ಕಾಣದಂತೆ ಮಾಯವಾದನು: ಮಂದಹಾಸದ ಹಾಡಿಗೆ ಧ್ವನಿಯಾದರು ಪುನೀತ್!

ಬೆಂಗಳೂರು: ನಿರ್ದೇಶಕರಾಗಿಯೂ ಹೆಸರು ಮಾಡಿದ್ದ ವಿಕಾಸ್ ಕಾಣದಂತೆ ಮಾಯವಾದನು ಚಿತ್ರದ ಮೂಲಕ ನಾಯಕನಾಗಿಯೂ ಸದ್ದು ಮಾಡುತ್ತಿದ್ದಾರೆ. ಈ ಹಿಂದೆ ಬಂದಿದ್ದ ಟ್ರೇಲರ್ ನೊಂದಿಗೆ ವಿಶಿಷ್ಟ ಕಥೆಯ ಸುಳಿವು ಕೊಡುತ್ತಾ ಈ ಸಿನಿಮಾ ಪ್ರೇಕ್ಷಕರ ಮನಸೆಳೆದಿತ್ತು. ಇದೀಗ ಇದರ ಹಾಡುಗಳ ಹಂಗಾಮ ಶುರುವಾಗಿದೆ. ಪವರ್ ಸ್ಟಾರ್ ಪುನೀತ್ ರಾಜ್ ಕುಮಾರ್ ಹಾಡಿರೋ ಮೆಲೋಡಿ ಹಾಡೊಂದು ಈಗ ಬಿಡುಗಡೆಯಾಗಿದೆ.

ಪವರ್ ಸ್ಟಾರ್ ಪುನೀತ್ ರಾಜ್‍ಕುಮಾರ್ ಇತ್ತೀಚೆಗೆ ಗಾಯಕನಾಗಿಯೂ ಬಹು ಬೇಡಿಕೆ ಪಡೆದುಕೊಂಡಿದ್ದಾರೆ. ಸಾಮಾನ್ಯವಾಗಿ ಹೊಸ ಪ್ರಯೋಗಗಳ ತಾಜಾ ಸಾಹಿತ್ಯವೇ ಅವರ ಹಾಡಿಗೆ ಸಿಗುತ್ತಿವೆ. ಆದರೆ ಕಾಣದಂತೆ ಮಾಯವಾದನು ಚಿತ್ರದಲ್ಲಿ ಸ್ವತಃ ಪುನೀತ್ ಅವರೇ ಖುಷಿಗೊಳ್ಳುವಂಥಾ ಮೆಲೋಡಿ ಹಾಡೇ ಸಿಕ್ಕಿದೆ. ಈ ಬಗ್ಗೆ ಅತೀವ ಸಂತಸದೊಂದಿಗೇ ಅವರು ಈ ಹಾಡನ್ನು ಹಾಡಿದ್ದಾರೆ. ಕಳೆದೋದ ಕಾಳಿದಾಸ ನೋಡುತ್ತ ಮಂದಹಾಸ ಎಂಬ ಸಾಲುಗಳ ಈ ಹಾಡನ್ನು ಕವಿರತ್ನ ಡಾ ವಿ ನಾಗೇಂದ್ರ ಪ್ರಸಾದ್ ಬರೆದಿದ್ದಾರೆ. ಗುಮ್ಮಿನೇನಿ ವಿಜಯ್ ಸಂಗೀತ ಸಂಯೋಜನೆಯಲ್ಲಿ ಮೂಡಿ ಬಂದಿರೋ ಈ ಹಾಡು ಎಲ್ಲರನ್ನೂ ಮೋಹಕವಾಗಿ ಸೆಳೆದುಕೊಳ್ಳುತ್ತಿದೆ.

ರಾಜ್ ಪತ್ತಿಪಾಟಿ ನಿರ್ದೇಶನದ ಈ ಚಿತ್ರದ ಮೂಲಕ ವಿಕಾಸ್ ಹೀರೋ ಆಗಿ ನಟಿಸುತ್ತಲೇ ಈಗ ಬಿಡುಗಡೆಯಾಗಿರೋ ಲಿರಿಕಲ್ ವೀಡಿಯೋ ಮೂಲಕ ಮತ್ತಷ್ಟು ಭರವಸೆ ಮೂಡಿಸಿದ್ದಾರೆ. ಅವರಿಲ್ಲಿ ಯಾವ ಥರದ ಪಾತ್ರ ಮಾಡಿದ್ದಾರೆಂಬ ಸ್ಯಾಂಪಲ್ ಕೂಡಾ ಈ ಹಿಂದೆ ಟ್ರೈಲರ್ ಮೂಲಕ ಅನಾವರಣಗೊಂಡಿತ್ತು. ಪ್ರೇಮಿಯಾಗಿ, ಆತ್ಮವಾಗಿ, ಸಾಹಸ ಸನ್ನಿವೇಶಗಳಲ್ಲಿಯೂ ವಿಕಾಶ್ ವಿಜೃಂಭಿಸಿರೋ ಸೂಚನೆಗಳೂ ಅನಾವರಣಗೊಂಡಿದ್ದವು. ಇದೀಗ ಪುನೀತ್ ರಾಜ್ ಕುಮಾರ್ ಹಾಡಿರೋ ರೊಮ್ಯಾಂಟಿಕ್ ಸಾಂಗ್ ಮೂಲಕ ಕಾಣದಂತೆ ಮಾಯವಾದನು ಚಿತ್ರ ಪ್ರೇಕ್ಷಕರನ್ನೆಲ್ಲ ಮತ್ತೆ ಆವರಿಸಿಕೊಂಡಿದೆ.