ಬೆಂಗಳೂರು: ಕೆಜಿಎಫ್-ಚಾಪ್ಟರ್ 2 ಶೂಟಿಂಗ್ನಲ್ಲಿ ಬ್ಯುಸಿಯಾಗಿರುವ ರಾಕಿಂಗ್ ಸ್ಟಾರ್ ಯಶ್ ರಾಕಿ ಬಾಯ್ ಸ್ಟೈಲ್ನಲ್ಲಿ ತಮ್ಮ ಊರಿಗೆ ‘ಪ್ರಧಾನ ಮಂತ್ರಿ’ಯನ್ನು ಬರಮಾಡಿಕೊಂಡಿದ್ದಾರೆ.
ಹೌದು. ಚಿತ್ರರಂಗದಲ್ಲೇ ಧೂಳೆಬ್ಬಿಸಲು ಸಜ್ಜಾಗುತ್ತಿರುವ ಕೆಜಿಎಫ್-ಚಾಪ್ಟರ್ 2 ಸಿನಿಮಾದ ಮೇಲೆ ಎಲ್ಲರ ಕಣ್ಣಿದೆ. ಸದ್ಯ ಶೂಟಿಂಗ್ನಲ್ಲಿ ಚಿತ್ರತಂಡ ಬ್ಯುಸಿಯಾಗಿದ್ದು, ದೊಡ್ಡ ತಾರಾಗಣವೇ ಚಿತ್ರದಲ್ಲಿದೆ. ಈ ನಡುವೆ ಕೆಜಿಎಫ್-ಚಾಪ್ಟರ್ 2ರಲ್ಲಿ ಪ್ರಧಾನ ಮಂತ್ರಿ ರಮಿಕಾ ಸೇನ್ ಪಾತ್ರದಲ್ಲಿ ನಟಿಸಲಿರುವ ಬಾಲಿವುಡ್ ನಟಿ ರವೀನಾ ಟಂಡನ್ ಅವರನ್ನು ಯಶ್ ಪ್ರೀತಿಯಿಂದ ಸ್ವಾಗತಿಸಿದ್ದಾರೆ. ಜೊತೆಗೆ ರಾಕಿಭಾಯ್ ಸಾಮ್ರಾಜ್ಯಕ್ಕೆ ರಮಿಕಾ ಸೇನ್ರನ್ನ ಸ್ವಾಗತಿಸಲ್ಲ, ಆದ್ರೆ ರವೀನಾ ಅವರಿಗೆ ಯಶ್ ಊರಿಗೆ ಸ್ವಾಗತ ಎಂದು ರಾಕಿಂಗ್ ಸ್ಟಾರ್ ಇನ್ಸ್ಟಾಗ್ರಾಮ್ನಲ್ಲಿ ಪೋಸ್ಟ್ ಮಾಡಿದ್ದಾರೆ. ಇದನ್ನೂ ಓದಿ: “ಡೆತ್ ವಾರೆಂಟ್ ಜಾರಿ ಮಾಡಲು ಬಂದ್ರು ರವೀನಾ”
https://www.instagram.com/p/B8cAOYanL72/
ಪೋಸ್ಟ್ನಲ್ಲಿ ಏನಿದೆ?
ರಮಿಕಾ ಸೇನ್ರನ್ನು ರಾಕಿಭಾಯ್ ಸಾಮ್ರಾಜ್ಯಕ್ಕೆ ಸ್ವಾಗತ ಮಾಡದೆ ಇರಬಹುದು. ಆದ್ರೆ ರವೀನಾ ಅವರನ್ನ ಖಂಡಿತವಾಗಿಯು ಯಶ್ ಊರಿಗೆ ಸ್ವಾಗತಿಸುತ್ತೇನೆ. ನೀವು ಬಂದಿರುವುದು ಸಂತೋಷವಾಗಿದೆ, ಸಂಭ್ರಮಿಸೋಣ ಎಂದು ಬರೆದು ರವೀನಾ ಅವರ ಜೊತೆ ತಾವು ಇರುವ ಫೋಟೋವನ್ನ ಯಶ್ ಇನ್ಸ್ಟಾದಲ್ಲಿ ಹಂಚಿಕೊಂಡಿದ್ದಾರೆ.
ಕೆಜಿಎಫ್ ಅಂಗಳಕ್ಕೆ ಬಾಲಿವುಡ್ ಚೆಲುವೆ ರವೀನಾ ಟಂಡನ್ ಎಂಟ್ರಿ ನೀಡಿದ್ದಾರೆ. ನಿರ್ದೇಶಕ ಪ್ರಶಾಂತ್ ನೀಲ್ ಜೊತೆಗೆ ರವೀನಾ ಟಂಡನ್ ನಿಂತಿರುವ ಫೋಟೋವನ್ನು ಹಂಚಿಕೊಂಡು ಸ್ವಾಗತ ಕೋರಿದ್ದರು.
ಮೊದಲು ಎಕ್ಸೆಲ್ ಎಂಟರ್ ಟೈನ್ಮೆಂಟ್ ಟ್ವಿಟ್ಟರ್ ನಲ್ಲಿ ರವೀನಾ ಮತ್ತು ಪ್ರಶಾಂತ್ ನೀಲ್ ಜೊತೆಗಿನ ಫೋಟೋ ಹಂಚಿಕೊಂಡು, ಡೆತ್ ವಾರೆಂಟ್ ಜಾರಿ ಮಾಡಲು ಬಂದ ಶಕ್ತಿಶಾಲಿ ಮಹಿಳೆಗೆ ಕೆಜಿಎಫ್ -2 ಸಿನಿಮಾ ಅಂಗಳಕ್ಕೆ ಸ್ವಾಗತ ಎಂದು ಬರೆದು ಚಿತ್ರತಂಡದ ಇತರರಿಗೂ ಟ್ಯಾಗ್ ಮಾಡಿದ್ದರು. ಟ್ವೀಟಿಗೆ ಪ್ರತಿಕ್ರಿಯಿಸಿರುವ ನಟಿ ಶ್ರೀನಿಧಿ ಶೆಟ್ಟಿ, ತುಂಬಾ ಉತ್ಸುಕಳಾಗಿದ್ದೇನೆ ಎಂದು ಬರೆದು ವೆಲ್ ಕಮ್ ಮಾಡಿಕೊಂಡಿದ್ದರು. ನಿರ್ಮಾಪಕ ವಿಜಯ್ ಕಿರಗಂದೂರ್, ರಾಷ್ಟ್ರೀಯ ಪ್ರಶಸ್ತಿ ವಿಜೇತ ರವೀನಾ ಟಂಡನ್ ಅವರಿಗೆ ಆತ್ಮೀಯ ಸ್ವಾಗತ ಎಂದು ಬರೆದುಕೊಂಡಿದ್ದರು.
ರವೀನಾ ಇಲ್ಲಿ ಎಪ್ಪತ್ತರ ದಶಕದ ಆಚೀಚಿನ ಪ್ರಧಾನ ಮಂತ್ರಿಯ ಪಾತ್ರದಲ್ಲಿ ನಟಿಸಲಿದ್ದಾರೆ. ಮೊದಲ ಭಾಗದಲ್ಲಿ ಈ ಪಾತ್ರದ ಬಗ್ಗೆ ಒಂದು ಸಣ್ಣ ಸುಳಿವು ನೀಡಲಾಗಿತ್ತು. ಈ ಪಾತ್ರದ ಬಗ್ಗೆ ರವೀನಾ ಕೂಡಾ ಖುಷಿಗೊಂಡಿದ್ದಾರೆಂಬ ಮಾಹಿತಿ ಇದ್ದು ಈ ವಿಚರವಾಗಿ ಅಧಿಕೃತ ಮಾಹಿತಿಗಳು ಇನ್ನಷ್ಟೇ ಹೊರ ಬರಬೇಕಿದೆ. ಈ ಮೂಲಕ ದಶಕಗಳ ನಂತರ ರವೀನಾ ಕನ್ನಡಕ್ಕೆ ಮತ್ತೆ ಮರಳಿದಂತಾಗುತ್ತದೆ. ತೊಂಭತ್ತರ ದಶಕದಲ್ಲಿ ಉಪೇಂದ್ರ ಚಿತ್ರದಲ್ಲಿ ರವೀನಾ ಉಪ್ಪಿಗೆ ಜೋಡಿಯಾಗಿ ನಟಿಸಿದ್ದರು.
ತಮ್ಮ ಕಂಬ್ಯಾಕ್ ಬಗ್ಗೆ ಮಾತನಾಡಿರುವ ರವೀನಾ ಟಂಡನ್, ನಿರ್ದೇಶಕ ಪ್ರಶಾಂತ್ ನೀಲ್ ಮೊದಲೇ ಕಥೆ ಒನ್ಲೈನ್ ಹೇಳಿದ್ದರು. ಬಳಿಕ ಚಿತ್ರಕಥೆ ಮತ್ತು ಪಾತ್ರವನ್ನು ವಿವರಿಸಿದ್ದರು. ಆಗಿನ್ನೂ ಕೆಜಿಎಫ್ ಚಾಪ್ಟರ್ 1 ರಿಲೀಸ್ ಆಗಿರಲಿಲ್ಲ. ಚಿತ್ರ ನೋಡಿದ ಮೇಲೆ ಇದೊಂದು ಬೇರೆ ಲೆವೆಲ್ಲಿನ ಸಿನಿಮಾ ಎಂಬುದು ಗೊತ್ತಾಯಿತು. ಹಾಗೆಯೇ ಕಥೆ ಮತ್ತು ನಾನು ಮಾಡಬೇಕಾದ ಪಾತ್ರದ ಬಗ್ಗೆ ತಿಳಿಯಿತು. ಅಲ್ಲದೆ ಚಿತ್ರದಲ್ಲಿ ಅತ್ಯಂತ ಮಹತ್ವದ ಪಾತ್ರವನ್ನು ನಿರ್ವಹಿಸುತ್ತಿದ್ದೇನೆ. ಹೀಗಾಗಿ ಕೆಜಿಎಫ್ 2ನಲ್ಲಿ ಕಾಣಿಸಿಕೊಳ್ಳಲು ಒಪ್ಪಿಕೊಂಡೆ ಎಂದು ಹೇಳಿದ್ದಾರೆ.
ಅಲ್ಲದೇ ರವೀನಾ ಅವರಿಗೆ ಮಾತ್ರವಲ್ಲ ಅವರ ಪತಿ ಅನಿಲ್ ತಡಾನಿ ಅವರಿಗೂ ಕೆಜಿಎಫ್ಗು ಕನೆಕ್ಷನ್ ಇದೆ. ಈ ಹಿಂದೆ ಹಿಂದಿ ಭಾಷೆಯಲ್ಲಿ ಮೂಡಿಬಂದಿದ್ದ ಕೆಜಿಎಫ್ ಚಿತ್ರವನ್ನು ಅನಿಲ್ ತಡಾನಿ ವಿತರಿಸಿದ್ದರು. ಹಾಗೆಯೇ ಹಿಂದಿಯ ಕೆಜಿಎಫ್-ಚಾಪ್ಟರ್ 2 ಸಿನಿಮಾದ ವಿತರಣೆಯನ್ನೂ ಅನಿಲ್ ತಡಾನಿ ಪ್ರೊಡಕ್ಷನ್ ಮೂಲಕವೇ ಮಾಡಲಾಗುತ್ತಿದೆ.
