋಟೋ ತೆಗೆದುಕೊಳ್ಳುತ್ತೇವೆ ಎಂದು ಕೇಳಿಕೊಂಡಿದ್ದಾರೆ. ಗಣೇಶ್ ಗೌಡ ಕೂಡ ಇದಕ್ಕೆ ಒಪ್ಪಿಕೊಂಡು ಫೋಟೋ ತೆಗೆದುಕೊಳ್ಳಲು ಅನುಮತಿ ನೀಡಿದರು.

ಫೋಟೋ ತೆಗೆದುಕೊಂಡ ಮೇಲೆ ದುಷ್ಕರ್ಮಿಗಳು ಬೆರಳುಗಳಿಗೆ ನಕ್ಕಲ್ ಧರಿಸಿ ಗಣೇಶ್‍ಗೆ ಪಂಚ್ ಮಾಡಿದ್ದಾರೆ. ಗಣೇಶ್ ಮೇಲೆ ಹಲ್ಲೆ ನಡೆಸಿದ ನಂತರ ಅವರಿಂದ ಹೋಂಡಾ ಗೋಲ್ಡ್ ವಿಂಗ್ ಬೈಕ್ ಕೀ ಕಸಿದುಕೊಂಡು ಇಬ್ಬರು ಸ್ಥಳದಿಂದ ಪರಾರಿ ಆಗಿದ್ದಾರೆ.

ಈ ಬಗ್ಗೆ ಕೋರಮಂಗಲ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.