– ಟ್ರಂಪ್ ನಡೆ ಡಾಲರ್ಗೆ ಪೆಟ್ಟು ಕೊಡ್ತಿದ್ಯಾ?
ಒಂದೆಡೆ ರಷ್ಯಾ-ಉಕ್ರೇನ್, ಇಸ್ರೇಲ್-ಪ್ಯಾಲೆಸ್ತೀನ್ ಸಂಘರ್ಷ, ಮತ್ತೊಂದೆಡೆ ಗ್ರೀನ್ಲ್ಯಾಂಡ್ ಬಿಕ್ಕಟ್ಟು, ಇನ್ನೊಂದೆಡೆ ವೆನೆಜುವೆಲಾ ರಾಜಕೀಯ ಅಸ್ಥಿರತೆ, ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರ ಸುಂಕದ ಬೆದರಿಕೆಗಳು ಜಗತ್ತಿನ ಆರ್ಥಿಕ ವ್ಯವಸ್ಥೆಯನ್ನೇ ತಲೆಕೆಳಗು ಮಾಡಿವೆ. ಜಾಗತಿಕ ರಾಜಕೀಯ ಮತ್ತು ಆರ್ಥಿಕ ಅನಿಶ್ಚಿತತೆಯಿಂದಾಗಿ ಷೇರು ಮಾರುಕಟ್ಟೆಯಲ್ಲಿ ಅಲ್ಲೋಲ-ಕಲ್ಲೋಲ ಆಗಿದೆ. ಪರಿಣಾಮವಾಗಿ ಹೂಡಿಕೆದಾರರು ಸುರಕ್ಷಿತ ತಾಣ ಚಿನ್ನದತ್ತ ಮುಖ ಮಾಡಿದ್ದಾರೆ. ಇದರಿಂದ ದಿಢೀರ್ ಚಿನ್ನದ ಬೆಲೆ ಏರಿಕೆ ಕಂಡು, ಇತಿಹಾಸದಲ್ಲಿ ಮೊದಲ ಬಾರಿಗೆ ಚಿನ್ನದ ಬೆಲೆ ಪ್ರತಿ ಔನ್ಸ್ಗೆ 5,000 ಡಾಲರ್ ಗಡಿ ದಾಟಿತ್ತು.
ಚಿನ್ನದ ಬೆಲೆ ಏರಿಕೆಗೆ ಟ್ರಂಪ್ ಕೊಡುಗೆ?
ಹೌದು, ಹಳದಿ ಲೋಹದ ಬೆಲೆ ಐತಿಹಾಸಿಕ ದಾಖಲೆಗೆ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರ ಕೊಡುಗೆ ಪ್ರಮುಖ ಕಾರಣ. ಟ್ರಂಪ್ ಆಡಳಿತವು ಜಾಗತಿಕ ಕ್ರಮವನ್ನು ನಿರಂತರವಾಗಿ ಹಾಳುಗೆಡವುತ್ತಿದೆ. ಹೀಗಾಗಿ, ಸುರಕ್ಷಿತ ಸ್ವರ್ಗ ಸಾಧನವಾಗಿ ಚಿನ್ನಕ್ಕೆ ಬೇಡಿಕೆ ಹೆಚ್ಚಾಗಿದೆ. ವೆನೆಜುವೆಲಾದ ಅಧ್ಯಕ್ಷ ನಿಕೋಲಸ್ ಮಡುರೊ ಅವರನ್ನು ಅಮೆರಿಕ ಅಪಹರಿಸಿ ಜೈಲಿಗಟ್ಟಿದೆ. ಗ್ರೀನ್ಲ್ಯಾಂಡ್ ಮೇಲೆ ಮಿಲಿಟರಿ ಆಕ್ರಮಣ ನಡೆಸುವುದಾಗಿ ಟ್ರಂಪ್ ಬೆದರಿಕೆ ಹಾಕಿದ್ದಾರೆ. ಇರಾನ್ನೊಂದಿಗೆ ಯುದ್ಧವನ್ನು ಪ್ರಾರಂಭಿಸುವುದಾಗಿ ಘೋಷಿಸಿದ್ದಾರೆ. ಕೆನಡಾ ದೇಶ ಚೀನಾದೊಂದಿಗೆ ವ್ಯಾಪಾರ ಒಪ್ಪಂದ ಮಾಡಿಕೊಂಡರೆ, ಅದರ ಮೇಲೆ 100% ಸುಂಕ ವಿಧಿಸುವುದಾಗಿ ಎಚ್ಚರಿಸಿದ್ದಾರೆ. ಅಮೆರಿಕದೊಂದಿಗೆ ವ್ಯಾಪಾರ ಒಪ್ಪಂದವನ್ನು ಜಾರಿಗೆ ತರಲು ವಿಫಲವಾದ ಆರೋಪದ ಮೇಲೆ ದಕ್ಷಿಣ ಕೊರಿಯಾದ ಮೇಲೆ 25% ಸುಂಕವನ್ನು ವಿಧಿಸುವುದಾಗಿಯೂ ಟ್ರಂಪ್ ಬೆದರಿಕೆ ಹಾಕಿದ್ದಾರೆ. ಟ್ರಂಪ್ ದೀರ್ಘಕಾಲೀನ ಸ್ನೇಹಿತ ಮತ್ತು ಶತ್ರುಗಳನ್ನು ಒಂದೇ ರೀತಿ ನೋಡುತ್ತಿದ್ದಾರೆ. ಈ ಎಲ್ಲಾ ಬೆಳವಣಿಗೆಗಳು ಮಾರುಕಟ್ಟೆಯಲ್ಲಿ ಪಲ್ಲಟ ಸೃಷ್ಟಿಸಿದ್ದು, ಚಿನ್ನವನ್ನು ಸುರಕ್ಷಿತ ಆಸ್ತಿಯನ್ನಾಗಿ ಮಾಡಿವೆ.
ಫೆಡ್ ಬಡ್ಡಿದರ ಕಡಿತ ಸಾಧ್ಯತೆ
ಹೂಡಿಕೆದಾರರು ಫೆಡರಲ್ ರಿಸರ್ವ್ನ ಸ್ವಾಯತ್ತತೆಯ ಬಗ್ಗೆ ಕಳವಳ ವ್ಯಕ್ತಪಡಿಸಿದ್ದಾರೆ. ಫೆಡ್ ಬಡ್ಡಿದರಗಳನ್ನು ಕಡಿತಗೊಳಿಸುವ ಸಾಧ್ಯತೆ ಇದೆ. ಬಡ್ಡಿದರ ಕಡಿತಗೊಂಡರೆ, ಬಾಂಡ್ಗಳಿಗಿಂತ ಚಿನ್ನದ ಮೇಲಿನ ಹೂಡಿಕೆಯೇ ಲಾಭದಾಯಕ ಎಂದು ಹೂಡಿಕೆದಾರರು ಈ ಕಡೆ ವಾಲುತ್ತಾರೆ. ಕಡಿಮೆ ಬಡ್ಡಿ ದರಗಳು ಹಣದುಬ್ಬರಕ್ಕೆ ಕಾರಣವಾಗಿ, ವಿದೇಶಿ ಹೂಡಿಕೆದಾರರನ್ನು ಬೇರೆಡೆ ಹೆಚ್ಚಿನ ಆದಾಯವನ್ನು ಪಡೆಯಲು ಪ್ರೇರೇಪಿಸುತ್ತಿದೆ. ಈ ಬೆಳವಣಿಗೆ ಡಾಲರ್ ಅನ್ನು ದುರ್ಬಲಗೊಳಿಸುತ್ತವೆ. ಅಲ್ಲದೇ, ಮುಂದಿನ ಫೆಡ್ ಅಧ್ಯಕ್ಷರಾಗಿ ತಮಗೆ ಹತ್ತಿರದ ವ್ಯಕ್ತಿಯನ್ನು ಟ್ರಂಪ್ ನೇಮಿಸುವ ಸಾಧ್ಯತೆ ಇದೆ. ಇದು ಹಣಕಾಸು ನೀತಿ ಸಡಿಲಿಕೆಗೆ ದಾರಿ ಮಾಡುಕೊಡುವ ಸಾಧ್ಯತೆ ಇದೆ. ಹೀಗಾಗಿ, ಹೂಡಿಕೆದಾರರು ಚಿನ್ನದತ್ತ ಮುಖ ಮಾಡುತ್ತಿದ್ದಾರೆ.
RBI ಸೇರಿ ಕೇಂದ್ರ ಬ್ಯಾಂಕ್ಗಳಿಗೂ ಚಿನ್ನದ ಮೇಲೆ ಕಣ್ಣು
ಚಿನ್ನದ ಮೇಲೆ ಹೂಡಿಕೆ ಮಾಡುವವರಲ್ಲಿ ಕೇಂದ್ರ ಬ್ಯಾಂಕ್ಗಳ ಪಾಲು ದೊಡ್ಡದಿದೆ. ಈ ಸಾಲಿನಲ್ಲಿ ಆರ್ಬಿಐ ಕೂಡ ಸೇರಿದೆ. ಚಿನ್ನದ ಮೇಲೆ ಅತಿ ಹೆಚ್ಚು ಹೂಡಿಕೆ ಮಾಡಿರುವ ಕೇಂದ್ರ ಬ್ಯಾಂಕ್ಗಳನ್ನು ಹೊಂದಿರುವ ಟಾಪ್ 10 ರಾಷ್ಟ್ರಗಳಲ್ಲಿ ಭಾರತ 8ನೇ ಸ್ಥಾನದಲ್ಲಿದೆ. ಆದಾಗ್ಯೂ, ಕಳೆದ ವರ್ಷ ಆರ್ಬಿಐ ಅತಿ ಹೆಚ್ಚು ಚಿನ್ನ ಖರೀದಿಸಿಲ್ಲ. 2025 ರಲ್ಲಿ ಆರ್ಬಿಐ ಚಿನ್ನದ ಹಿಡುವಳಿಗಳು ಕೇವಲ 4 ಟನ್ಗಳಷ್ಟು ಮಾತ್ರ ಹೆಚ್ಚಾಗಿದೆ. 2025 ರ ನವೆಂಬರ್ ಹೊತ್ತಿಗೆ ಪೋಲೆಂಡ್ (95 ಟನ್), ಕಝಾಕಿಸ್ತಾನ್ (49 ಟನ್) ಮತ್ತು ಬ್ರೆಜಿಲ್ (43 ಟನ್) ಕೇಂದ್ರ ಬ್ಯಾಂಕುಗಳು ಅತಿ ಹೆಚ್ಚು ಚಿನ್ನ ಖರೀದಿಸಿದ ರಾಷ್ಟ್ರಗಳ ಪಟ್ಟಿಯಲ್ಲಿ ಮುಂಚೂಣಿಯಲ್ಲಿವೆ. ಆದರೆ, ಕೇಂದ್ರ ಬ್ಯಾಂಕುಗಳು ಚಿನ್ನ ಖರೀದಿಸುವುದು ಸುದ್ದಿಯಲ್ಲ. ಈ ಬ್ಯಾಂಕುಗಳು ಮೀಸಲು ನಿಧಿಯಾಗಿ ಹೊಂದಿರುವ ಚಿನ್ನವು ಮುಖ್ಯವಾಗುತ್ತದೆ. ಉದಾಹರಣೆಗೆ, ಆರ್ಬಿಐ ಈಗ ತನ್ನ ವಿದೇಶೀ ವಿನಿಮಯ ಸಂಗ್ರಹದ 17% ಅನ್ನು ಚಿನ್ನದ ರೂಪದಲ್ಲಿ ಹೊಂದಿದೆ. ಇದು ಒಂದು ವರ್ಷದ ಹಿಂದೆ 12% ರಷ್ಟಿತ್ತು. ಇದಕ್ಕೆ ನೇರ ಮತ್ತು ಪರೋಕ್ಷ ಕಾರಣ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್.
ಚಿನ್ನದ ಮುಂದೆ ಡಾಲರ್ ದುರ್ಬಲ?
ಡೊನಾಲ್ಡ್ ಟ್ರಂಪ್ ವ್ಯಾಪಾರ ನೀತಿ ಮತ್ತು ನಿರ್ಬಂಧಗಳು ಡಾಲರ್ನ ಸ್ಥಾನಮಾನವನ್ನು ದುರ್ಬಲಗೊಳಿಸಿದೆ. ಇದರ ಪರಿಣಾಮವಾಗಿ 2025 ರಲ್ಲಿ ಯುಎಸ್ ಡಾಲರ್ 9% ರಷ್ಟು ದುರ್ಬಲಗೊಂಡಿದೆ. ಒಂದು ದಶಕದಲ್ಲೇ ಅತಿ ಹೆಚ್ಚಿನ ಕುಸಿತ ಇದಾಗಿದೆ. ಟ್ರಂಪ್ ಅವರ ನೀತಿ ಅನಿಶ್ಚಿತತೆಯ ನಡುವೆ ಸುರಕ್ಷಿತ ಸ್ವತ್ತುಗಳ ಬೇಡಿಕೆ ಹೆಚ್ಚುತ್ತಿರುವುದರಿಂದ, ಇದು ಚಿನ್ನದ ಬೆಲೆಗಳ ಏರಿಕೆಗೆ ಸಹಾಯ ಮಾಡಿದೆ. ಜಾಗತಿಕ ಅನಿರೀಕ್ಷಿತ ಬೆಳವಣಿಗೆಗಳು ಜನರನ್ನು ಡಾಲರ್ನಿಂದ ದೂರ ಸರಿಯುವಂತೆ ಮಾಡಿವೆ.
ಡಾಲರ್ಗೆ ಬಿಗ್ ಶಾಕ್!
2022ರ ಫೆಬ್ರವರಿಯಲ್ಲಿ ಉಕ್ರೇನ್ ಮೇಲೆ ಯುದ್ಧ ನಡೆಸಿದ ರಷ್ಯಾ ಮೇಲೆ ಯುಎಸ್ ಹಲವಾರು ನಿರ್ಬಂಧಗಳನ್ನು ವಿಧಿಸಿತು. ಈ ಕ್ರಮವು ಡಾಲರ್ನಿಂದ ವಿದೇಶೀ ವಿನಿಮಯ ಮೀಸಲಿನ ಭಾರಿ ಬದಲಾವಣೆಗೆ ಕಾರಣವಾಯಿತು. ಡಾಲರ್ ಅಪನಗದೀಕರಣದ ಲಕ್ಷಣಗಳು ಅಥವಾ ಡಾಲರ್ನಿಂದ ಕ್ರಮೇಣ ದೂರ ಸರಿಯುವುದು ಕೆಲವು ಸಮಯದಿಂದ ಗೋಚರಿಸುತ್ತಿದೆ. ಅಂತರರಾಷ್ಟ್ರೀಯ ಹಣಕಾಸು ನಿಧಿಯ (IMF) ಮಾಹಿತಿಯ ಪ್ರಕಾರ, ಜಾಗತಿಕ ವಿದೇಶಿ ವಿನಿಮಯ ಮೀಸಲುಗಳಲ್ಲಿ US ಡಾಲರ್ನ ಪಾಲು 2024 ರಲ್ಲಿ 30 ವರ್ಷಗಳ ಕನಿಷ್ಠ ಮಟ್ಟವಾದ 58.5% ಕ್ಕೆ ಇಳಿದಿದೆ. 1999 ರಲ್ಲಿ ಈ ಸಂಖ್ಯೆ 71% ರಷ್ಟಿತ್ತು.
‘ಡಾಲರ್ ಅಪನಗದೀಕರಣವು ಜಾಗತಿಕ ಭದ್ರತಾ ರಚನೆಯ ಮೇಲೆ ಆಳವಾದ ಪರಿಣಾಮಗಳನ್ನು ಬೀರುತ್ತದೆ. ಯುನೈಟೆಡ್ ಸ್ಟೇಟ್ಸ್ ತನ್ನ ಮಿಲಿಟರಿಗೆ ಹಣಕಾಸು ಒದಗಿಸುವ ಮತ್ತು ಬಲವಂತದ ಆರ್ಥಿಕ ಒತ್ತಡವನ್ನು ಹೇರುವ ಸಾಮರ್ಥ್ಯವನ್ನು ಕಡಿಮೆ ಮಾಡುತ್ತದೆʼ ಎಂದು ಜಿನಿವಾ ಸೆಂಟರ್ ಫಾರ್ ಸೆಕ್ಯುರಿಟಿ ಪಾಲಿಸಿಯ ಭೂ ಅರ್ಥಶಾಸ್ತ್ರ ಮತ್ತು ನಿರ್ಬಂಧಗಳ ನಿರ್ದೇಶಕ ಅಲಿ ಅಹ್ಮದಿ ತಿಳಿಸಿದ್ದಾರೆ. ಆದಾಗ್ಯೂ, ಭವಿಷ್ಯದಲ್ಲಿ ಯುಎಸ್ ಡಾಲರ್ ಅತ್ಯಂತ ಪ್ರಬಲ ಕರೆನ್ಸಿಯಾಗಿ ಉಳಿಯಲಿದೆ.
ಚಿನ್ನ ದಾಸ್ತಾನು ಮಾಡ್ತಿವೆ ಕೇಂದ್ರ ಬ್ಯಾಂಕ್ಗಳು
1971 ರವರೆಗೆ ಅಮೆರಿಕ ಚಿನ್ನದ ಮಾನದಂಡವನ್ನು ಕೈಬಿಟ್ಟಾಗ, ಕರೆನ್ಸಿಗಳಿಗೆ ಚಿನ್ನವು ಆಧಾರವಾಗಿ ಕಾರ್ಯನಿರ್ವಹಿಸುತ್ತಿತ್ತು. ಅಂದಿನಿಂದ ಕೇಂದ್ರ ಬ್ಯಾಂಕುಗಳು ಡಾಲರ್ ಮತ್ತು ಚಿನ್ನ ಎರಡನ್ನೂ ಮೀಸಲುಗಳಾಗಿ ಇಟ್ಟುಕೊಂಡಿವೆ. 1997-98 ರ ಏಷ್ಯನ್ ಬಿಕ್ಕಟ್ಟಿನ ನಂತರ, ವಿಶ್ವಾದ್ಯಂತ ಕೇಂದ್ರ ಬ್ಯಾಂಕುಗಳು ಚಿನ್ನದ ನಿವ್ವಳ ಮಾರಾಟಗಾರರಿಂದ ನಿವ್ವಳ ಖರೀದಿದಾರರಾಗಿ ಬದಲಾದವು. ಜಾಗತಿಕ ವಿದೇಶಿ ವಿನಿಮಯ ಮೀಸಲು 2000 ರಲ್ಲಿ ಸುಮಾರು 3 ಟ್ರಿಲಿಯನ್ ಡಾಲರ್ ಇತ್ತು. ಇದು 2014 ರಲ್ಲಿ ಸರಿಸುಮಾರು 13 ಟ್ರಿಲಿಯನ್ ಡಾಲರ್ಗೆ ಏರಿತು ಎಂದು ವಿಶ್ವ ಚಿನ್ನದ ಮಂಡಳಿಯ ದತ್ತಾಂಶ ತಿಳಿಸಿದೆ. 2008 ರಲ್ಲಿ ಜಾಗತಿಕ ಆರ್ಥಿಕ ಬಿಕ್ಕಟ್ಟಿನ ಸಮಯದಲ್ಲಿ ಚಿನ್ನದ ಬೆಲೆ ಔನ್ಸ್ಗೆ 1,000 ಡಾಲರ್ ಮತ್ತು 2020 ರಲ್ಲಿ ಕೋವಿಡ್ ಸಾಂಕ್ರಾಮಿಕ ಸಮಯದಲ್ಲಿ ಔನ್ಸ್ಗೆ 2,000 ಡಾಲರ್ ದಾಟಿತು.
ರಷ್ಯಾ-ಉಕ್ರೇನ್ ಯುದ್ಧದಿಂದಾದ ಬದಲಾವಣೆ ಏನು?
ಡೊನಾಲ್ಡ್ ಟ್ರಂಪ್ ಅವರ ಜಾಗತಿಕ ಕ್ರಮಗಳಿಂದಾಗಿ ಕೇಂದ್ರ ಬ್ಯಾಂಕ್ಗಳಲ್ಲಿ ಚಿನ್ನ ಸಂಗ್ರಹಣೆ ಏರಿಕೆಯಾಗಿದೆ. 2022ರಲ್ಲಿ ರಷ್ಯಾ ಮತ್ತು ಉಕ್ರೇನ್ ನಡುವೆ ಯುದ್ಧ ಪ್ರಾರಂಭವಾದಾಗ, G7 ರಾಷ್ಟ್ರಗಳು ರಷ್ಯಾಗೆ ನಿರ್ಬಂಧಗಳನ್ನು ವಿಧಿಸಿದವು. ಯುರೋಪ್ನಲ್ಲಿ ರಷ್ಯಾದ ಸ್ವತ್ತುಗಳನ್ನು ಸ್ಥಗಿತಗೊಳಿಸಲು ಮುಂದಾದಾಗ, ಅನೇಕ ದೇಶಗಳು US ಡಾಲರ್ನಿಂದ ದೂರವಿರಲು ಯೋಜಿಸಿದವು. 2022 ಕ್ಕೂ ಮೊದಲು ಕೇಂದ್ರ ಬ್ಯಾಂಕ್ಗಳಿಂದ ಚಿನ್ನದ ಖರೀದಿ ವಾರ್ಷಿಕವಾಗಿ ಸರಾಸರಿ 400-500 ಟನ್ಗಳಷ್ಟಿತ್ತು. ಈಗ ಆ ಪ್ರಮಾಣ ಪ್ರತಿ ವರ್ಷ 1000 ಟನ್ಗಳನ್ನು ಮೀರಿದೆ. ಇದು 2022 ರ ಪೂರ್ವದ ಸರಾಸರಿಗಿಂತ ಎರಡು ಪಟ್ಟು ಹೆಚ್ಚು ಎಂದು ಜೆಪಿ ಮಾರ್ಗನ್ ವರದಿ ತಿಳಿಸಿದೆ.
ಮತ್ತೆ ಇಳಿಕೆ ಕಂಡ ಚಿನ್ನ
ಈಗ ಚಿನ್ನದ ಬೆಲೆ ಮತ್ತೆ ಇಳಿಕೆ ಕಂಡಿದೆ. ಶುಕ್ರವಾರ ಮತ್ತು ಶನಿವಾರ ಎರಡು ದಿನಗಳಲ್ಲಿ ಒಂದೂವರೆ ಸಾವಿರ ರೂ.ಗೂ ಹೆಚ್ಚು ಬೆಲೆ ಕಡಿಮೆ ಆಗಿದೆ. 10 ಗ್ರಾಂ. 22 ಕ್ಯಾರೆಟ್ ಚಿನ್ನದ ಬೆಲೆ ಈಗ 1,47,200 ರೂ. ಇದೆ. 24 ಕ್ಯಾರೆಟ್ ಚಿನ್ನದ ಬೆಲೆ 1,60,580 ರೂ. ಆಗಿದೆ. ಬೆಂಗಳೂರಿನಲ್ಲಿ ಚಿನ್ನದ ಬೆಲೆ 10 ಗ್ರಾಂಗೆ 1,47,200 ರೂ. ಆಗಿದೆ.
ಈಗ ಪ್ರತಿ ಔನ್ಸ್ ಚಿನ್ನಕ್ಕೆ ಬೆಲೆ ಎಷ್ಟು?
2026ರ ಜನವರಿ 31ಕ್ಕೆ ಚಿನ್ನದ ಬೆಲೆ ಪ್ರತಿ ಔನ್ಸ್ಗೆ $4,800–$4,900 ರ ಆಸುಪಾಸಿನಲ್ಲಿದೆ. ಈ ವಾರದ ಆರಂಭದಲ್ಲಿ $5,500–$5,600ರ ದಾಖಲೆಯ ಗರಿಷ್ಠ ಮಟ್ಟವನ್ನು ತಲುಪಿತ್ತು. ಈಗ ಸ್ವಲ್ಪ ಮಟ್ಟಿನ ಕುಸಿತ ಕಂಡಿದೆ.
