ಗುವಾಹಟಿ: ಕ್ವಿಂಟನ್‌ ಡಿಕಾಕ್‌ ಬ್ಯಾಟಿಂಗ್‌ ಅಬ್ಬರಕ್ಕೆ ಕೋಲ್ಕತ್ತಾ ವಿರುದ್ಧ ರಾಯಲ್ಸ್‌ಗೆ 8 ವಿಕೆಟ್‌ಗಳ ಸೋಲಾಗಿದೆ. ಬ್ಯಾಟಿಂಗ್‌ ಮತ್ತು ಬೌಲಿಂಗ್‌ನಲ್ಲಿ ಮಿಂಚಿದ ಕೆಕೆಆರ್‌ ಐಪಿಎಲ್‌ 2025 ರಲ್ಲಿ ಮೊದಲ ಗೆಲುವು ದಾಖಲಿಸಿತು.
ಟಾಸ್‌ ಸೋತು ಮೊದಲು ಬ್ಯಾಟಿಂಗ್‌ ಮಾಡಿದ ರಾಜಸ್ಥಾನ್‌ ರಾಯಲ್ಸ್‌ ವೈಫಲ್ಯ ಅನುಭವಿಸಿತು. 20 ಓವರ್‌ಗಳಿಗೆ 9 ವಿಕೆಟ್‌ ನಷ್ಟಕ್ಕೆ 151 ರನ್ ಕಲೆ ಹಾಕಿತು. ಕೋಲ್ಕತ್ತಾ ನೈಟ್‌ ರೈಡರ್ಸ್‌ 17.3 ಓವರ್‌ಗೆ 2 ವಿಕೆಟ್‌ ನಷ್ಟಕ್ಕೆ ಗುರಿ ತಲುಪಿ ಗೆದ್ದು ಬೀಗಿತು.
ಬ್ಯಾಟಿಂಗ್‌ನಲ್ಲಿ ರಿಯಾನ್ ಪರಾಗ್ ಪಡೆ ಮುಗ್ಗರಿಸಿತು. ಯಶಸ್ವಿ ಜೈಸ್ವಾಲ್ 29, ಸಂಜು ಸ್ಯಾಮ್ಸನ್ 13, ರಿಯಾನ್ ಪರಾಗ್ 25, ಧ್ರುವ್ ಜುರೆಲ್ 33, ಜೋಫ್ರಾ ಆರ್ಚರ್ 16 ರನ್ ಗಳಿಸಿದರು. ಪ್ರಮುಖ ಬ್ಯಾಟರ್‌ಗಳೇ ಕೈಕೊಟ್ಟಿದ್ದು ತಂಡದ ಸೋಲಿಗೆ ಪ್ರಮುಖ ಕಾರಣವಾಯಿತು.
ಕೋಲ್ಕತ್ತಾ ಬೌಲರ್‌ಗಳು ರಾಯಲ್ಸ್‌ ಬ್ಯಾಟರ್‌ಗಳನ್ನು ಚೆಂಡಾಡಿದರು. ವೈಭವ್ ಅರೋರಾ, ಹರ್ಷಿತ್‌ ರಾಣಾ, ಮೊಯಿಲ್‌ ಅಲಿ, ವರುಣ್‌ ಚಕ್ರವರ್ತಿ ತಲಾ 2 ಹಾಗೂ ಸ್ಪೆನ್ಸರ್ ಜಾನ್ಸನ್ 1 ವಿಕೆಟ್‌ ಕಿತ್ತರು.
ಆರ್‌ಆರ್‌ ನೀಡಿದ 152 ರನ್ ಗುರಿ ಬೆನ್ನತ್ತಿದ ಕೆಕೆಆರ್‌ ಬ್ಯಾಟಿಂಗ್‌ನಲ್ಲಿ ಅಬ್ಬರಿಸಿತು. ಕ್ವಿಂಟನ್‌ ಡಿಕಾರ್‌ 61 ಬಾಲ್‌ಗೆ 97 ರನ್ (8 ಬೌಂಡರಿ, 6 ಸಿಕ್ಸರ್‌) ಗಳಿಸಿ ಮಿಂಚಿದರು. ಕ್ಯಾಪ್ಟನ್‌ ಅಜಿಂಕ್ಯಾ ರಹಾನೆ (18), ಅಂಗ್‌ಕ್ರಿಶ್ ರಘುವಂಶಿ (22) ಬ್ಯಾಟಿಂಗ್‌ನಲ್ಲಿ ತಂಡದ ಗೆಲುವಿಗೆ ಸಹಕಾರಿಯಾದರು. ಪಂದ್ಯದಲ್ಲಿ ಆರ್‌ಆರ್‌ ಬೌಲರ್‌ಗಳು ವಿಫಲರಾದಂತೆ ಕಂಡುಬಂತು.
