ಅಡುಗೆ ಮನೆಯಲ್ಲಿ ಸೊಸೆಯಿಂದ ಕ್ಯಾಮೆರಾ ಫಿಕ್ಸ್ – 50ರ ಮಾವನ ಕೃತ್ಯ ಬಯಲು

ಮುಂಬೈ: ಲೈಂಗಿಕ ಕಿರುಕುಳ ಕೊಡುತ್ತಿದ್ದ ಮಾವನ ಕೃತ್ಯವನ್ನು ಸೊಸೆಯೊಬ್ಬಳು ತನ್ನ ಮೊಬೈಲಿನಲ್ಲಿ ರೆಕಾರ್ಡ್ ಮಾಡಿಕೊಳ್ಳುವ ಮೂಲಕ ಆತನ ಕೃತ್ಯವನ್ನು ಬಯಲು ಮಾಡಿದ್ದಾಳೆ.

ವಿರಾರ್ ಪೊಲೀಸರು 50 ವರ್ಷದ ಆರೋಪಿ ಮಾವನನ್ನು ಬಂಧಿಸಿದ್ದಾರೆ. ಆರೋಪಿ ಆಟೋ ಚಾಲಕನಾಗಿ ಕೆಲಸ ಮಾಡುತ್ತಿದ್ದನು. ಆರೋಪಿ ಅನೇಕ ದಿನಗಳಿಂದ ಸೊಸೆಗೆ ಲೈಂಗಿಕ ಕಿರುಕುಳ ನೀಡುತ್ತಿದ್ದನು. ಮಹಿಳೆ ನಿಮ್ಮ ತಂದೆ ನನ್ನ ಜೊತೆ ಅಸಭ್ಯವಾಗಿ ನಡೆದುಕೊಳ್ಳುತ್ತಾರೆ ಎಂದು ಪತಿಯ ಬಳಿ ಹೇಳಿಕೊಂಡಿದ್ದಾಳೆ. ಆದರೆ ಪತಿ ತಂದೆಯ ಮೇಲಿನ ಆರೋಪವನ್ನು ನಿರಾಕರಿಸಿದ್ದನು. ಇದರಿಂದಾಗಿ ಆಕೆ ಮಾನವ ಕೃತ್ಯವನ್ನು ಫೋನಿನಲ್ಲಿ ರೆಕಾರ್ಡ್ ಮಾಡಲು ನಿರ್ಧರಿಸಿದ್ದಾಳೆ.

ಅದರಂತೆಯೇ ಒಂದು ದಿನ ಸೊಸೆ ತನ್ನ ಮೊಬೈಲ್ ಫೋನ್ ಕ್ಯಾಮೆರಾವನ್ನು ಅಡುಗೆಮನೆಯಲ್ಲಿ ಮಾವನಿಗೆ ಕಾಣಿಸದಂತೆ ಇಟ್ಟಿದ್ದಳು. ಬೆಳಗ್ಗೆ ಆರೋಪಿ ಮಾವ ಬಂದು ಲೈಂಗಿಕ ಕಿರುಕುಳ ನೀಡಿದ್ದಾನೆ. ಮತ್ತೆ ಸಂಜೆ ಸೊಸೆ ಅಡುಗೆ ಮನೆಯಲ್ಲಿದ್ದಳು. ಆಗ ಮಾವ ಬಂದು ಆಕೆ ಎದೆಯನ್ನು ಮುಟ್ಟಿ ಲೈಂಗಿಕ ಕಿರುಕುಳ ನೀಡಿದ್ದಾನೆ. ಇದೆಲ್ಲಾ ಫೋನಿನ ಕ್ಯಾಮೆರಾದಲ್ಲಿ ರೆಕಾರ್ಡ್ ಆಗಿದೆ. ಪತಿ ಮನೆಗೆ ಬಂದ ಕೂಡಲೇ ಅವಳು ಮಾವನ ಕೃತ್ಯವನ್ನು ತೋರಿಸಿದ್ದಾಳೆ ಎಂದು ಪೊಲೀಸರು ತಿಳಿಸಿದ್ದಾರೆ.

ಈ ಬಗ್ಗೆ ಮಗ ಪ್ರಶ್ನೆ ಮಾಡಿದ್ದಕ್ಕೆ ಮಗ ಮತ್ತು ಸೊಸೆಯನ್ನು ಮನೆಯಿಂದ ಹೊರಹೋಗುವಂತೆ ತಂದೆ ಸೂಚಿಸಿದ್ದಾನೆ. ನಂತರ ಮಹಿಳೆ ವಿಡಿಯೋ ಕ್ಲಿಪ್ ಜೊತೆ ವಿರಾರ್ ಪೊಲೀಸ್ ಠಾಣೆಗೆ ಬಂದು ದೂರು ನೀಡಿ ಎಫ್‍ಐಆರ್ ದಾಖಲಿಸಿದ್ದಳು. ಆಕೆ ನೀಡಿದ ದೂರಿನ ಅನ್ವಯ ನಾವು ಆತನನ್ನು ಬಂಧಿಸಿ ತನಿಖೆ ನಡೆಸುತ್ತಿದ್ದೇವೆ ಎಂದು ಪೊಲೀಸ್ ಅಧಿಕಾರಿ ಹೇಮಂತ್ ಕಟ್ಕರ್ ಹೇಳಿದ್ದಾರೆ.