ಲಕ್ನೋ: ಹುಡುಗಿಯರ ಮೇಲೆ ಲೈಂಗಿಕ ದೌರ್ಜನ್ಯ ಎಸಗುತ್ತಿದ್ದ ಆರೋಪದ ಮೇಲೆ ನಿವೃತ್ತ ಎಲ್‍ಐಸಿ ಅಧಿಕಾರಿಯನ್ನು ಬಂಧಿಸಿರುವ ಘಟನೆ ಉತ್ತರ ಪ್ರದೇಶದ ಮೀರತ್ ನಲ್ಲಿ ನಡೆದಿದೆ.
ತಾನೇ ಸೆಕ್ಯೂರಿಟಿಗೆಂದು ಅಳವಡಿಸಿದ್ದ ಸಿಸಿಟಿವಿಯಲ್ಲಿ ಆತನ ಕೃತ್ಯ ಬಯಲಾಗಿದ್ದು, ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದೆ. ನಂತರ ಪೊಲೀಸರು ಆರೋಪಿಯನ್ನು ಬಂಧಿಸಿದ್ದಾರೆ. ಆರೋಪಿಯನ್ನು 62 ವರ್ಷದ ಆರೋಪಿ ವಿಮಲ್ ಚಂದ್ ಎಂದು ಗುರುತಿಸಲಾಗಿದೆ.
ಏನಿದು ಪ್ರಕರಣ?
62ರ ತಾತಾ ಮೂಲತಃ ಉತ್ತರ ಪ್ರದೇಶ ಉನ್ನವೌ ಜಿಲ್ಲೆಯವನಾಗಿದ್ದು, ಈತ ಎಲ್‍ಐಸಿಯಲ್ಲಿ ಏಜೆಂಟ್ ಆಗಿ ಕೆಲಸ ಮಾಡುತ್ತಿದ್ದನು. ಐದು ವರ್ಷಗಳ ಹಿಂದೆ ವಿಮಲ್ ಚಂದ್ ನಿವೃತ್ತಿ ಹೊಂದಿದ್ದನು. ಆರೋಪಿಯ ಪತ್ನಿ 2015 ರಲ್ಲಿ ಮೃತಪಟ್ಟಿದ್ದರು. ನಂತರ ಮನೆಯಲ್ಲಿ ಒಬ್ಬನೇ ವಾಸವಾಗಿದ್ದನು. ಹೀಗಾಗಿ ಸೆಕ್ಯೂರಿಟಿಗಾಗಿ ಕಳೆದ ವರ್ಷ ನವೆಂಬರ್ ತಿಂಗಳಿನಲ್ಲಿ ಮನೆಗೆ ಸಿಸಿಟಿವಿ ಹಾಕಿಸಿದ್ದನು.
ಆರೋಪಿಯ ಮನೆಗೆ ಆಶು ಕಶ್ಯಪ್ ಎಂಬಾತ ಸಿಸಿಟಿವಿ ಅಳವಡಿಸಿದ್ದನು. ಕಾಸರು ಬುಕ್ಷಾರ್ ನಲ್ಲಿ ವಾಸಿಸುತ್ತಿದ್ದನು. ಕಶ್ಯಪ್‍ಗೆ ತಾನು ಹಾಕಿದ್ದ ಕ್ಯಾಮೆರಾ ಇಂಟರ್ ನೆಟ್ ಪಾಸ್‍ವರ್ಡ್ ತಿಳಿದಿತ್ತು. ನಂತರ ಆತ ಅದನ್ನು ತನ್ನ ಮೊಬೈಲ್‍ಗೆ ಕನೆಕ್ಟ್ ಮಾಡಿಕೊಂಡು ಚಂದ್ ಮನೆಯಲ್ಲಿ ನಡೆಯುತ್ತಿದ್ದುದ್ದನ್ನು ನೋಡುತ್ತಿದ್ದನು ಎಂದು ಎಸ್‍ಪಿ ಅಖಿಲೇಶ್ ನಾರಾಯಣ್ ತಿಳಿಸಿದ್ದಾರೆ.
ರಹಸ್ಯ ಬಯಲು:
ಕಟ್ಟಡದಲ್ಲಿ ಕೆಲಸ ಮಾಡುತ್ತಿದ್ದ ಹುಡುಗಿಯರನ್ನು ಮನೆಗೆ ಕರೆಯುತ್ತಿದ್ದು, ಅವರಿಗೆ ಲೈಂಗಿಕ ಕಿರುಕುಳ ನೀಡುತ್ತಿದ್ದನು. ಇದು ಸಿಸಿಟಿವಿಯಲ್ಲಿ ಸೆರೆಯಾಗಿದೆ. ನಂತರ ಕಶ್ಯಪ್ ಅದನ್ನು ಪೊಲೀಸರಿಗೆ ಹೇಳದೆ ಚಂದ್‍ಗೆ ಬ್ಲಾಕ್‍ಮೇಲ್ ಮಾಡಲು ಶುರುಮಾಡಿದ್ದಾನೆ. 25 ಲಕ್ಷ ರೂಪಾಯಿ ನೀಡದೇ ಹೋದರೆ ಯುವತಿಯರಿಗೆ ನೀಡಿದ ಲೈಂಗಿಕ ದೌರ್ಜನ್ಯದ ವಿಡಿಯೋವನ್ನು ಸಾಮಾಜಿಕ ಜಾಲತಾಣಗಳಲ್ಲಿ ಅಪ್ಲೋಡ್ ಮಾಡುವುದಾಗಿ ಬೆದರಿಕೆವೊಡ್ಡಿದ್ದಾನೆ.
ಇತ್ತ ಚಂದ್ ಕೂಡ ಹಣ ಕೊಡುವುದಾಗಿ ಒಪ್ಪಿಕೊಂಡಿದ್ದಾನೆ. ಆದರೆ ಅನೇಕ ದಿನಗಳಾದರೂ ಕಶ್ಯಪ್‍ಗೆ ಹಣ ನೀಡಿರಲಿಲ್ಲ. ಇದರಿಂದ ಕೋಪಗೊಂಡ ಕಶ್ಯಪ್ ವಿಡಿಯೋಗಳನ್ನು ಸಾಮಾಜಿಕ ಜಾಲತಾಣದಲ್ಲಿ ಅಪ್ಲೋಡ್ ಮಾಡಿದ್ದಾನೆ. ಈ ವಿಡಿಯೋ ವೈರಲ್ ಆಗುತ್ತಿದ್ದಂತೆ ಪೊಲೀಸರು ತಕ್ಷಣವೇ ಇಬ್ಬರನ್ನು ಪತ್ತೆ ಮಾಡಿ ಬಂಧಿಸಿದ್ದಾರೆ. ಈ ಕುರಿತು ಪ್ರಕರಣವನ್ನು ದಾಖಲಿಸಿಕೊಂಡಿದ್ದು, ತನಿಖೆ ಶುರುಮಾಡಿದ್ದಾರೆ.
