ಬಳ್ಳಾರಿ‌ ನೆಲದಲ್ಲಿ ರೆಡ್ಡಿ ಬ್ರದರ್ಸ್ ಬ್ಯಾಟಲ್ - ರಿಯಲ್ಲಾ?ಗೇಮ್ ಪ್ಲಾನಾ? | Public TV - Latest Kannada News, Public TV Kannada Live, Public TV News

ಬೆಂಗಳೂರು: ಮುಂಬರುವ ರಾಜ್ಯ ವಿಧಾನಸಭೆ ಚುನಾವಣೆ (Karnataka Election) ಹಲವು ಅಚ್ಚರಿ, ಐತಿಹಾಸಿಕ ಸಂದರ್ಭಗಳಿಗೆ ಸಾಕ್ಷಿ ಆಗುತ್ತಿದೆ. ಒಂದು ಕಾಲದಲ್ಲಿ ಗಣಿ ಧಣಿಗಳ ಸಾಮ್ರಾಜ್ಯವಾಗಿ ಮೆರೆದ ಬಳ್ಳಾರಿ ಜಿಲ್ಲೆಯಲ್ಲಿ (Ballari District) ಈ ಸಲ ಕೌಟುಂಬಿಕ ಜಿದ್ದಾಜಿದ್ದಿ ನಡೆಯುತ್ತಿದೆ. ಬಳ್ಳಾರಿ ರೆಡ್ಡಿ ಬ್ರದರ್ಸ್ ಮಧ್ಯೆ ಪಕ್ಷ ಪಾರಮ್ಯ ಆರಂಭವಾಗಿದೆ.

ಅಂದು ರಾಮ-ಲಕ್ಷ್ಮಣ-ಭರತ , ಇವತ್ತು ರಾಜಕೀಯ ಪ್ರತಿಸ್ಪರ್ಧಿಗಳು.
ರೆಡ್ಡಿ ಸಹೋದರರ ನಡುವೆ ಈಗ ಕಲ್ಯಾಣ ರಾಜ್ಯ ಪ್ರಗತಿ ಪಕ್ಷದ ಗೋಡೆ ಎದ್ದು ನಿಂತಿದೆ. ಸ್ವಂತ ಪಕ್ಷದ ಮೂಲಕ ಸ್ವಂತ ಸಹೋದರರ ವಿರುದ್ಧವೇ ಗಣಿ ಧಣಿ ಗಾಲಿ ಜನಾರ್ದನ ರೆಡ್ಡಿ (Janardhan Reddy) ಸವಾಲ್ ಹಾಕಿದ್ದಾರೆ. ಬಳ್ಳಾರಿ ನಗರ ಕ್ಷೇತ್ರದಿಂದ ಕೆಆರ್‌ಪಿಪಿ ಅಭ್ಯರ್ಥಿಯಾಗಿ ಅರುಣಾಲಕ್ಷ್ಮೀ ಹೆಸರು ಘೋಷಣೆ ಮಾಡುವ ಮೂಲಕ ಜನಾರ್ದನ ರೆಡ್ಡಿಯವರು ಕುಟುಂಬ ವರ್ಸಸ್ ಪಕ್ಷ ಸಂಘರ್ಷ ಎಂಬ ಗಾಲಿ ಉರುಳಿಸಿದ್ದಾರೆ.

ತಮ್ಮ ಧರ್ಮ ಪತ್ನಿ ಅರುಣಾ ಲಕ್ಷ್ಮಿ (Aruna Lakshmi) ಅವರನ್ನು ತಮ್ಮ ಸಹೋದರ, ಬಳ್ಳಾರಿ ನಗರ ವಿಧಾನಸಭೆ ಕ್ಷೇತ್ರದ ಬಿಜೆಪಿ ಶಾಸಕ ಬಿ ಸೋಮಶೇಖರ್ ರೆಡ್ಡಿ (Somashekar Reddy) ವಿರುದ್ದ ಕಣಕ್ಕೆ ಇಳಿಸುವ ಮಹತ್ವದ ಘೋಷಣೆ ಮಾಡಿದ್ದಾರೆ. ಈ ಹಿನ್ನೆಲೆಯಲ್ಲಿ ಈ ಬಾರಿ‌ ಬಳ್ಳಾರಿ ನಗರ ಕ್ಷೇತ್ರ ಹೈವೋಲ್ಟೇಜ್ ಕ್ಷೇತ್ರವಾಗಿ ಎಲ್ಲರ ಗಮನ ಸೆಳೆಯುತ್ತಿದೆ. ಅಂದು ಒಂದಾಗಿದ್ದು ರೆಡ್ಡಿ ಸಹೋದರರು ಇಂದು ಪರಸ್ಪರ ಸವಾಲಿಗೆ ಸಾಕ್ಷಿಯಾಗ್ತಿದೆ ಬಳ್ಳಾರಿ ನೆಲ. ಆ ಮೂಲಕ ಗಣಿ ಜಿಲ್ಲೆಯು ಅಚ್ಚರಿಯ, ಐತಿಹಾಸಿಕ, ಅಪರೂಪದ ಕದನ ಕುತೂಹಲ ಮೂಡಿಸಿದೆ. ಇದನ್ನೂ ಓದಿ: ಕೇಂದ್ರ ಬಜೆಟ್ ರಾಷ್ಟ್ರದ ಪ್ರಗತಿಗೆ ಭದ್ರ ಬುನಾದಿ: ಬೊಮ್ಮಾಯಿ

ಗೆಲ್ಲೋ ಕಡೆ ನಮ್ಮ ಪಕ್ಷ ಅಭ್ಯರ್ಥಿ ಕಣಕ್ಕೆ ಇಳಿಸ್ತೇನೆ ಎಂದು ಕೆಆರ್‌ಪಿಪಿ (KRPP) ಪಕ್ಷದ ಸಂಸ್ಥಾಪಕ ಗಾಲಿ ಜನಾರ್ದನ ರೆಡ್ಡಿಯವರು ಈಗಾಗಲೇ ಸ್ಪಷ್ಟೀಕರಣ ನೀಡಿದ್ದಾರೆ. ಯಾರನ್ನೋ ಸೋಲಿಸಲು ಅಭ್ಯರ್ಥಿ ಹಾಕುವುದಿಲ್ಲ. ಸಹೋದರ ಇರಲಿ, ಯಾರೇ ಇರಲಿ ನಮ್ಮ ಪಕ್ಷದಿಂದ ಅಭ್ಯರ್ಥಿ ಹಾಕುತ್ತೇನೆ. ರಾಜಕೀಯದಲ್ಲಿ ನಾನೆಂದೂ ಸಂಬಂಧಗಳನ್ನು ದುರುಪಯೋಗ ಮಾಡಿಕೊಂಡಿಲ್ಲ. ನನಗೆ ವ್ಯಕ್ತಿ ಮುಖ್ಯ ಅಲ್ಲ, ನಮ್ಮ ನಿರ್ಧಾರ ಅಚಲ ಎಂದು ಜನಾರ್ದನ ರೆಡ್ಡಿ ತಿಳಿಸಿದ್ದಾರೆ.

ರೆಡ್ಡಿಯವರು ಏನೇ ಸ್ಪಷ್ಟೀಕರಣ ನೀಡಿದರೂ ದಾಲ್ ಮೆ ಕುಚ್ ಕಾಲಾ ಹೈ ಎಂಬ ಮಾತುಗಳು ಕೇಳಿಬರುತ್ತಿವೆ. ಅಷ್ಟಕ್ಕೂ ಸಹೋದರನ ವಿರುದ್ಧ ಪತ್ನಿ ಸ್ಪರ್ಧೆ ರಿಯಲ್ಲೋ, ಅಖಾಡ ಗೇಮ್‌ ಪ್ಲಾನೋ ಎಂಬ ಚರ್ಚೆಯೂ ಇದರ ಬೆನ್ನಲ್ಲೇ ಶುರುವಾಗಿದೆ. ಕೆಆರ್‌ಪಿಪಿಯ ಈ ಅಸ್ತ್ರದಿಂದ ಬಿಜೆಪಿಗೆ ನಷ್ಟ ಆಗುತ್ತಾ, ಅಥವಾ ನಷ್ಟ ಆಗಲೆಂಬ ಉದ್ದೇಶ ಇದೆಯಾ ಎಂಬ ಗುಸು ಗುಸು ಶುರುವಾಗಿದೆ. ಒಟ್ಟಿನಲ್ಲಿ ಬಳ್ಳಾರಿ ಬ್ರದರ್ಸ್ ಬ್ಯಾಟಲ್ ನಲ್ಲಿ ಏನಾಗುತ್ತೆ ಎಂಬು ಕುತೂಹಲ ಹೆಚ್ಚಾಗಿದೆ.