ಇದು ಭಾರತದ ಮೇಲೆ ನಡೆಸಿದ ವ್ಯವಸ್ಥಿತ ದಾಳಿ - ಆರೋಪಗಳಿಗೆ 413 ಪುಟಗಳ ಉತ್ತರ ನೀಡಿದ ಅದಾನಿ ಗ್ರೂಪ್‌

ನವದೆಹಲಿ: ನ್ಯೂಯಾರ್ಕ್ ಮೂಲದ ಹಿಂಡೆನ್‌ಬರ್ಗ್ ರಿಸರ್ಚ್ (Hindenburg Research) ಮಾಡಿದ ಆರೋಪ “ಭಾರತದ ಮೇಲೆ ನಡೆಸಿದ ವ್ಯವಸ್ಥಿತ ದಾಳಿ” ಎಂದು ಅದಾನಿ ಸಮೂಹ (Adani Group) ಖಾರವಾಗಿ ಪ್ರತಿಕ್ರಿಯಿಸಿದೆ.

ತನ್ನ ವಿರುದ್ಧ “ಸ್ಟಾಕ್ ಮ್ಯಾನಿಪ್ಯುಲೇಷನ್ ಮತ್ತು ಲೆಕ್ಕಪತ್ರ ವಂಚನೆ” ಆರೋಪ ಕೇಳಿ ಬಂದ ಹಿನ್ನೆಲೆಯಲ್ಲಿ ಅದಾನಿ ಸಮೂಹ 413 ಪುಟಗಳ ದೀರ್ಘ ಉತ್ತರವನ್ನು ಪ್ರಕಟಿಸಿದೆ.

ಇದು ಯಾವುದೇ ನಿರ್ದಿಷ್ಟ ಕಂಪನಿಯ ಮೇಲೆ ಕೇವಲ ನಡೆಸಿದ ದಾಳಿಯಲ್ಲ. ಇದು ಭಾರತ (India), ಭಾರತೀಯ ಸಂಸ್ಥೆಗಳ ಸ್ವಾತಂತ್ರ್ಯ, ಸಮಗ್ರತೆ ಮತ್ತು ಗುಣಮಟ್ಟ ಮತ್ತು ಭಾರತದ ಬೆಳವಣಿಗೆಯ ಕಥೆ ಮತ್ತು ಮಹತ್ವಾಕಾಂಕ್ಷೆ ಮೇಲೆ ನಡೆಸಿದ ದಾಳಿ ಎಂದು ತಿರುಗೇಟು ನೀಡಿದೆ. ಇದನ್ನೂ ಓದಿ: 1 ವರದಿಗೆ ಕರಗಿತು 4 ಲಕ್ಷ ಕೋಟಿ ಸಂಪತ್ತು – 7ನೇ ಸ್ಥಾನಕ್ಕೆ ಜಾರಿದ ಅದಾನಿ: ಯಾವುದು ಎಷ್ಟು ಇಳಿಕೆ?

Adani Group’s detailed response to Hindenburg’s Unsubstantiated Accusationshttps://t.co/byWV8z9q6O

— Adani Group (@AdaniOnline) January 29, 2023

ಯಾವುದೇ ವಿಶ್ವಾಸಾರ್ಹತೆ ಅಥವಾ ನೈತಿಕತೆಯಿಲ್ಲದೆ ಸಾವಿರಾರು ಮೈಲುಗಳಷ್ಟು ದೂರದಲ್ಲಿರುವ ಕಂಪನಿಯ ಹೇಳಿಕೆಗಳು ನಮ್ಮ ಹೂಡಿಕೆದಾರರ ಮೇಲೆ ಗಂಭೀರವಾದ ಪ್ರತಿಕೂಲ ಪರಿಣಾಮವನ್ನು ಉಂಟುಮಾಡಿದೆ ಎಂದು ಅದಾನಿ ಗ್ರೂಪ್ ಹೇಳಿದೆ.

ಹಿಂಡೆನ್‌ಬರ್ಗ್ ಅನೈತಿಕ ಶಾರ್ಟ್‌ ಸೆಲ್ಲರ್‌ (ಷೇರು ಮಾರುಕಟ್ಟೆಯಲ್ಲಿ ಷೇರುಗಳ ದರ ದಿಢೀರ್‌ ಕುಸಿಯುವಾಗ ಲಾಭ ಮಾಡಿಕೊಳ್ಳುವವರು) ಆಗಿದ್ದು, ಷೇರು ಅವ್ಯವಹಾರದಿಂದ ದುರ್ಲಾಭ ಮಾಡಿಕೊಂಡಿದೆ. ಈ ವರದಿಯು ಸ್ವತಂತ್ರ ಅಥವಾ ವಸ್ತುನಿಷ್ಠ ಅಥವಾ ಉತ್ತಮ ಸಂಶೋಧನೆ ಅಲ್ಲ. ಪೂರ್ವಯೋಜಿತವಾಗಿ ಈ ಕುತಂತ್ರ ಮಾಡಿ ಹೂಡಿಕೆದಾರರಿಗೆ (Investors) ನಷ್ಟ ಉಂಟು ಮಾಡಿದೆ ಎಂದು ಆರೋಪ ಮಾಡಿದೆ. ಅದಾನಿ ಸಮೂಹ ಅನ್ವಯವಾಗುವ ಎಲ್ಲಾ ಕಾನೂನುಗಳು ಮತ್ತು ನಿಬಂಧನೆಗಳಿಗೆ ಅನುಸಾರವಾಗಿದೆ ಎಂದು ಪುನರುಚ್ಚರಿಸಿದೆ.

adani group

ಹಿಂಡೆನ್‌ಬರ್ಗ್ ರಿಸರ್ಚ್‌ನ ಕಂಪನಿಯ ವಿಶ್ವಾಸರ್ಹತೆಯ ಬಗ್ಗೆ ಗಂಭೀರ ಪ್ರಶ್ನೆ ಎತ್ತಿದ ಅದಾನಿ ಸಮೂಹ, ವಿಪರ್ಯಾಸವೆಂದರೆ ಪಾರದರ್ಶಕತೆ ಮತ್ತು ಮುಕ್ತತೆಯನ್ನು ಬಯಸುವ ಹಿಂಡೆನ್‌ಬರ್ಗ್ ಸಂಸ್ಥೆ ತನ್ನ ಉದ್ಯೋಗಿಗಳು ಮತ್ತು ಅದರ ಹೂಡಿಕೆದಾರರ ಬಗ್ಗೆ ಹೆಚ್ಚು ಏನೂ ತಿಳಿಸಿಲ್ಲ. ಕಂಪನಿ ದಶಕಗಳ ಅನುಭವ ಹೊಂದಿದೆ ಎಂದು ತಿಳಿಸಿದೆ. ಆದರೆ ವೆಬ್‌ಸೈಟ್‌ 2017ರಲ್ಲಿ ಸ್ಥಾಪನೆಯಾಗಿದೆ ಎಂದು ಗಂಭೀರ ಆರೋಪ ಮಾಡಿದೆ.

ಸುಳ್ಳು ಆಧಾರ ರಹಿತ ಆರೋಪ ಮಾಡಿರುವ ಹಿಂಡೆನ್‌ಬರ್ಗ್ ರಿಸರ್ಚ್‌ ವರದಿಗೆ ನಾವು ಪ್ರತಿಕ್ರಿಯಿಸುವ ಆಗತ್ಯವೇ ಇಲ್ಲ. ಆದರೂ ಕೇಳಿದ 88 ಪ್ರಶ್ನೆಗಳಿಗೆ ನಾವು ಉತ್ತರ ನೀಡಿದ್ದೇವೆ ಎಂದು ಅದಾನಿ ಸಮೂಹ ತಿಳಿಸಿದೆ.

ಅನ್ವಯವಾಗುವ ಎಲ್ಲಾ ಕಾನೂನುಗಳು ಮತ್ತು ನಿಬಂಧನೆಗಳಿಗೆ ಅನುಸಾರವಾಗಿಯೇ ಕಂಪನಿ ನಡೆಯುತ್ತಿದೆ. ಬಲವಾದ ಆಂತರಿಕ ನಿಯಂತ್ರಣ ಮತ್ತು ಆಡಿಟ್ ನಿಯಂತ್ರಣಗಳನ್ನು ನಾವು ಹೊಂದಿದ್ದೇವೆ. ಅದಾನಿ ಸಮೂಹದ ಎಲ್ಲಾ ಲಿಸ್ಟೆಡ್ ಕಂಪನಿಗಳು ದೃಢವಾದ ಆಡಳಿತ ಚೌಕಟ್ಟನ್ನು ಹೊಂದಿದೆ ಎಂದು ಸಮೂಹ ತಿಳಿಸಿದೆ.