ಗೆಳತಿಯನ್ನು ಪಿಕ್ ಮಾಡೋ ಬರದಲ್ಲಿ ಸಾವಿನ ದವಡೆಯಿಂದ ಪಾರಾದ ಪ್ರೇಮಿ!

ಬೆಂಗಳೂರು: ಗರ್ಲ್ ಫ್ರೆಂಡ್ ಪಿಕ್ ಮಾಡುವ ಬರದಲ್ಲಿ ಬೈಕ್ ಸವಾರನೊಬ್ಬ ಕೂದಲೆಳೆಯ ಅಂತರದಲ್ಲಿ ಸಾವಿನ ದವಡೆಯಿಂದ ಪಾರಾದ ಘಟನೆಯೊಂದು ಶುಕ್ರವಾರ ಬೆಳಗ್ಗೆ 7:53ರ ಸುಮಾರಿಗೆ ಹೊಸೂರು ಮುಖ್ಯರಸ್ತೆಯಲ್ಲಿ ನಡೆದಿದೆ.

ಗೆಳತಿಗಾಗಿ ಸವಾರ ವೇಗವಾಗಿ ಬೈಕನ್ನು ಚಲಾಯಿಸಿ ಕಂಟೈನರ್ ಓವರ್ ಟೇಕ್ ಮಾಡಲು ಮುಂದಾಗಿದ್ದಾನೆ. ಓವರ್ ಟೇಕ್ ಮಾಡಲು ಹೋಗಿ ಸಾಧ್ಯವಾಗದೇ ಇದ್ದಾಗ ಬೈಕನ್ನು ನಿಧಾನವಾಗಿ ಎಡಗಡೆಯಿಂದ ಚಲಾಯಿಸಿದ್ದಾನೆ. ಎಡಭಾಗದಲ್ಲಿ ಬೈಕ್ ಇದೆ ಎನ್ನುವುದನ್ನು ಗಮನಿಸದೇ ಚಾಲಕ ಕಂಟೈನರ್ ಚಲಾಯಿಸಿದ್ದಾನೆ. ಮುಂದಕ್ಕೆ ಹೋಗುತ್ತಿದ್ದಂತೆ ಕಂಟೈನರ್ ಎಡಭಾಗ ಬೈಕಿಗೆ ಹೊಡೆದಿದೆ. ಈ ವೇಳೆ ಬೈಕನ್ನು ನಿಯಂತ್ರಣ ಮಾಡಲು ಸಾಧ್ಯವಾಗದ ಕಾರಣ ಬೈಕಿನ ಜೊತೆಗೆ ಸವಾರ ರಸ್ತೆಗೆ ಬಿದ್ದಿದ್ದಾನೆ. ಒಂದು ವೇಳೆ ಮೊದಲೇ ರಸ್ತೆಗೆ ಸವಾರ ಬಿದ್ದಿದ್ದರೆ ಆತನ ಮೇಲೆ ಹಿಂದುಗಡೆ ಚಕ್ರ ಹರಿಯುವ ಸಾಧ್ಯತೆ ಇತ್ತು.

ಈ ಎಲ್ಲ ದೃಶ್ಯಗಳು ಹಿಂದೆ ಬರುತ್ತಿದ್ದ ಕಾರಿನ ಡ್ಯಾಶ್ ಕ್ಯಾಮೆರಾದಲ್ಲಿ ಸೆರೆಯಾಗಿದೆ. ಈ ವಿಡಿಯೋದಲ್ಲಿ ಬೈಕ್ ಸವಾರ ಪವಾಡ ಎಂಬಂತೆ ಪಾರಾಗಿದ್ದಾನೆ. ಬೈಕ್ ಸವಾರ ಪಾರಾದ ಈ ವಿಡಿಯೋವನ್ನು ನೋಡಿದರೆ, ಎಂತಹವರಿಗಾದರೂ ಮೈ ಜುಮ್ ಎಂದು ಅನಿಸುತ್ತದೆ.

ಶುಕ್ರವಾರ ಬೆಳಗ್ಗೆ ಹೂಸೂರಿನಿಂದ ಎಲೆಕ್ಟ್ರಾನಿಕ್ ಸಿಟಿ ಕಡೆಗೆ ಹೋಗುವ ವೇಳೆ ರಸ್ತೆ ಫುಲ್ ಟ್ರಾಫಿಕ್ ಜಾಮ್ ಆಗಿತ್ತು. ಈ ವೇಳೆ ಕೆಲಸಕ್ಕೆ ಟೈಮ್ ಆಗಿದೆ ಗೆಳತಿಯನ್ನು ಪಿಕ್ ಮಾಡಬೇಕು ಎಂದು ಬೈಕ್ ಸವಾರ ಆತುರದಲ್ಲಿ ಹೋಗುತ್ತಿದ್ದಾಗ ಈ ಘಟನೆ ನಡೆದಿದೆ ಎನ್ನುವ ವಿಚಾರ ತಿಳಿದು ಬಂದಿದೆ.

ಪಬ್ಲಿಕ್ ಟಿವಿಯನ್ನು ಇನ್ ಸ್ಟಾಗ್ರಾಮ್ ನಲ್ಲಿ ಫಾಲೋ ಮಾಡಿ www.instagram.com/publictv , ಪಬ್ಲಿಕ್ ಟಿವಿ ಆ್ಯಪ್ ಡೌನ್‍ಲೋಡ್ ಮಾಡಿ: play.google.com/publictv