– ಪಾಕ್ ವಿರುದ್ಧ ಮಿಂಚಿದ ನಾಸ್ತುಷ್ ಕೆಂಜಿಗೆ
ಚಿಕ್ಕಮಗಳೂರು: ಪಾಕಿಸ್ತಾನದ (Pakistan) ವಿರುದ್ಧ ಯಾವುದೇ ತಂಡ ಕ್ರಿಕೆಟ್ ಆಡಿದರೂ ಆ ತಂಡಕ್ಕೆ ಭಾರತೀಯರ ಬೆಂಬಲ ಇದ್ದೇ ಇರುತ್ತೆ. ಹೀಗಿರುವಾಗ ಮೊನ್ನೆ ಟಿ20 ವಿಶ್ವಕಪ್ (T20 World Cup) ನಲ್ಲಿ ಅದೇ ಪಾಕಿಸ್ತಾನಕ್ಕೆ ಕ್ರಿಕೆಟ್ ಶಿಶು ಅಮೆರಿಕ (USA) ಮಣ್ಣು ಮುಕ್ಕಿಸಿದ್ದು ಈಗ ಇತಿಹಾಸ. ಆದರೆ ಅಮೆರಿಕ ತಂಡದ ಎಡಗೈ ಆಫ್ ಸ್ಪಿನ್ನರ್ ಕಾಫಿನಾಡ ಮನೆಮಗ ನಾಸ್ತುಷ್ ಕೆಂಜಿಗೆ (Nosthush Kenjige) ಆಟಕ್ಕೆ ಕಾಫಿನಾಡು ಫುಲ್ ಫಿದಾ ಆಗಿದ್ದಾರೆ. ಪಾಕ್ ವಿರುದ್ಧ ಗೆದ್ದಿದ್ದು ಅಮೆರಿಕವಾದರೂ ಸಂಭ್ರಮಿಸಿದ್ದು ಮಾತ್ರ ಭಾರತ.
ಟಿ20 ಮಾದರಿಯ ಬೆಸ್ಟ್ ಟೀಂ ಪಾಕಿಸ್ತಾನವನ್ನ ಕ್ರಿಕೆಟ್ ಶಿಶುಗಳಾದ ಅಮೆರಿಕ ಸೋಲಿಸುತ್ತೆ ಅಂತ ಯಾರೂ ಊಹಿಸರಲಿಲ್ಲ. 159 ರನ್ ಚೇಸ್ ಮಾಡಲಾಗದ ಪಾಕಿಸ್ತಾನ ಮ್ಯಾಚ್ ಟೈ ಮಾಡ್ಕೊಂಡು ಸೂಪರ್ ಓವರ್ ನಲ್ಲಿ ಅಮೆರಿಕದೆದುರು ಮಂಡಿಯೂರಿತ್ತು. ಆ ಮ್ಯಾಚಿನಲ್ಲಿ ಕಾಫಿನಾಡು ಚಿಕ್ಕಮಗಳೂರು ಹುಡುಗನ ಸಾಧನೆ ಅಮೋಘವಾಗಿತ್ತು.
ನಮ್ಮ ಪೂರ್ಣಚಂದ್ರ ತೇಜಸ್ವಿ ಅವರ ಮಿತ್ರ ಪ್ರದೀಪ್ ಕೆಂಜಿಗೆ ಅವರ ಮಗ ನೊಸ್ತುಷ್ ಕೆಂಜಿಗೆ ಅವರು ನಿನ್ನೆ ಅಮೆರಿಕ ತಂಡದ ಪರವಾಗಿ ಪಾಕಿಸ್ತಾನದ ಮೂರು ವಿಕೆಟ್ ಕಿತ್ತು ಗೆಲುವಿಗೆ ಕಾರಣರಾಗಿದ್ದು ನಮ್ಮೆಲ್ಲರ ಹೆಮ್ಮೆ. ಜೈ ಮೂಡಿಗೆರೆ ಜೈ ಕರ್ನಾಟಕ ????❤️#T20WorldCupOnStar pic.twitter.com/ftEaezUCEr
— Star Sports Kannada (@StarSportsKan) June 7, 2024
ಆ ಪಂದ್ಯದಲ್ಲಿ ಫಸ್ಟ್ ಓವರ್ ಸ್ಪಿನ್‌ ಮಾಡಿದ ನಾಸ್ತುಷ್ ಚಿಕ್ಕಮಗಳೂರು (Chikkamagluru) ಜಿಲ್ಲೆ ಮೂಡಿಗೆರೆ ತಾಲೂಕಿನ ಕೆಂಜಿಗೆ ಗ್ರಾಮದವರು. ಪೂರ್ಣಚಂದ್ರ ತೇಜಸ್ವಿ ಅವರ ಸ್ನೇಹಿತ ಪ್ರದೀಪ್ ಕೆಂಜಿಗೆ ಅವರ ಮಗನಾಗಿರುವ ನಾಸ್ತುಷ್ ಉದ್ಯೋಗದ ನಿಮಿತ್ತ ಅಮೆರಿಕಕ್ಕೆ ಹೋಗಿ ರಾಷ್ಟ್ರೀಯ ಕ್ರಿಕೆಟ್ ತಂಡದಲ್ಲಿ ಸ್ಥಾನ ಪಡೆದು ಅಮೆರಿಕದ ಜೊತೆ ಭಾರತದ ಹೆಸರನ್ನೂ ಬೆಳೆಸುತ್ತಿದ್ದಾರೆ. ಇದನ್ನೂ ಓದಿ: T20 World Cup: ಇಂದು ಇಂಡೋ-ಪಾಕ್ ಹೈವೋಲ್ಟೇಜ್‌ ಕದನ – 1 ಸೆಕೆಂಡ್‌ ಜಾಹೀರಾತಿಗೆ 4 ಲಕ್ಷ ರೂ.!
ನಾಸ್ತುಷ್ ಕೆಂಜಿಗೆ ಹುಟ್ಟಿದ್ದು ಅಮೇರಿಕಾದಲ್ಲೇ. ಆದರೆ ಬೆಳೆದಿದ್ದು ಮಾತ್ರ ಚಿಕ್ಕಮಗಳೂರು, ಬೆಂಗಳೂರಿನಲ್ಲಿ. ಬೆಂಗಳೂರಿನ ದಯಾನಂದ ವಿದ್ಯಾಸಾಗರ ಕಾಲೇಜಿನಲ್ಲಿ ಎಂ.ಟಿಕ್ (ಬಯೋ ಮೆಡಿಕಲ್) ಓದಿದ ಅವರು ಅವರು ಕರ್ನಾಟಕದಲ್ಲಿ ಕ್ರಿಕೆಟಿಗನಾಗಿ ಬೆಳೆದಿದ್ದರು.
ಬೆಂಗಳೂರು, ಚಿಕ್ಕಮಗಳೂರಿನಲ್ಲಿ ವಿದ್ಯಾಭ್ಯಾಸದ ಜೊತೆ ಕ್ರಿಕೆಟ್ ಕೋಚ್ ಪಡೆದಿದ್ದಾರೆ. 2022ರ ಕೊರೊನಾ ಅವಧಿಯಲ್ಲಿ ನಾಸ್ತುಷ್ ಕೆಂಜಿಗೆ ಚಿಕ್ಕಮಗಳೂರಿನ ಸುಭಾಷ್ ಚಂದ್ರ ಬೋಸ್ ಆಟದ ಮೈದಾನದಲ್ಲಿ ಅಭ್ಯಾಸ ಮಾಡಿದ್ದರು. ಇಲ್ಲಿರುವ ಕ್ರೀಡಾ ಪಟುಗಳ ಜೊತೆ ನಿತ್ಯ ಪ್ರಾಕ್ಟಿಸ್ ಮಾಡುತ್ತಿದ್ದರು. ಹುಡುಗರಿಗೆ ಕ್ರಿಕೆಟ್ ಹೇಗೆ ಆಡಬೇಕು? ಬ್ಯಾಟಿಂಗ್-ಬೌಲಿಂಗ್ ಬಗ್ಗೆಯೂ ತರಬೇತಿ ನೀಡಿದ್ದರು.
