ಮಂಗಳೂರು: ಮಾಜಿ ಸಿಎಂ ಎಚ್.ಡಿ ಕುಮಾರಸ್ವಾಮಿ ಅವರು ಮಂಗಳೂರಿನಲ್ಲಿ ಪತ್ತೆಯಾಗಿದ್ದ ಬಾಂಬ್ ವಿಚಾರವಾಗಿ ಮಾತನಾಡುವಾಗ ‘ಮಿಣಿ ಮಿಣಿ ಪೌಡರ್’ ಎಂಬ ಪದ ಬಳಸಿದ್ದರು. ಈ ‘ಮಿಣಿ ಮಿಣಿ ಪೌಡರ್’ ಡೈಲಾಗ್ ಇಟ್ಟುಕೊಂಡು ಎಲ್ಲೆಡೆ ಎಚ್ಡಿಕೆ ಅವರನ್ನ ಟ್ರೋಲ್ ಮಾಡಲಾಗುತ್ತಿದೆ. ಸಾಮಾಜಿಕ ಜಾಲತಾಣ ಮಾತ್ರವಲ್ಲ ಯಕ್ಷಗಾನದಲ್ಲೂ ‘ಮಿಣಿ ಮಿಣಿ ಪೌಡರ್’ ಡೈಲಾಗ್ ಸಖತ್ ಫೇಮಸ್ ಆಗಿದೆ.
ಬಜ್ಪೆ ವಿಮಾನ ನಿಲ್ದಾಣದಲ್ಲಿ ಬಾಂಬ್ ಪತ್ತೆಯಾದ ವಿಚಾರವಾಗಿ ಸುದ್ದಿಗೋಷ್ಠಿ ನಡೆಸಿದ್ದ ಮಾಜಿ ಸಿಎಂ ಎಚ್.ಡಿ ಕುಮಾರಸ್ವಾಮಿ ಅವರು, ಬಾಂಬ್ ಜೊತೆ ಬ್ಯಾಗ್ನಲ್ಲಿ ‘ಮಿಣಿ ಮಿಣಿ ಪೌಡರ್’ ಕೂಡ ಪತ್ತೆಯಾಗಿತ್ತು ಎಂದು ಹೇಳಿದ್ದರು. ಈ ಮಿಣಿ ಮಿಣಿ ಪೌಡರ್ ಡೈಲಾಗ್ ಎಷ್ಟರ ಮಟ್ಟಿಗೆ ಟ್ರೋಲ್ ಆಗುತ್ತಿದೆ ಎಂದರೆ ಯಕ್ಷಗಾನದ ಪ್ರಸಂಗದಲ್ಲಿಯೂ ಈ ಡೈಲಾಗ್ ಬಳಿಸಿ ಟ್ರೋಲ್ ಮಾಡಲಾಗಿದೆ.
ದಕ್ಷಿಣ ಕನ್ನಡ ಜಿಲ್ಲೆಯ ಬಂಟ್ವಾಳ ತಾಲೂಕಿನಲ್ಲಿ ನಡೆದ ಯಕ್ಷಗಾನ ಪ್ರಸಂಗ ಒಂದರಲ್ಲಿ ಹಾಸ್ಯ ಕಲಾವಿದರೋರ್ವರು ಕುಮಾರಸ್ವಾಮಿಯವರ ಹೆಸರು ಉಲ್ಲೇಖಿಸದೆ ‘ಮಿಣಿ ಮಿಣಿ ಪೌಡರ್’ ಬಗ್ಗೆ ಅಣಕಿಸಿದ್ದಾರೆ. ಜ್ಯೋತಿಷಿಯ ವೇಷಧಾರಿಯಾಗಿದ್ದ ಕಲಾವಿದ, ಮಿಣಿ ಮಿಣಿ ಪೌಡರ್ ಹಾಸನ ಮೂಲದ ಜ್ಯೋತಿಷಿ ನಂಗೆ ಕೊಟ್ಟಿದ್ದು, ಆ ಪೌಡರ್ ಅಸಾಮಾನ್ಯ ಶಕ್ತಿಯುಳ್ಳದ್ದು, ತಲೆಯಲ್ಲಿ ಕೂದಲು ಇಲ್ಲದ ದೊಡ್ಡ ಜ್ಯೋತಿಷಿ ಇದನ್ನು ನಂಗೆ ಕೊಟ್ಟಿದ್ದಾಗಿ ಹೇಳುತ್ತಾ ನಗುತ್ತಾನೆ. ಯಕ್ಷಗಾನ ಪ್ರಸಂಗದ ಈ ವಿಡಿಯೋ ಈಗ ಜಾಲತಾಣದಲ್ಲಿ ಸಿಕ್ಕಾಪಟ್ಟೆ ವೈರಲ್ ಆಗುತ್ತಿದೆ.
