ಮುಂಬೈ: ಸ್ವಂತ ಮಗಳ ಮೇಲೆಯೇ ಕೆಲವು ತಿಂಗಳಿನಿಂದ ನಿರಂತರ ಅತ್ಯಾಚಾರವೆಸಗಿದ ಆರೋಪದ ಮೇರೆಗೆ 62 ವರ್ಷದ ಆರೋಪಿ ತಂದೆಯನ್ನು ಬಂಧಿಸಲಾಗಿದೆ.
ಬಂಧಿತ ಆರೋಪಿ ಸಂತ್ರಸ್ತೆಗೆ ಊಟದಲ್ಲಿ ನಿದ್ರೆ ಮಾತ್ರೆ ಹಾಕಿ ಅತ್ಯಾಚಾರ ಎಸಗುತ್ತಿದ್ದನು ಎಂದು ತಿಳಿದು ಬಂದಿದೆ. ಸದ್ಯಕ್ಕೆ ಎನ್‍ಜಿಓ ಸಂಸ್ಥೆಯ ಸಹಾಯದಿಂದ ಸಂತ್ರಸ್ತೆ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಿಸಿದ್ದಾರೆ. ಆರೋಪಿ ನಗರದ ಮೀರಾ ರೋಡ್‍ನಲ್ಲಿ ವಾಸಿಸುತ್ತಿದ್ದು, ಆತನನ್ನು ಬಂಧಿಸಲಾಗಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.
ಘಟನೆ ವಿವರ:
ಸಂತ್ರಸ್ತೆ ತನ್ನ ಮಲತಾಯಿ ಮತ್ತು ಸಹೋದರರ ಜೊತೆ ವಾಸಿಸುತ್ತಿದ್ದಳು. ಸಂತ್ರಸ್ತೆ ಮಾಡುತ್ತಿದ್ದ ಊಟದಲ್ಲಿ ಆರೋಪಿ ತಂದೆ ನಿದ್ರೆ ಮಾತ್ರೆಯನ್ನು ಮಿಕ್ಸ್ ಮಾಡಿ ಕೊಡುತ್ತಿದ್ದನು. ಇದನ್ನು ತಿಳಿಯದ ಮಗಳು ಸೇವಿಸಿದ ಕೂಡಲೇ ಪ್ರಜ್ಞೆ ಕಳೆದುಕೊಳ್ಳುತ್ತಿದ್ದಳು. ಇದೇ ವೇಳೆ ಆರೋಪಿ ತಂದೆ ಆಕೆಯ ರೂಮಿಗೆ ಹೋಗಿ ಸಂಬಂಧ ಬೆಳೆಸುತ್ತಿದ್ದನು.
ಇದೇ ರೀತಿ ಅನೇಕ ತಿಂಗಳಿನಿಂದ ಪಾಪಿ ತಂದೆ ಅತ್ಯಾಚಾರ ಎಸಗುತ್ತಿದ್ದನು. ಈ ಬಗ್ಗೆ ಸಂತ್ರಸ್ತೆಗೆ ಅನುಮಾನ ಬಂದಿದ್ದು, ಒಂದು ದಿನ ತನ್ನ ರೂಮಿನಲ್ಲಿ ಊಟ ಮಾಡುವ ನಿರ್ಧಾರ ಮಾಡಿದ್ದಾರೆ. ಆರೋಪಿ ತಂದೆ ರೂಮಿಗೆ ಊಟ ತಂದುಕೊಟ್ಟಿದ್ದಾನೆ. ಆದರೆ ಸಂತ್ರಸ್ತೆ ಅದನ್ನು ತಿನ್ನದೆ ಎಸೆದು ನಿದ್ದೆ ಮಾಡುವಾಗ ಮಲಗಿಕೊಂಡು ನಾಟಕವಾಡಿದ್ದಾರೆ ಎಂದು ಪೊಲೀಸ್ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.
ಎಂದಿನಂತೆ ಆರೋಪಿ ತಂದೆ ಎಲ್ಲರೂ ಮಲಗಿದ ಮೇಲೆ ಮಗಳ ರೂಮಿಗೆ ಹೋಗಿದ್ದು, ಆಕೆಯ ಜೊತೆ ಅಸಭ್ಯವಾಗಿ ನಡೆದುಕೊಂಡಿದ್ದಾನೆ. ತಕ್ಷಣ ಎಚ್ಚರಗೊಂಡ ಸಂತ್ರಸ್ತೆ ಇದಕ್ಕೆ ವಿರೋಧ ವ್ಯಕ್ತಪಡಿಸಿ ಕೂಗಾಡಿದ್ದಾಳೆ. ಆಗ ತಂದೆ ಆಕೆಯ ಮೇಲೆ ಹಲ್ಲೆ ಮಾಡಿ ಯಾರಿಗಾದರೂ ಹೇಳಿದರೆ ಕೊಲೆ ಮಾಡುವುದಾಗಿ ಬೆದರಿಕೆ ವೊಡ್ಡಿದ್ದಾನೆ. ಅಷ್ಟೇ ಅಲ್ಲದೆ ನಾಳೆ ಬರುತ್ತೇನೆ ಎಂದು ಹೇಳಿ ಹೋಗಿದ್ದಾನೆ ಎಂದು ಸಂತ್ರಸ್ತೆ ತಿಳಿಸಿದ್ದಾಳೆ.
ಇದರಿಂದ ನೊಂದ ಸಂತ್ರಸ್ತೆ, ಕೊನೆಗೆ ಸಾಮಾಜಿಕ ಜಾಲತಾಣದ ಮೂಲಕ ತನ್ನ ಸ್ನೇಹಿತರನ್ನು ಸಂಪರ್ಕಿಸಿ ಎಲ್ಲ ವಿಚಾರವನ್ನು ತಿಳಿಸಿದ್ದಾಳೆ. ಬಳಿಕ ಆಕೆಯ ಸ್ನೇಹಿತರು ಎನ್‍ಜಿಓಗೆ ಮಾಹಿತಿ ನೀಡಿದ್ದಾರೆ. ಎನ್‍ಜಿಓ ಅವರ ಸಹಾಯದಿಂದ ತಂದೆಯ ವಿರುದ್ಧ ದೂರು ದಾಖಲಿಸಿದ್ದಾರೆ. ಈ ಕುರಿತು ತಂದೆಯ ವಿರುದ್ಧ ಎಫ್‍ಐಆರ್ ದಾಖಲಾಗಿದ್ದು, ಆತನನ್ನು ಬಂಧಿಸಲಾಗಿದೆ ಎಂದು ಇನ್ಸ್ ಪೆಕ್ಟರ್ ತಿಳಿಸಿದ್ದಾರೆ.
