ಹಾಸನ: ಈ ಬಾರಿ ಹಾಸನ (Hassan) ವಿಧಾನಸಭಾ ಕ್ಷೇತ್ರದಲ್ಲಿ ಜೆಡಿಎಸ್ (JDS), ಬಿಜೆಪಿ (BJP), ಕಾಂಗ್ರೆಸ್‍ನಲ್ಲಿ (Congress) ತೀವ್ರ ಪೈಪೋಟಿ ಏರ್ಪಟ್ಟಿದೆ. ಅದೇ ರೀತಿ ಆಮ್ ಆದ್ಮಿ ಪಕ್ಷವು ಇಲ್ಲಿ ಸ್ಪರ್ಧೆ ಮಾಡಿದ್ದರೂ, ಆಟಕ್ಕಿಲ್ಲ, ಲೆಕ್ಕಕ್ಕೆ ಉಂಟು ಎಂಬಂತಾಗಿದೆ. ಆದರೆ ಈ ಬಾರಿ ಚುನಾವಣೆಯಲ್ಲಿ ವಿವಿಧ ಕಾಮಗಾರಿಗಳಲ್ಲಿ ಭ್ರಷ್ಟಾಚಾರ ನಡೆದಿದೆ ಎಂಬ ಆರೋಪ ಹಾಗೂ ಕುಟುಂಬ ರಾಜಕಾರಣ ಕೂಗೇ ಪ್ರಮುಖ ವಿಷಯ ಆಗಲಿದೆ.
ಈ ಕ್ಷೇತ್ರದಲ್ಲಿ 1952 ರಿಂದ ಈವರೆಗೆ 3 ಬಾರಿ ಕಾಂಗ್ರೆಸ್, 4 ಬಾರಿ ಜೆಡಿಎಸ್, 3 ಬಾರಿ ಪಕ್ಷೇತರ, 2 ಬಾರಿ ಜನತಾ ಪಾರ್ಟಿ, 2 ಬಾರಿ ಬಿಜೆಪಿ ಅಭ್ಯರ್ಥಿಗಳು ಗೆಲುವು ಸಾಧಿಸಿ ಶಾಸಕರಾಗಿದ್ದಾರೆ.
ಹಾಸನ ವಿಧಾನಸಭಾ ಕ್ಷೇತ್ರದ ಅಭ್ಯರ್ಥಿಗಳು:
ಪ್ರೀತಂಗೌಡ (ಬಿಜೆಪಿ)
ಬನವಾಸೆ ರಂಗಸ್ವಾಮಿ (ಕಾಂಗ್ರೆಸ್)
ಹೆಚ್.ಪಿ.ಸ್ವರೂಪ್ (ಜೆಡಿಎಸ್)
ಅಗಿಲೆ ಯೋಗೇಶ್ (ಆಪ್)
ಪ್ರೀತಂಗೌಡ ಪ್ಲಸ್: ಮೊದಲ ಬಾರಿಗೆ ಶಾಸಕರಾಗಿ ರಸ್ತೆ, ಯುಜಿಡಿ, ಕುಡಿಯುವ ನೀರು ಸೇರಿದಂತೆ ವಿವಿಧ ಅಭಿವೃದ್ಧಿ ಕೆಲಸ ಮಾಡಿರುವುದು. ರಾಜ್ಯ ನಾಯಕರೊಂದಿಗೆ ಉತ್ತಮ ಒಡನಾಡ ಹೊಂದಿರುವುದು.
ಮೈನಸ್: ಹಿರಿಯರ ಬಗ್ಗೆ ಲಘುವಾಗಿ ಮಾತನಾಡುವುದು, ಸವಾಲು ಹಾಕುವುದು, ವಿವಿಧ ಕಾಮಗಾರಿಗಳಲ್ಲಿ ಭ್ರಷ್ಟಾಚಾರ ಆರೋಪ, ಅಕ್ರಮ ಆಸ್ತಿ ಸಂಪಾದನೆ ಆರೋಪ, ಹಿಂದೆ ತಮಗಾಗಿ ದುಡಿದವರನ್ನು ಕಡೆಗಣಿಸಿ ಬೇಕಾದವರನ್ನು ಮಾತ್ರವೇ ತಮ್ಮ ಸುತ್ತಮುತ್ತ ಬಿಟ್ಟುಕೊಂಡಿರುವುದು.
ಸ್ವರೂಪ್ ಪ್ಲಸ್ : ತಂದೆ 4 ಬಾರಿ ಶಾಸಕರಾಗಿದ್ದರು. ತಂದೆ ಮೃತಪಟ್ಟಿದ್ದರೂ ತಂದೆಯ ಸೌಮ್ಯ ಸ್ವಭಾವವು ಮಗನಲ್ಲಿ ಇದೆ ಎಂಬ ಅನುಕಂಪ ಜನರಿಗಿದೆ. ಟಿಕೆಟ್ ಜಿದ್ದಾಜಿದ್ದಿ ಬದಿಗೊತ್ತಿ ಮಾಜಿ ಸಚಿವ ರೇವಣ್ಣ ಕುಟುಂಬದವರು ಸ್ವರೂಪ್ ಪರ ಕೆಲಸ ಮಾಡಲು ಮುಂದಾಗಿರುವುದು ಧನಾತ್ಮಕ ಅಂಶವಾಗಿದೆ.
ಮೈನಸ್: ಕುಟುಂಬ ರಾಜಕಾರಣ ಆರೋಪ, ಮಾತಿನ ಛಾತಿ ಇಲ್ಲದೇ ಇರುವುದು, ಸುಲಭವಾಗಿ ಜನರಿಗೆ ಸಿಗುವುದಿಲ್ಲ ಎಂಬ ಆಪಾದನೆಯಿದೆ. ಸ್ವರೂಪ್ ಗೆದ್ದರೂ ರಿಮೋಟ್ ಕಂಟ್ರೋಲ್ ದೇವೇಗೌಡರ ಕುಟುಂಬದ ಕೈಲಿರುತ್ತದೆ ಎಂಬ ಅನುಮಾನವು ಸ್ವರೂಪ್‍ಗೆ ತೊಂದರೆಯಾಗಬಹುದು.
ಬನವಾಸೆ ರಂಗಸ್ವಾಮಿ ಪ್ಲಸ್: ಕ್ಷೇತ್ರಕ್ಕೆ ಹೊಸ ಮುಖ, ಚುರುಕಿನಿಂದ ಸ್ಪಂದಿಸುವ ಗುಣ, ಕಾಂಗ್ರೆಸ್ ಪಕ್ಷದ ಹಿನ್ನೆಲೆಯುಳ್ಳ ವ್ಯಕ್ತಿ ಎಂಬ ಅಂಶವು ಕಾಂಗ್ರೆಸ್ ಅಭ್ಯರ್ಥಿ ಬನವಾಸೆ ರಂಗಸ್ವಾಮಿಗೆ ಪ್ಲಸ್ ಪಾಯಿಂಟ್ ಆಗಿದೆ. ಇದನ್ನೂ ಓದಿ: ಹೊಳಲ್ಕೆರೆ ಅಖಾಡ ಹೇಗಿದೆ? ಬಿಜೆಪಿ, ಕಾಂಗ್ರೆಸ್ ಮಧ್ಯೆ ನೇರ ಸ್ಪರ್ಧೆ
ಮೈನಸ್: ಹಳಬರು, ಟಿಕೆಟ್ ಆಕಾಂಕ್ಷಿಗಳನ್ನು ಒಟ್ಟಿಗೆ ತೆಗೆದುಕೊಂಡು ಹೋಗಲು ವಿಫಲರಾಗಿರುವುದು, ಇಡೀ ಕ್ಷೇತ್ರವನ್ನು ತಲುಪದೇ ಇರುವುದು ಕಾಂಗ್ರೆಸ್ ಅಭ್ಯರ್ಥಿಯ ಮೇಲೆ ಪರಿಣಾಮ ಬಿರಬಹುದು.
ಹಾಸನ ವಿಧಾನಸಭಾ ಕ್ಷೇತ್ರದ ಜಾತಿವಾರು ಲೆಕ್ಕಾಚಾರ:
ಒಟ್ಟು ಮತದಾರರು – 2,35,262
ಪುರುಷರು – 1,18,324
ಮಹಿಳೆಯರು – 1,16,938
ಯಾರ ವೋಟು ಎಷ್ಟು?: ಹಾಸನ ವಿಧಾನಸಭಾ ಕ್ಷೇತ್ರದಲ್ಲಿ ದಾಸ ಒಕ್ಕಲಿಗರು 65 ರಿಂದ 70 ಸಾವಿರವಿದ್ದು, ಮುಳ್ಳು ಒಕ್ಕಲಿಗರು 45 ರಿಂದ 50 ಸಾವಿರ ಇದ್ದಾರೆ. ಈ ಎರಡು ಸಮುದಾಯಗಳ ಮತಗಳೇ ನಿರ್ಣಾಯಕ ಆಗಲಿವೆ. ಇವರೊಂದಿಗೆ ಲಿಂಗಾಯತರು 20 ಸಾವಿರ, ಪರಿಶಿಷ್ಟರು 25 ಸಾವಿರ ಹಾಗೂ ಮುಸ್ಲಿಮರು 29 ಸಾವಿರ ಇದ್ದು, ಈ ಸಮುದಾಯಗಳ ಬೆಂಬಲ ಸಿಕ್ಕವರು ಸುಲಭವಾಗಿ ಗೆಲುವಿನ ನಗೆ ಬೀರಲಿದ್ದಾರೆ. ಇದನ್ನೂ ಓದಿ: ಹಾಲಿ ಸಚಿವರ ಕ್ಷೇತ್ರದಲ್ಲಿ ಇದೇ ಮೊದಲ ಬಾರಿಗೆ ತ್ರಿಕೋನ ಪೈಪೋಟಿ
