ಬೆಂಗಳೂರು: ಶೀರ್ಷಿಕೆಗೆ ತಕ್ಕುದಾಗಿಯೇ ಟ್ರೈಲರ್, ಹಾಡು ಸೇರಿದಂತೆ ಪ್ರತಿಯೊಂದರಲ್ಲಿಯೂ ಅಬ್ಬರಿಸುತ್ತಾ ಬಂದಿದ್ದ ಹೈಪರ್ ಚಿತ್ರ ಇದೇ 29ರಂದು ತೆರೆ ಕಾಣಲಿದೆ. ಎಂ ಕಾರ್ತಿಕ್ ನಿರ್ಮಾಣದ, ಗಣೇಶ್ ವಿನಾಯಕ ನಿರ್ದೇಶನದಲ್ಲಿ ಮೂಡಿ ಬಂದಿರೋ ಈ ಚಿತ್ರ ಬಿಡುಗಡೆಯ ಸರದಿಯಲ್ಲಿರುವ ಸಿನಿಮಾಗಳಲ್ಲಿ ಬಹು ನಿರೀಕ್ಷಿತ ಚಿತ್ರವಾಗಿ ಮುಂಚೂಣಿ ಕಾಯ್ದುಕೊಂಡಿದೆ.
ಈ ಚಿತ್ರದ ಮೂಲಕ ಕಟ್ಟುಮಸ್ತಾದ ಮತ್ತೋರ್ವ ನಾಯಕ ಚಿತ್ರರಂಗಕ್ಕೆ ಎಂಟ್ರಿ ಕೊಟ್ಟಂತಾಗಿದೆ. ಈಗಾಗಲೇ ಹೈಪರ್ ನಾಯಕ ಅರ್ಜುನ್ ಆರ್ಯ ಪ್ರೇಕ್ಷಕರನ್ನು ಸೆಳೆಯುವಲ್ಲಿ ಸಫಲರಾಗಿದ್ದಾರೆ. ಟ್ರೈಲರ್‍ನಲ್ಲಿನ ದೃಷ್ಯಾವಳಿಗಳಲ್ಲಿಯೇ ಫಿಟ್ನೆಸ್ ಮೂಲಕ ಒಂದಷ್ಟು ಕ್ರೇಜನ್ನೂ ಹುಟ್ಟು ಹಾಕಿದ್ದಾರೆ. ಅಂದಹಾಗೆ ಈ ಚಿತ್ರದ ಕಥೆಯನ್ನೂ ಕೂಡಾ ಅರ್ಜುನ್ ಆರ್ಯ ಅವರೇ ರಚಿಸಿದ್ದಾರೆ.
ಎಂ ಬಿ ಪಿಕ್ಚರ್ಸ್ ಲಾಂಛನದಡಿಯಲ್ಲಿ ಎಂ ಕಾರ್ತಿಕ್ ನಿರ್ಮಾಣ ಮಾಡಿರುವ ಈ ಚಿತ್ರ ನಿರ್ದೇಶಕ ಗಣೇಶ್ ವಿನಾಯಕ ಅವರಿಗೆ ಮೊದಲ ಚಿತ್ರ. ಆದರೆ ಅವರು ಈಗಾಗಲೇ ತಮಿಳಿನಲ್ಲಿ ಮೂರು ಚಿತ್ರಗಳನ್ನು ನಿರ್ದೇಶನ ಮಾಡಿದ ಅನುಭವ ಹೊಂದಿದ್ದಾರೆ. ಈ ಚಿತ್ರ ಪ್ರೇಕ್ಕರಲ್ಲಿ ನಿರೀಕ್ಷೆ ಮೂಡಿಸಿರೋದೇ ಟ್ರೈಲರ್‍ನಿಂದ. ಆ ನಂತರ ಬಿಡುಗಡೆಯಾದ ಹಾಡುಗಳಂತೂ ಎಲ್ಲರ ಮೆಚ್ಚುಗೆ ಗಳಿಸಿಕೊಂಡಿವೆ.
ಇಮ್ಮಾನ್ ಡಿ ಮತ್ತು ಎಲ್ವಿನ್ ಸಂಗೀತ ನೀಡಿರೋ ಹಾಡುಗಳೇ ಹೈಪರ್ ಚಿತ್ರದ ಗೆಲುವಿನ ಮುನ್ಸೂಚನೆಯನ್ನೂ ನೀಡಿವೆ. ಕಾಲೇಜಿನ ಸುತ್ತಾ ನಡೆಯುವ ಥ್ರಿಲ್ಲರ್ ಕಥಾನಕ ಹೊಂದಿರುವ ಹೈಪರ್ ಬದುಕಿನ ಬೇರೆ ಬೇರೆ ಹಾದಿಗಳತ್ತಲೂ ಹೊರಳಿಕೊಳ್ಳುವ ಮೂಲಕ ಎಲ್ಲ ವರ್ಗದ ಪ್ರೇಕ್ಷಕರನ್ನೂ ಖುಷಿಪಡಿಸುವಂತಿದೆ ಎಂಬುದು ಚಿತ್ರ ತಂಡದ ಭರವಸೆ.
ರಂಗಾಯಣ ರಘು, ಶೋಭರಾಜ್, ಅಚ್ಯುತ ಕುಮಾರ್, ಬುಲ್ಲೆಟ್ ಪ್ರಕಾಶ್ ಸೇರಿದಂತೆ ಬಹು ದೊಡ್ಡ ತಾರಾಗಣ ಹೊಂದಿರೋ ಈ ಚಿತ್ರ ಇದೇ 29ರಂದು ರಾಜ್ಯಾದ್ಯಂತ ತೆರೆ ಕಾಣಲಿದೆ.
