ಬೆಂಗಳೂರು: ಮಾನಸಿಕವಾಗಿ ಮನನೊಂದ ಗೃಹಿಣಿ ಆತ್ಮಹತ್ಯೆಗೆ ಶರಣಾಗಿರುವ ಘಟನೆ ಶುಕ್ರವಾರ ರಾತ್ರಿ ಸಹಕಾರನಗರದಲ್ಲಿ ನಡೆದಿದೆ.
ಮೋನಿಕಾ(30) ಆತ್ಮಹತ್ಯೆಗೆ ಶರಣಾದ ಗೃಹಿಣಿ. ಮೋನಿಕಾ ಉದ್ಯಮಿ ಪ್ರಕಾಶ್ ಅವರ ಪುತ್ರಿಯಾಗಿದ್ದು, ಶುಕ್ರವಾರ ರಾತ್ರಿ ಸುಮಾರು 9 ಗಂಟೆಗೆ ಮನೆಯಲ್ಲಿ ಯಾರು ಇಲ್ಲದ ವೇಳೆ ಫ್ಯಾನಿಗೆ ನೇಣು ಬಿಗಿದುಕೊಂಡು ಆತ್ಮಹತ್ಯೆ ಮಾಡಿಕೊಂಡಿದ್ದಾಳೆ.
ಮೋನಿಕಾ ಕಳೆದ 10 ವರ್ಷಗಳ ಹಿಂದೆ ಕಾರ್ತಿಕ್ ಎಂಬವರನ್ನು ಮದುವೆ ಆಗಿದ್ದರು. ಕಾರ್ತಿಕ್ ಜೆ.ಪಿ ನಗರ ನಿವಾಸಿಯಾಗಿದ್ದು, ಖಾಸಗಿ ಥಿಯೇಟರ್ ಮಾಲೀಕ ಕೂಡ ಆಗಿದ್ದಾರೆ. ಮೋನಿಕಾ ಹಾಗೂ ಕಾರ್ತಿಕ್ಗೆ ಇಬ್ಬರು ಹೆಣ್ಣು ಮಕ್ಕಳಿದ್ದಾರೆ.
ಮೋನಿಕಾ 9 ತಿಂಗಳ ಹಿಂದೆ ಪತಿ ಜೊತೆ ಜಗಳ ಮಾಡಿಕೊಂಡಿದ್ದಳು. ಅಲ್ಲದೇ ಕೆಲ ತಿಂಗಳಿನಿಂದ ಮೋನಿಕಾ ತಂದೆಯ ಮನೆಯಲ್ಲೇ ವಾಸಿಸುತ್ತಿದ್ದಳು. ಶುಕ್ರವಾರ ಕೆಲಸದ ನಿಮಿತ್ತ ಮೋನಿಕಾ ಅವರ ತಂದೆ ಪ್ರಕಾಶ್ ಹಾಸನಕ್ಕೆ ತೆರೆಳಿದ್ದರು. ಈ ವೇಳೆ ಮೋನಿಕಾ ತನ್ನ ತಂದೆಗೆ ಕರೆ ಮಾಡಿದ್ದಾಳೆ. ತನ್ನ ತಂದೆ ಜೊತೆ ಮಾತನಾಡುವಾಗ ಮೋನಿಕಾ ಕಣ್ಣೀರಿಡುತ್ತಿದ್ದಳು.
ನನಗೆ ಬದುಕಲು ಆಗುತಿಲ್ಲ ಎಂದು ಮೋನಿಕಾ ಕಣ್ಣಿರಿಟ್ಟು ಕಾಲ್ ಕಟ್ ಮಾಡಿದ್ದಾಳೆ. ಬಳಿಕ ತಂದೆಯಿಂದ ಕರೆ ಬಂದರೂ ಮೋನಿಕಾ ಸ್ವೀಕರಿಸಲಿಲ್ಲ. ಆತಂಕದಿಂದ ಪ್ರಕಾಶ್ ಶುಕ್ರವಾರ ರಾತ್ರಿ ಮನೆಗೆ ಬಂದಾಗ ಮೋನಿಕಾ ದೇಹ ನೇಣು ಬಿಗಿದ ಸ್ಥಿತಿಯಲ್ಲಿ ಪತ್ತೆಯಾಗಿದೆ. ಈ ಬಗ್ಗೆ ಕೊಡಿಗೇಹಳ್ಳಿ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.
ಪಬ್ಲಿಕ್ ಟಿವಿಯನ್ನು ಇನ್ ಸ್ಟಾಗ್ರಾಮ್ ನಲ್ಲಿ ಫಾಲೋ ಮಾಡಿ www.instagram.com/publictv , ಪಬ್ಲಿಕ್ ಟಿವಿ ಆ್ಯಪ್ ಡೌನ್ಲೋಡ್ ಮಾಡಿ: play.google.com/publictv
