ಗೀತಾ ಟ್ರೇಲರ್: ಕನ್ನಡಾಭಿಮಾನಿಯಾಗಿ ಘರ್ಜಿಸಿದ ಗೋಲ್ಡನ್ ಗಣಿ!

ಬೆಂಗಳೂರು: ಗೋಲ್ಡನ್ ಸ್ಟಾರ್ ಗಣೇಶ್ ತಮ್ಮ ಹೋಂ ಬ್ಯಾನರ್‍ನಲ್ಲಿ ನಿರ್ಮಾಣ ಮಾಡಿರೋ ಮೊದಲ ಚಿತ್ರವೆಂಬುದೂ ಸೇರಿದಂತೆ ‘ಗೀತಾ’ ಪ್ರೇಕ್ಷಕರನ್ನು ಸೆಳೆದುಕೊಂಡಿರೋದರ ಹಿಂದೆ ನಾನಾ ಕಾರಣಗಳಿವೆ. ಕೆಲ ದಿನಗಳ ಹಿಂದೆಯಷ್ಟೇ ಇದರ ಲಿರಿಕಲ್ ವೀಡಿಯೋ ಸಾಂಗ್ ಒಂದು ಬಿಡುಗಡೆಯಾಗಿತ್ತು ಅದರೊಂದಿಗೆ ಈ ಸಿನಿಮಾದಲ್ಲಿ ಗೋಲ್ಡನ್ ಸ್ಟಾರ್ ಗಣೇಶ್ ಕನ್ನಡ ಪರ ಹೋರಾಟಗಾರನ ಗೆಟಪ್ಪಿನಲ್ಲಿ ಕಾಣಿಸಿಕೊಂಡಿರೋದೂ ಸ್ಪಷ್ಟವಾಗಿತ್ತು. ಇದೀಗ ಗೀತಾದ ಟ್ರೇಲರ್ ರಿಲೀಸ್ ಆಗಿದೆ. ಇದರಲ್ಲಿ ಕನ್ನಡಪರ ಹೋರಾಟದ ಸ್ವರೂಪ ಮತ್ತಷ್ಟು ಸ್ಪಷ್ಟವಾಗಿಯೇ ಕಾಣಿಸಿಕೊಂಡಿದೆ.

ಈ ಟ್ರೇಲರ್ ಗೀತಾ ಚಿತ್ರದ ಬಗ್ಗೆ ಪ್ರೇಕ್ಷಕರು ಮತ್ತಷ್ಟು ಮೋಹಗೊಳ್ಳುವಂತೆ ಮೂಡಿ ಬಂದಿದೆ. ಗಣೇಶ್ ಚಿತ್ರಗಳೆಂದ ಮೇಲೆ ಅದರಲ್ಲಿ ಪ್ರೀತಿ ಪ್ರೇಮದ ನವಿರು ಭಾವಗಳ ಕಥೆ ಇದ್ದೇ ತರುತ್ತದೆಂಬ ನಂಬಿಕೆ ಪ್ರೇಕ್ಷಕರಲ್ಲಿದೆ. ಅದನ್ನು ಬಯಸೋ ಅಭಿಮಾನಿ ವರ್ಗವೂ ದೊಡ್ಡ ಸಂಖ್ಯೆಯಲ್ಲಿಯೇ ಇದೆ. ಆದರೆ ಗೀತಾ ಚಿತ್ರದಲ್ಲಿ ಪ್ರೇಮ ಕಥಾನಕ ಮತ್ತು ಕನ್ನಡಪರ ಹೋರಾಟದ ಕಥನಗಳು ಬ್ಲೆಂಡ್ ಆಗಿರೋ ಸೂಚನೆಯನ್ನು ಈ ಟ್ರೇಲರ್ ರವಾನಿಸಿದೆ. ಗಣೇಶ್ ಅಂತೂ ಕನ್ನಡಾಭಿಮಾನದ ಡೈಲಾಗುಗಳೊಂದಿಗೆ ಕನ್ನಡ ಪರ ಹೋರಾಟಗಾರನಾಗಿ ಕನ್ನಡಿಗರೆಲ್ಲರೂ ರೋಮಾಂಚನಗೊಳ್ಳುವ ಗೆಟಪ್ಪಿನಲ್ಲಿಯೂ ಗಮನ ಸೆಳೆದಿದ್ದಾರೆ.

ಇದೀಗ ಬಿಡುಗಡೆಯಾಗಿರೋ ಟ್ರೇಲರ್ ತನ್ನ ಸೀಮಿತ ಗಡುವಿನಲ್ಲಿಯೇ ಗೀತಾ ಚಿತ್ರದ ಬಗೆಗಿನ ಹಲವಾರು ಅಂಶಗಳನ್ನು ಅನಾವರಣಗೊಳಿಸಿದೆ. ಪ್ರೇಮ ಕಥೆಯ ವಿಚಾರದಲ್ಲಿಯೂ ಈ ಚಿತ್ರ ಭಿನ್ನವಾದ ಕಥೆಯನ್ನೇ ಹೊಂದಿದೆ ಅನ್ನೋದೂ ಕೂಡಾ ಈ ಟ್ರೇಲರ್ ಮೂಲಕವೇ ಸಾಬೀತಾಗಿದೆ. ಹೇಳಿ ಕೇಳಿ ಈ ಸಿನಿಮಾದಲ್ಲಿ ಮೂವರು ನಾಯಕಿಯರಿದ್ದಾರೆ. ಅವರೆಲ್ಲರನ್ನು ಬಳಸಿಕೊಂಡು ಗಣೇಸ್ ಪಾತ್ರದ ಸುತ್ತ ಸಾಗೋ ತ್ರಿಕೋನ ಪ್ರೇಮ ಕಥೆಯ ಸುಳಿವೂ ಕೂಡಾ ಸಿಕ್ಕಿದೆ. ಒಟ್ಟಾರೆಯಾಗಿ ಇದೇ ತಿಂಗಳ 27ರಂದು ಬಿಡುಗಡೆಗೊಳ್ಳಲಿರೋ ಈ ಸಿನಿಮಾ ಬಗ್ಗೆ ಮತ್ತಷ್ಟು ಪ್ರೇಕ್ಷಕರ ಚಿತ್ತ ಸೆಳೆಯುವಲ್ಲಿ ಈ ಟ್ರೇಲರ್ ಯಶ ಕಂಡಿದೆ.