ಬೆಂಗಳೂರು: ಶುಕ್ರವಾರ ಬಂದ್ರೆ ಸಾಕು ಸ್ಯಾಂಡಲ್ವುಡ್ ರಂಗೇರಿಬಿಡುತ್ತೆ. ಆದರೆ ನಾಳೆ ಕರ್ನಾಟಕದಲ್ಲಿ ಚಿತ್ರ ರಸಿಕರ ಪಾಲಿಗೆ ನಿರಾಶೆಯ ದಿನ. ನಾಳೆ ಇಡೀ ದಿನ ಕರ್ನಾಟಕದಲ್ಲಿ ಯಾವುದೇ ಸಿನಿಮಾ ಪ್ರದರ್ಶನ ಇರುವುದಿಲ್ಲ. ಹೊಸ ಸಿನಿಮಾಗಳು ರಿಲೀಸ್ ಆಗಲ್ಲ. ಹಳೆಯ ಸಿನಿಮಾಗಳ ಪ್ರದರ್ಶನವೂ ಇರಲ್ಲ.
ಸಿಂಗಲ್ಸ್ಕ್ರೀನ್ ಚಿತ್ರಮಂದಿರಗಳ ಜೊತೆ ಮಲ್ಟಿಪ್ಲೆಕ್ಸ್ ಗಳಲ್ಲೂ ಚಿತ್ರ ಪ್ರದರ್ಶನ ಇರಲ್ಲ. ಸಂಸ್ಥೆಗಳ ಶುಲ್ಕ ಹೆಚ್ಚಳ ಸಂಬಂಧ ಯುಎಫ್ಓ, ಕ್ಯೂಬ್ ನಡುವಿನ ಬಿಕ್ಕಟ್ಟಿನ ಕುರಿತಾಗಿ ದಕ್ಷಿಣ ಭಾರತ ವಾಣಿಜ್ಯ ಮಂಡಳಿ ಈ ತೀರ್ಮಾನಕ್ಕೆ ಬಂದಿದ್ದು ನಾಳೆ ಕನ್ನಡ ಚಲನಚಿತ್ರ ವಾಣಿಜ್ಯ ಮಂಡಳಿ ಸಾಂಕೇತಿಕವಾಗಿ ಪ್ರದರ್ಶನ ರದ್ಧುಗೊಳಿಸಿ ಹೋರಾಟಕ್ಕಿಳಿದಿದೆ.
ಶನಿವಾರದಿಂದ ಹಳೆಯ ಸಿನಿಮಾಗಳ ಪ್ರದರ್ಶನ ಶುರುವಾಗಲಿದೆ. ಈ ನಡುವೆ ಯುಎಫ್ಓ ಕ್ಯೂಬ್ ಸಂಧಾನಕ್ಕೆ ಬರದಿದ್ದ ಪಕ್ಷದಲ್ಲಿ ದಕ್ಷಿಣ ಭಾರತೀಯ ಚಿತ್ರೋದ್ಯಮ ಪರ್ಯಾಯ ವ್ಯವಸ್ಥೆ ಮಾಡಿಕೊಳ್ಳಲು ತೀರ್ಮಾನಿಸಿದೆ. ಈ ವಿಚಾರವಾಗಿ ನಿರ್ಮಾಪಕರ ವಲಯ, ಪ್ರದರ್ಶಕರ ವಲಯ ಮತ್ತು ವಿತರಕರ ವಲಯ ಸಾಥ್ ನೀಡಿದೆ.