ಬೆಂಗಳೂರು: ರಾಜ್ ಸೂರ್ಯ ನಿರ್ದೇಶನದ ಲಂಡನ್ ನಲ್ಲಿ ಲಂಬೋದರ ಚಿತ್ರ ಇದೇ ಮಾರ್ಚ್ 29ರಂದು ತೆರೆ ಕಾಣುತ್ತಿದೆ. ಇದೇ ಹೊತ್ತಿನಲ್ಲಿ ಈ ಚಿತ್ರದ ವಿಶಿಷ್ಟವಾದ ಟ್ರೈಲರ್ ಹಾಗೂ ಆಡಿಯೋ ಬಿಡುಗಡೆ ಮಾಡಲು ಚಿತ್ರ ತಂಡ ನಿರ್ಧರಿಸಿದೆ. ಅಂದಹಾಗೆ ನಿರ್ದೇಶಕ, ನಟ ರಿಷಬ್ ಶೆಟ್ಟಿ ಇದನ್ನು ಬಿಡುಗಡೆಗೊಳಿಸಲಿದ್ದಾರೆ.
ನಾಳೆ ಸಂಜೆ ಈ ಚಿತ್ರದ ಟ್ರೈಲರ್ ಮತ್ತು ಆಡಿಯೋವನ್ನು ರಿಷಬ್ ಶೆಟ್ಟಿ ಬಿಡುಗಡೆಗೊಳಿಸಲಿದ್ದಾರೆ. ರಿಷಬ್ ಇದಕ್ಕೆ ಒಪ್ಪಿಕೊಂಡಿರೋದು ಚಿತ್ರ ಮೂಡಿ ಬಂದಿರೋ ಸೊಗಸಿನ ಕಾರಣಕ್ಕೆ. ಈ ಸಿನಿಮಾವನ್ನು ವೀಕ್ಷಿಸಿದ ರಿಷಬ್ ಥ್ರಿಲ್ ಆಗಿಯೇ ಆಡಿಯೋ ಮತ್ತು ಟ್ರೈಲರ್ ಬಿಡುಗಡೆ ಮಾಡಲು ಒಪ್ಪಿಕೊಂಡಿದ್ದಾರಂತೆ.
ಸಿಂಪಲ್ ಸುನಿ ಬಳಿಯಲ್ಲಿ ಹಲವಾರು ವರ್ಷಗಳಿಂದ ಕೆಲಸ ಮಾಡಿರೋ ರಾಜ್‍ಸೂರ್ಯ ಈ ಚಿತ್ರದ ಮೂಲಕ ಸ್ವತಂತ್ರ ನಿರ್ದೇಶಕರಾಗಿದ್ದಾರೆ. ಭವಿಷ್ಯದ ಮೇಲೆ ನಂಬಿಕೆ ಮತ್ತು ಈ ನಡುವೆ ದಿನವಿಡೀ ನಡೆಯೋ ವಿದ್ಯಮಾನಗಳನ್ನು ನಾಯಕ ಹೇಗೆಲ್ಲ ಎದುರಿಸುತ್ತಾನೆಂಬುದನ್ನು ಹಾಸ್ಯ ಪ್ರಧಾನ ಶೈಲಿಯಲ್ಲಿ ಕಟ್ಟಿ ಕೊಡಲು ರಾಜ್ ಸೂರ್ಯ ಯತ್ನಿಸಿದ್ದಾರಂತೆ.
ಯುಕೆಯಲ್ಲಿ ವಾಸವಾಗಿರೋ ಮೈಸೂರು ಮೂಲದ ಸಂತೋಷ್ ಈ ಚಿತ್ರದ ಮೂಲಕ ನಾಯಕನಾಗಿ ಬಣ್ಣ ಹಚ್ಚಿದ್ದಾರೆ. ಬಿಗ್‍ಬಾಸ್ ಸ್ಪರ್ಧಿಯಾಗಿದ್ದ ಶ್ರುತಿ ಲಂಬೋದರನ ನಾಯಕಿಯಾಗಿ ನಟಿಸಿದ್ದಾರೆ. ಅಚ್ಯುತ ಕುಮಾರ್ ಮತ್ತು ಸಾಧು ಕೋಕಿಲಾ ಮುಂತಾದವರೂ ನಟನೆಯಲ್ಲಿ ಸಾಥ್ ನೀಡಿದ್ದಾರೆ.
ಪ್ರಶಾಂತ್ ರಾಜಪ್ಪ ಸಂಭಾಷಣೆ ಬರೆದಿರೋ ಈ ಚಿತ್ರಕ್ಕೆ ರಂಜಿತ್ ರಾ.ಸ ಸಂಕಲನ, ರಾಘು ಅವರ ಕಲಾ ನಿರ್ದೇಶನವಿದೆ. ಲಂಡನ್‍ನಲ್ಲಿ ನೆಲೆಸಿರೋ ಕನ್ನಡಿಗರಾದ ಕಲ್ಯಾಣ್, ಡಾ. ಸಚ್ಚಿ, ಡಾ. ವಿಶ್ವನಾಥ್ ಸೇರಿದಂತೆ ಹದಿನೈದು ಮಂದಿ ಸೇರಿಕೊಂಡು ಈ ಚಿತ್ರವನ್ನು ನಿರ್ಮಾಣ ಮಾಡಿದ್ದಾರೆ. ಪ್ರಣವ ಅವರು ಹಾಡುಗಳಿಗೆ ಹೊಸಾ ಬಗೆಯ ಸಂಗೀತ ಸ್ಪರ್ಶ ನೀಡಿದ್ದಾರೆ.
