ಕಪಟ ನಾಟಕ ಪಾತ್ರಧಾರಿ: ಲಿರಿಕಲ್ ವಿಡಿಯೋದ ಫೇಸ್‍ಬುಕ್ ಸವಾರಿ!

ಬೆಂಗಳೂರು: ಹುಲಿರಾಯ ಖ್ಯಾತಿಯ ಬಾಲು ನಾಗೇಂದ್ರ ನಾಯಕನಾಗಿ ನಟಿಸಿರುವ ಕಪಟನಾಟಕ ಪಾತ್ರಧಾರಿ ಚಿತ್ರವೀಗ ಬಿಡುಗಡೆಯ ಹಂತದಲ್ಲಿದೆ. ಹೆಚ್ಚೇನೂ ಸದ್ದಿಲ್ಲದೆ ಚಿತ್ರೀಕರಣ ಮುಗಿಸಿಕೊಂಡಿರೋ ಈ ಸಿನಿಮಾವೀಗ ಭಾರೀ ಸದ್ದು ಮಾಡುತ್ತಿರೋದು ಲಿರಿಕಲ್ ವಿಡಿಯೋ ಒಂದರ ಮೂಲಕ. ಇತ್ತೀಚೆಗಷ್ಟೇ ಬಿಡುಗಡೆಯಾಗಿದ್ದ ಈ ಲಿರಿಕಲ್ ವೀಡಿಯೋ ಭರಾಟೆ ಸಾಮಾಜಿಕ ಜಾಲತಾಣಗಳಲ್ಲಿ ಜೋರಾಗಿದೆ. ಈ ಹಾಡು ಹೀಗೆ ಅಬ್ಬರದಿಂದ ಹರಿದಾಡುತ್ತಿರೋದಕ್ಕೆ ಮೂಲ ಕಾಲರಣ ಅದನ್ನು ರೂಪಿಸಿರುವ ಕ್ರಿಯಾಶೀಲ ರೀತಿ ಮತ್ತು ಅದರ ತುಂಬೆಲ್ಲ ಕಣ್ಣಿಗೆ ಕಟ್ಟಿದಂತೆ ಕಾಣಿಸೋ ಹೊಸತನ.

ಕ್ರಿಶ್ ನಿರ್ದೇಶನದ ಈ ಚಿತ್ರದ ಯಾಕೆ ಅಂತ ಗೊತ್ತಿಲ್ಲ ಕಣ್ರಿ, ನನ್ನನ್ನು ನೋಡಿ ನಕ್ಬಿಟ್ಳು ಸುಂದ್ರಿ ಅಂತ ಶುರುವಾಗೋ ಈ ಲಿರಿಕಲ್ ವಿಡಿಯೋ ಸಾಂಗ್ ಬಿಡುಗಡೆಯಾದ ಕ್ಷಣದಿಂದಲೇ ಕ್ರೇಜ್ ಹುಟ್ಟು ಹಾಕಿತ್ತು. ಆದಿಲ್ ನದಾಫ್ ಸಂಗೀತ ಸಂಯೋಜನೆಯಲ್ಲಿ ಮೂಡಿ ಬಂದಿದ್ದ ಈ ಹಾಡನ್ನು ಹರಿಚರಣ್ ಶೇಷಾದ್ರಿ ಹಾಡಿದ್ದರು. ವೇಣು ಹಸ್ರಾಳಿ ಸಾಹಿತ್ಯವಿರೋ ಈ ಹಾಡನ್ನು ಚಿತ್ರ ತಂಡ ರೂಪಿಸಿರೋ ರೀತಿ ಮಾತ್ರ ಎಂಥವರೂ ಮೆಚ್ಚಿಕೊಳ್ಳುವಂತಿದೆ. ಈ ಕಾರಣದಿಂದಲೇ ಇದೀಗ ಸಾಮಾಜಿಕ ಜಾಲತಾಣಗಳ ತುಂಬೆಲ್ಲ ಸಖತ್ ಸೌಂಡ್ ಮಾಡುತ್ತಿದೆ.

ಈ ಲಿರಿಕಲ್ ವಿಡಿಯೋ ಎಲ್ಲರಿಗೂ ಹಾಟ್ ಫೇವರಿಟ್ ಆಗಿರೋ ಫೇಸ್‍ಬುಕ್ ಥೀಮ್‍ನಲ್ಲಿ ತಯಾರಾಗಿದೆ. ಫೇಸ್‍ಬುಕ್ ಗೋಡೆಯಲ್ಲಿನ ಥರ ಥರದ ಚಿತ್ತಾರಗಳೊಂದಿಗೇ ಈ ಹಾಡು ತೆರೆದುಕೊಳ್ಳುತ್ತೆ. ನಾವು ಫೇಸ್‍ಬುಕ್‍ನಲ್ಲಿ ಯಾವುದೇ ಪೋಸ್ಟ್ ಮಾಡುವಾಗ ಅಕ್ಷರ ಟೈಪ್ ಮಾಡುತ್ತೇವಲ್ಲಾ? ಆ ಪ್ಲೇಸಿನಲ್ಲಿ ಈ ಹಾಡಿನ ಸಾಹಿತ್ಯ ಬರುತ್ತದೆ. ಪೋಸ್ಟ್ ಗಳ ಮೂಲಕವೇ ಇದರ ಸ್ಟಿಲ್ಲುಗಳು ಕದಲುತ್ತವೆ. ಈ ಚಿತ್ರದ ತಾಂತ್ರಿಕ ವರ್ಗದ ವಿವರಗಳನ್ನೂ ಕೂಡಾ ಅವರವರ ಫೇಸ್‍ಬುಕ್ ಖಾತೆಯ ಮೂಲಕವೇ ಪ್ರಚುರಪಡಿಸುವಂಥಾ ನವೀನ ಮಾದರಿಯನ್ನೂ ಇಲ್ಲಿ ಅನುಸರಿಸಲಾಗಿದೆ. ಹೀಗೆ ಫೇಸ್‍ಬುಕ್‍ನೊಳಗೇ ಕದಲೋ ಈ ಹಾಡು ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿ ಬಿಟ್ಟಿದೆ. ಅಂದಹಾಗೆ ಈ ಚಿತ್ರದಲ್ಲಿ ಹುಲಿರಾಯ ಚಿತ್ರದ ನಂತರ ಬಾಲು ನಾಗೇಂದ್ರ ಮತ್ತೊಂದು ಮಜವಾದ ಪಾತ್ರಕ್ಕೆ ಜೀವ ತುಂಬಿದ್ದಾರೆ. ಸಂಗೀತಾ ಭಟ್ ಅವರಿಗೆ ಜೋಡಿಯಾಗಿ ನಟಿಸಿದ್ದಾರೆ.