ನೀ ಏನಾದ್ರೂ ಹೋದ್ರೆ ನಿನ್ ತಲೆ ಹೊಡಿತೀನಿ- ಯುವತಿಯೊಂದಿಗೆ ವಾಗ್ವಾದಕ್ಕಿಳಿದ ವೆಂಕಟ್

ಬೆಂಗಳೂರು: ನೀ ಏನಾದ್ರೂ ಹೋದ್ರೆ ನಿನ್ ತಲೆ ಹೊಡಿತೀನಿ ಎಂದು ಫೈರಿಂಗ್ ಸ್ಟಾರ್ ಹುಚ್ಚ ವೆಂಕಟ್ ಯುವತಿಯೊಂದಿಗೆ ವಾಗ್ವಾದಕ್ಕಿಳಿದ ವಿಡಿಯೋವೊಂದು ಸಾಕಷ್ಟು ವೈರಲ್ ಆಗುತ್ತಿದೆ.

ದೊಡ್ಡಬಳ್ಳಾಪುರ ಟೋಲ್ ಬಳಿ ಯುವತಿ ಕಾಲೇಜಿಗೆ ತೆರಳುತ್ತಿದ್ದಳು. ಈ ವೇಳೆ ಅಲ್ಲಿಗೆ ಬಂದ ಹುಚ್ಚ ವೆಂಕಟ್ ಯುವತಿಯನ್ನು ಚುಡಾಯಿಸಲು ಮುಂದಾಗಿದ್ದಾರೆ. ಅಲ್ಲದೆ ಟೋಲ್‍ನಲ್ಲಿಯೇ ಯುವತಿಯೊಂದಿಗೆ ವಾಗ್ವಾದಕ್ಕಿಳಿದಿದ್ದಾರೆ. ಈ ವೇಳೆ ಯುವತಿ ಪೊಲೀಸರಿಗೆ ಫೋನ್ ಮಾಡುವುದಾಗಿ ಹೇಳಿದರೂ ಹುಚ್ಚ ವೆಂಕಟ್ ತಲೆಕೆಡಿಸಿಕೊಳ್ಳಲಿಲ್ಲ.

ವಿಡಿಯೋದಲ್ಲಿ ಏನಿದೆ?
ಹುಚ್ಚ ವೆಂಕಟ್: ನೀ ಏನ್ ಅದ್ರೂ ಹೋದ್ರೆ ನಿನ್ ತಲೆ ಹೊಡಿತೀನಿ
ಯುವತಿ: ಬಿಡಿ ನನ್ ಹೋಗ್ತೀನಿ
ವೆಂಕಟ್: ನನ್ ಮಾತ್ ಕೇಳು ನೀನ್ ಹೋಗಬಾರದು ಅಷ್ಟೇ, ಸರಿ ಇಲ್ಲ ನೋಡು ಹೇಳ್ತಾ ಇದ್ದೀನಿ
ಯುವತಿ: ಬಿಡಿ ಸರ್.. ನಾನ್ ಹೋಗಬೇಕು
ವೆಂಕಟ್: ಕಾಲಿಗೆ ಬೀಳ್ತೀನಿ ಇರು
ಯುವತಿ: ನಾನ್ ಕಾಲೇಜಿಗೆ ಹೋಗಬೇಕು ಬಿಡಿ ಸರ್
ವೆಂಕಟ್: ಕಾಲಿಗೆ ಬೀಳ್ತೀನಿ ಇರು.. ಕೇಳ್ತಿದ್ದೀನಿ ತಾನೇ, ಕಾಲೇಜಿಗೆ ನಾನೇ ಬಿಡ್ತೀನಿ ಬಾರೆ..

ಈ ಹಿಂದೆ ಹುಚ್ಚ ವೆಂಕಟ್ ಚೆನ್ನೈನ ಬೀದಿಯಲ್ಲಿ ತಿರುಗಾಡುತ್ತಿರುವ ವಿಡಿಯೋವನ್ನು ಭುವನ್ ತಮ್ಮ ಎಫ್‍ಬಿಯಲ್ಲಿ ಅಪ್ಲೋಡ್ ಮಾಡಿಕೊಂಡಿದ್ದರು. ಅಲ್ಲದೆ ವೆಂಕಟ್‍ನನ್ನು ಬೆಂಗಳೂರಿಗೆ ಕರೆ ತರಲು ಪ್ರಯತ್ನಿಸಿ ಎಂದು ಮನವಿ ಮಾಡಿಕೊಂಡಿದ್ದರು. ವಿಡಿಯೋ ನೋಡಿದ್ದ ಭುವನ್ ಸ್ನೇಹಿತರೊಬ್ಬರು ಹುಚ್ಚ ವೆಂಕಟ್‍ನನ್ನು ಬೆಂಗಳೂರಿಗೆ ಕರೆತರಲು ಪ್ರಯತ್ನಿಸಿದ್ದರು. ಬಳಿಕ ಚೆನ್ನೈನ ಬೀದಿಯಲ್ಲಿ ಚಪ್ಪಲಿ ಧರಿಸದೇ, ಕೊಳಕು ಬಟ್ಟೆ ಹಾಕಿಕೊಂಡು ತಿರುಗಾಡುತ್ತಿದ್ದ ಹುಚ್ಚ ವೆಂಕಟ್‍ನನ್ನ ಭುವನ್ ಸ್ನೇಹಿತ ಪತ್ತೆ ಹಚ್ಚಿದ್ದರು. ಹುಚ್ಚ ವೆಂಕಟ್‍ನನ್ನು ಕೂರಿಸಿಕೊಂಡು ಬೆಂಗಳೂರಿಗೆ ಹೋಗುವ ಬಗ್ಗೆ ಮಾತನಾಡಿದ್ದರು. ಆದರೆ ಸಹಾಯ ಮಾಡಲು ಹೋದ ಭುವನ್ ಸ್ನೇಹಿತನಿಗೆ ಹುಚ್ಚ ವೆಂಕಟ್ ಕೌಂಟರ್ ನೀಡಿದ್ದರು.

ಅದಾದ ಬಳಿಕ ವೆಂಕಟ್ ಕೊಡಗು, ಮಂಡ್ಯ ಹಾಗೂ ರಾಮನಗರದಲ್ಲಿ ಗಲಾಟೆ ಶುರು ಮಾಡಿದ್ದರು. ಆಗ ಜನರು ಅವರ ಮೇಲೆ ಹಲ್ಲೆ ನಡೆಸಲು ಮುಂದಾಗಿದ್ದರು. ಇದನ್ನು ಗಮನಿಸಿದ ನಟ ಭುವನ್ ಅಭಿಮಾನಿಗಳಲ್ಲಿ ಮನವಿ ಮಾಡಿಕೊಂಡಿದ್ದರು. ಭುವನ್ ಸಾಮಾಜಿಕ ಜಾಲತಾಣದಲ್ಲಿ, “ಗೆಳೆಯರೆ ದಯವಿಟ್ಟು ಹುಚ್ಚ ವೆಂಕಟ್ ಅನ್ನು ಎಲ್ಲಿ ಕಂಡರೂ ಹೊಡಿಬೇಡಿ. ಅವರಿಗೆ ಚಿಕಿತ್ಸೆಯ ಅವಶ್ಯಕತೆ ಇದೆ. ಅವರು ಕೆಟ್ಟವರಲ್ಲ. ಮಾನಸಿಕ ತೊಂದರೆಯಲ್ಲಿರುವವರು. ನನ್ನ ಕಳಕಳಿಯ ವಿನಂತಿ” ಎಂದು ಮನವಿ ಮಾಡಿಕೊಂಡಿದ್ದರು.