ಕಲಬುರಗಿ: ಇವತ್ತಿನ ನಮ್ಮ ಪಬ್ಲಿಕ್ ಹೀರೋ ಇರೋದು ಕೇವಲ ಎರಡೂವರೆ ಅಡಿ ಎತ್ತರ. ಆದರೆ ತಾನು ಕುಬ್ಜೆ ಅಂತಾ ಕೈ ಕೊಟ್ಟಿ ಕೂರಲಿಲ್ಲ. ಇಡೀ ಸಂಸಾರದ ದೊಡ್ಡ ಜವಾಬ್ದಾರಿ ಹೊತ್ತಿದ್ದಾರೆ. ಉತ್ತಮ ಜೀವನ ಕಟ್ಟಿಕೊಂಡು ಇತರೆ ಮಹಿಳೆಯರಿಗೂ ಮಾದರಿಯಾಗಿದ್ದಾರೆ.
ಕಲಬುರಗಿ ನಗರದ ಜೇವರ್ಗಿ ಕಾಲೋನಿಯ ನಿವಾಸಿ ಲಕ್ಷ್ಮಿ ಕುಲಕರ್ಣಿ ಇವತ್ತಿನ ನಮ್ಮ ಪಬ್ಲಿಕ್ ಹೀರೋ. ತಮ್ಮ ಕಾಲೋನಿಯ ಗುರುರಾಯರ ಮಠದ ಪ್ರಾಂಗಣದಲ್ಲಿ ಪೂಜಾ ಸಾಮಗ್ರಿಗಳನ್ನು ಮಾರಾಟ ಮಾಡಿ ಜೀವನ ಕಟ್ಟಿಕೊಂಡಿದ್ದಾರೆ. ಈ ಮೂಲಕ ಮಹಿಳೆ ಅಬಲೆಯಲ್ಲ, ಸಬಲೆ ಅಂತಾ ತೋರಿಸಿ ಕೊಟ್ಟಿದ್ದಾರೆ.
ಇನ್ನು ಲಕ್ಷ್ಮಿ ಸಹೋದರ ಲಿಂಗರಾಜ್ ನಿರುದ್ಯೋಗಿಯಾಗಿದ್ದರು. ಆಗ ಲಕ್ಷ್ಮೀ ತನ್ನ ಸಹೋದರನಿಗೆ ಕೋಲಾರದ ಮುಳುಬಾಗಿಲು ಶ್ರೀಪಾದರಾಜರ ಮಠದಂಗಳದಲ್ಲಿ ಒಂದು ಅಂಗಡಿ ಹಾಕಿಕೊಟ್ಟಿದ್ದಾರೆ.ಚಿಕ್ಕ ವಯಸ್ಸಿನಲ್ಲಿಯೇ ಪೋಷಕರನ್ನು ಕಳೆದುಕೊಂಡ ಲಕ್ಷ್ಮಿ ಇತರೆ ಮಹಿಳೆಯರಂತೆ ಧೃತಿಗೆಡದೇ ಜೀವನ ಕಟ್ಟಿಕೊಂಡಿದ್ದಾರೆ.
