ಐಸ್ ಕ್ರೀಂ ಪ್ರಿಯರೆ ಎಚ್ಚರ: ಪ್ರತಿಷ್ಠಿತ ಕಂಪೆನಿಯ ಐಸ್ ಕ್ರೀಂನಲ್ಲಿ ಹುಳುಗಳು ಪ್ರತ್ಯಕ್ಷ!

ಬೆಂಗಳೂರು: ಪ್ರತಿಷ್ಠಿತ ಕಂಪನಿಯೊಂದರ ಐಸ್ ಕ್ರೀಂನಲ್ಲಿ ಹುಳುಗಳು ಕಾಣಿಸಿಕೊಂಡಿವೆ. ಈ ಘಟನೆ ಐಸ್ ಕ್ರೀಂ ಪ್ರಿಯರಿಗೆ ಎಚ್ಚರ ನೀಡಿದ್ದು, ಹುಳು ಇದೇ ಇಲ್ಲವೋ ಅಂತಾ ನೋಡಿ ತಿನ್ನುವ ಪರಿಸ್ಥಿತಿ ನಿರ್ಮಾಣವಾಗಿದೆ.

ಶನಿವಾರ ನೆಲಮಂಗಲ ತಾಲೂಕಿನ ಸೋಪುರ ಕೈಗಾರಿಕಾ ಪ್ರದೇಶದಲ್ಲಿ ಆಟೋದಲ್ಲಿ ಮಾರುತ್ತಿದ್ದ ಐಸ್ ಕ್ರೀಂನಲ್ಲಿ ಹುಳುಗಳು ಇರುವುದನ್ನು ಕಂಡು, ಐಸ್ ಕ್ರೀಂ ಪ್ರಿಯರು ಬೆಚ್ಚಿ ಬಿದ್ದಿದ್ದಾರೆ.

ಆಟೋದಲ್ಲಿ ಐಸ್ ಕ್ರೀಂ ಇಟ್ಟುಕೊಂಡು ವ್ಯಾಪಾರ ಮಾಡುತ್ತಿದ್ದಾಗ, ಸ್ಥಳೀಯ ನಿವಾಸಿ ಮಂಗಳ ಎಂಬವರು, ತಮ್ಮ ಮಗಳಿಗಾಗಿ ಐಸ್‍ಕ್ರೀಂ ಖರೀದಿಸಿದ್ದರು. ನಂತರ ಐಸ್ ಕ್ರೀಂ ಮುಚ್ಚಳ ತೆರೆದು ನೋಡಿದಾಗ ಹುಳುಗಳಿರುವುದು ಬೆಳಕಿಗೆ ಬಂದಿದೆ. ಕೂಡಲೇ ಸ್ಥಳೀಯರು ಆಟೋದಲ್ಲಿ ಐಸ್‍ಕ್ರೀಂ ಮಾರಾಟ ಮಾಡುತ್ತಿದ್ದವರನ್ನು ತಡೆದು, ತರಾಟೆಗೆ ತೆಗೆದುಕೊಂಡಿದ್ದಾರೆ.

ತುಮಕೂರು ಮೂಲದ ಕಂಪೆನಿಯ ಐಸ್‍ಕ್ರೀಂ ಇದಾಗಿದ್ದು, ಪ್ರತಿಷ್ಠಿತ ಕಂಪೆನಿಯ ಐಸ್‍ಕ್ರೀಂನಲ್ಲಿಯೇ ಹುಳುಗಳಿರುವುದು ಸ್ಥಳೀಯರಲ್ಲಿ ಬೇಸರ ಹಾಗೂ ಆಕ್ರೋಶಕ್ಕೆ ಕಾರಣವಾಗಿದೆ.