ತಿರುವನಂತಪುರ: ಸಾಮಾನ್ಯವಾಗಿ ಫೋಟೋಗ್ರಾಫರ್ ತೆಗೆದ ಫೊಟೋಗಳು ವೈರಲ್ ಆಗುವುದನ್ನು ನೋಡಿದ್ದೇವೆ. ಆದ್ರೆ ಇದೀಗ ವಧು-ವರರ ಫೋಟೋ ತೆಗೆಯುತ್ತಿರೋ ಫೋಟೋಗ್ರಾಫರೇ ಸಾಮಾಜಿಕ ಜಾಲತಾಣದಲ್ಲಿ ಸಖತ್ ವೈರಲ್ ಆಗಿದ್ದಾರೆ.
ಈ ಘಟನೆ ಕೇರಳದಲ್ಲಿ ನಡೆದಿದೆ. ವಿಡಿಯೋದಲ್ಲಿ ಮಲಯಾಳಂ ಮಾತನಾಡುತ್ತಾ, ನಗುವುದನ್ನು ಗಮನಿಸಬಹುದು. ಸದ್ಯ ಈ ವಿಡಿಯೋ ಇದೀಗ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದ್ದು, ಸಾಕಷ್ಟು ಪರ-ವಿರೋಧ ಕಾಮೆಂಟ್ ಗಳು ಹರಿದಾಡುತ್ತಿವೆ.
ವಿಡಿಯೋದಲ್ಲೇನಿದೆ?: ವಧು-ವರರ ಫೋಟೋ ತೆಗೆಯುತ್ತಿರೋ ಫೋಟೋಗ್ರಾಫರ್, ಅವರ ಫೋಟೋವನ್ನು ವಿವಿಧ ಭಂಗಿಗಳಲ್ಲಿ ತೆಗೆಯಲೆಂದು ಮರವೇರುತ್ತಾರೆ. ನಂತ್ರ ಮರದ ಕೊಂಬೆಗೆ ಕಾಲುಗಳಿಂದ ಜೋತು ಬಿದ್ದು ತೆಗೆದಿದ್ದಾರೆ.
ವಧು-ವರರು ಕೆಳಗೆ ನಿಂತು, ಫೋಟೋಗ್ರಾಫರ್ ಜೋತು ಬಿದ್ದು ಫೋಟೋ ತೆಗೆಯುತ್ತಿರುವ ದೃಶ್ಯವನ್ನು ಅಲ್ಲೇ ಇದ್ದ ವ್ಯಕ್ತಿಯೊಬ್ಬರು ತಮ್ಮ ಮೊಬೈಲ್ ನಲ್ಲಿ ಸೆರೆಹಿಡಿದಿದ್ದಾರೆ. ಈ ವಿಡಿಯೋವನ್ನು ನವದಂಪತಿಗಳು ಫೇಸ್ ಬುಕ್ ಮತ್ತು ಇನ್ ಸ್ಟಾಗ್ರಾಮ್ ನಲ್ಲಿ ಹಾಕಿದ ತಕ್ಷಣವೇ ಸಾವಿರಾರು ಮಂದಿ ವೀಕ್ಷಿಸಿ ಕಮೆಂಟ್ ಮಾಡಿದ್ದಾರೆ. ಫೋಟೋ ತೆಗೆದಿರುವ ಫೋಟೋಗ್ರಾಫರ್ ನ ಸಾಹಸ ಮತ್ತು ಕಾರ್ಯತತ್ಪರತೆ ಕುರಿತು ಸಾಮಾಜಿಕ ಜಾಲತಾಣಗಳಲ್ಲಿ ಬಹಳ ಪ್ರಶಂಸೆ ವ್ಯಕ್ತವಾಗಿದೆ.
ಮರದ ಕೊಂಬೆ ನೆಲದಿಂದ ಸುಮಾರು ಅಡಿಗಳ ಅಂತರದಲ್ಲಿ ಇದೆ. ಜೋತು ಬಿದ್ದ ಫೋಟೋಗ್ರಾಫರ್, ತನ್ನ ಕೈಯಲ್ಲಿ ಕ್ಯಾಮೆರಾ ಹಿಡಿದು ಫೋಟೊ ತೆಗೆಯುವುದರಲ್ಲಿ ಮಗ್ನರಾಗಿದ್ದರು. ಅವರ ಕಾಲುಗಳಷ್ಟೇ ಆಧಾರವಾಗಿತ್ತು. ಒಂದು ವೇಳೆ ಕಾಲುಗಳು ಜಾರಿದಲ್ಲಿ ಇಲ್ಲ ಕೊಂಬೆ ಮುರಿದಲ್ಲಿ ತಲೆಗೆ ಅಪಾಯ ಖಚಿತವಾಗಿತ್ತು ಅಂತಾ ಕೆಲವರು ಭಯ ವ್ಯಕ್ತಪಡಿಸಿದ್ದಾರೆ.
ವಿಭಿನ್ನ ಭಂಗಿಗಳಲ್ಲಿ ಫೋಟೋ ತೆಗೆದ್ದಿದ್ದರಿಂದ ದಂಪತಿ ಫೋಟೋಗ್ರಾಫರ್ ಗೆ ಧನ್ಯವಾದ ಸಲ್ಲಿಸಿದ್ದಾರೆ. ಫೋಟೋ ತೆಗೆದ ನಂತರ ದಂಪತಿ ಖುಷಿಯಿಂದ ಸ್ಥಳದಿಂದ ಹೊರಟಿದ್ದಾರೆ. ಫೋಟೋಗ್ರಾಫರ್ ಕೂಗಿ ಕ್ಯಾಮೆರಾ ಹಿಡಿಯಲು ಹೇಳಿ ಮರದಿಂದ ಕೆಳಗೆ ಇಳಿದಿದ್ದಾರೆ.
