ಸಿಂಗಾಪುರನಿಂದ ನೋಯ್ಡಾದವರೆಗೆ ಮಹಿಳೆಯನ್ನು ಫಾಲೋ ಮಾಡಿದ ಯುವಕ

– ಪ್ರಶ್ನಿಸಿದ್ದಕ್ಕೆ ಆಕೆಯ ಪತಿಯ ಆತ್ಮ ನನ್ನೊಳಗೆ ಇದೆ ಎಂದ

ಲಕ್ನೋ: ಯುವಕನೊಬ್ಬ ಸಿಂಗಾಪುರದಿಂದ ನೋಯ್ಡಾವರೆಗೂ ಮಹಿಳೆಯನ್ನು ಹಿಂಬಾಲಿಸಿಕೊಂಡು ಬಂದಿದ್ದಾನೆ. ಇದನ್ನು ಪ್ರಶ್ನಿಸಿದ್ದಕ್ಕೆ ಯುವಕ ಆಕೆಯ ಪತಿಯ ಆತ್ಮ ನನ್ನೊಳಗೆ ಇದೆ ಎಂದು ವಿಚಿತ್ರ ಹೇಳಿಕೆ ನೀಡಿದ್ದಾನೆ.

ಯುವಕ ಹಿಂಬಾಲಿಸುತ್ತಿದ್ದರಿಂದ ಮಹಿಳೆ ಪೊಲೀಸ್ ಠಾಣೆಯಲ್ಲಿ ದೂರು ನೀಡಿದ್ದರು. ಬಳಿಕ ಪೊಲೀಸರು ಯುವಕನನ್ನು ಕರೆಸಿ ಪ್ರಶ್ನಿಸಿದ್ದಾಗ ಆಕೆಯ ಪತಿಯ ಆತ್ಮ ನನ್ನೊಳಗೆ ಇದೆ ಎಂದು ಹೇಳಿದ್ದಾನೆ. ಮಹಿಳೆ ತನ್ನ ಪತಿಯ ಜೊತೆ ಸಿಂಗಾಪುರದಲ್ಲಿ ಇರುತ್ತಿದ್ದರು. ಕಳೆದ 11 ವರ್ಷಗಳ ಹಿಂದೆ ಆಕೆಯ ಪತಿ ಹೆಲಿಕಾಪ್ಟರ್ ಕ್ರ್ಯಾಶ್ ಆಗುವ ಮೂಲಕ ಮೃತಪಟ್ಟಿದ್ದರು.

ನಡೆದಿದ್ದೇನು?
2009ರಲ್ಲಿ ಸಿಂಗಾಪುರದಲ್ಲಿ ಆರ್ಕುಟ್(ಫೇಸ್‍ಬುಕ್ ರೀತಿಯಲ್ಲೇ ಗೂಗಲ್ ಕಂಪನಿಯ ಸಾಮಾಜಿಕ ಜಾಲತಾಣ. 2014ರಲ್ಲಿ ಗೂಗಲ್ ಈ ಸೇವೆಯನ್ನು ಸ್ಥಗಿತಗೊಳಿಸಿದೆ) ಚಾಟ್ ಮೂಲಕ ಯುವಕ ಹಾಗೂ ಮಹಿಳೆಯ ಸ್ನೇಹವಾಗಿತ್ತು. ಬಳಿಕ ಇಬ್ಬರು ಒಬ್ಬರನೊಬ್ಬರು ಭೇಟಿ ಮಾಡಲು ಶುರು ಮಾಡಿದ್ದರು. ಕೆಲವು ವರ್ಷಗಳ ಹಿಂದೆ ಇಬ್ಬರು ಮಾತನಾಡುವುದನ್ನು ನಿಲ್ಲಿಸಿದ್ದರು. ಬಳಿಕ ಮಹಿಳೆ ಸಿಂಗಾಪುರ ಬಿಟ್ಟು ನೋಯ್ಡಾಗೆ ಬಂದಿದ್ದರು. ಇದಾದ ಬಳಿಕ ಯುವಕ ಮಹಿಳೆಗೆ ಸಂಪರ್ಕಿಸಲು ಪ್ರಯತ್ನಿಸಿದ್ದಾನೆ.

ಯುವಕ ಮೂಲತಃ ಮೀರತ್ ನವನಾಗಿದ್ದು, ಸಿಂಗಾಪುರದಲ್ಲಿ ವಾಸಿಸುತ್ತಿದ್ದನು. ಯುವಕ ಹಾಗೂ ಮಹಿಳೆ ತುಂಬಾನೇ ಆತ್ಮೀಯರಾಗಿದ್ದರು. ಎರಡು ವರ್ಷಗಳ ನಂತರ ಮಹಿಳೆ ಸಿಂಗಾಪುರ ಬಿಟ್ಟು ನೋಯ್ಡಾಗೆ ಶಿಫ್ಟ್ ಆಗಿದ್ದರು. ಇದಾದ ಬಳಿಕ ಯುವಕ ಮಹಿಳೆಯನ್ನು ಸಂಪರ್ಕಿಸಲು ಸಾಧ್ಯವಾಗಲಿಲ್ಲ. ಹಾಗಾಗಿ ಆತ ನೋಯ್ಡಾಗೆ ಬಂದಿದ್ದಾನೆ. ನೋಯ್ಡಾಗೆ ಬಂದು ಯುವಕ ಆಕೆಯ ಪತಿಯ ಆತ್ಮ ನನ್ನೊಳಗೆ ಇದೆ. ಹಾಗಾಗಿ ನಾವಿಬ್ಬರು ಸಿಂಗಾಪುರದಲ್ಲಿ ಭೇಟಿ ಮಾಡುತ್ತಿದ್ದೇವು ಎಂದು ಹೇಳಿದ್ದಾನೆ.