ಬೆಂಗಳೂರು: ಎಳನೀರಲ್ಲಿ ಮೆಡಿಸಿನ್ ಮಿಕ್ಸ್ ಮಾಡಿ ಸ್ನೇಹಿತೆಯನ್ನು ಅತ್ಯಾಚಾರ ಮಾಡಿರುವ ಘಟನೆ ಸಿಲಿಕಾನ್ ಸಿಟಿಯಲ್ಲಿ ನಡೆದಿದ್ದು, ಆರೋಪಿ ದಿನೇಶ್ ವಿರುದ್ಧ ಸಂತ್ರಸ್ತೆ ಈಗ ದೂರು ದಾಖಲಿಸಿದ್ದಾರೆ.
ಸಂತ್ರಸ್ತೆ ಮತ್ತು ದಿನೇಶ್ ಎರಡೂವರೆ ವರ್ಷಗಳಿಂದ ಸ್ನೇಹಿತರಾಗಿದ್ದರು. ದಿನೇಶ್ ಒಂದು ದಿನ ಮುರುಡೇಶ್ವರಕ್ಕೆ ಟ್ರಿಪ್ಗೆ ಹೋಗೋಣ ಎಂದು ಸಂತ್ರಸ್ತೆಯನ್ನು ಕರೆದೊಯ್ದಿದ್ದು, ಎಳನೀರಿನಲ್ಲಿ ಮತ್ತು ಬರುವ ಔಷಧಿ ಬೆರೆಸಿ ಅತ್ಯಾಚಾರ ಎಸಗಿದ್ದಾನೆ ಎಂದು ಆರೋಪಿಸಲಾಗಿದೆ. ಈಗ ನೊಂದ ಯುವತಿ ಎಚ್ಎಎಲ್ ಪೊಲೀಸ್ ಠಾಣೆಗೆ ದೂರು ನೀಡಿದ್ದಾರೆ.
ದೂರಿನಲ್ಲಿ ಏನಿದೆ?: ದಿನೇಶ್ ಮುರುಡೇಶ್ವರಕ್ಕೆ ಟ್ರಿಪ್ಗೆ ಹೋಗೋಣ ಎಂದು ಕರೆದೊಯ್ದಿದ್ದ. ಆದರೆ ರಾತ್ರಿ ಬಸ್ ಮಿಸ್ ಆಯಿತು. ಇಲ್ಲೇ ಸ್ಟೇ ಮಾಡಬೇಕು ಎಂದು ಹೇಳಿದ್ದು, ಹೋಟೆಲ್ವೊಂದರಲ್ಲಿ ಸ್ಟೇ ಮಾಡಿ ಆಮೇಲೆ ಎಳನೀರಲ್ಲಿ ಮತ್ತು ಬರೋ ಮೆಡಿಸಿನ್ ಮಿಕ್ಸ್ ಮಾಡಿ ನನ್ನ ಮೇಲೆ ಅತ್ಯಾಚಾರ ಮಾಡಿದ್ದಾನೆ. ನಂತರ ಕೋಲ್ಡ್ ಅಂಡ್ ಟೆಂಪ್ಟ್ ಗೆ ಹೀಗಾಗೋಯ್ತು, ಯಾರಿಗೂ ಹೇಳಬೇಡ. ನಮ್ಮಿಬ್ಬರಲ್ಲೇ ಈ ವಿಚಾರ ಇರಬೇಕು. ಸ್ವಲ್ಪ ದಿನದ ನಂತರ ಮದುವೆಯಾಗುತ್ತೇನೆ ಎಂದು ಹೇಳಿ ನಂಬಿಸಿದ್ದ ಎಂದು ದೂರಿನಲ್ಲಿ ತಿಳಿಸಿದ್ದಾರೆ.
ಸ್ವಲ್ಪ ದಿನದ ನಂತರ ದಿನೇಶ್ ಬೇರೆ ಯುವತಿಯೊಂದಿಗೆ ಮದುವೆಯಾಗಲು ಸಿದ್ಧನಾಗಿದ್ದು, ಈ ಬಗ್ಗೆ ಕೇಳಿದ್ದಕ್ಕೆ ನೀನು ಚೆನ್ನಾಗಿಲ್ಲ. ಎಂಗೇಜ್ಮೆಂಟ್ ಆಗಿರುವ ಹುಡುಗಿ ಚೆನ್ನಾಗಿದ್ದಾಳೆ. ನಮ್ಮ ಫ್ಯಾಮಿಲಿಯವರಿಗೆ ಬ್ಲ್ಯಾಕ್ ಕಲರ್ ಅಂದರೆ ಅಸಹ್ಯ. ನನ್ನ ಅಮ್ಮ ಬ್ಲ್ಯಾಕ್ ಕಲರ್ ಅಂದರೆ ಟಚ್ ಕೂಡ ಮಾಡಲ್ಲ ಎಂದು ಹೇಳಿದ. ಕೊನೆಗೆ ನಿನ್ನ ಜೊತೆ ಮಾನಾಡಬೇಕು ಎಂದು ಮಡಿಕೇರಿಗೆ ಕರೆದೊಯ್ದು ಮತ್ತೆ ಅಲ್ಲಿ ಅತ್ಯಾಚಾರ ಮಾಡಿದ. ಬಳಿಕ ಅತ್ಯಾಚಾರ ಮಾಡಿರುವ ವೀಡಿಯೊ ರೆಕಾರ್ಡ್ ಮಾಡಿಟ್ಟಕೊಂಡಿದ್ದೇನೆ. ಸಾಮಾಜಿಕ ಜಾಲತಾಣಗಳಲ್ಲಿ ಹಾಕುತ್ತೇನೆ. ನಿನ್ನ ಅಪ್ಪ ಅಮ್ಮನಿಗೆ ಕಳಿಸುತ್ತೇನೆ. ಅಲ್ಲದೇ ನಿಮ್ಮ ಊರಿನಲ್ಲಿರುವ ಸೈಬರ್ ಸೆಂಟರ್ ಗಳಿಗೆ ಕೊಡುತ್ತೀನಿ ಎಂದು ಹೆದರಿಸುತ್ತಿದ್ದಾನೆ. ಹೀಗಾಗಿ ನ್ಯಾಯ ದೊರಕಿಸಿಕೊಡಬೇಕು ಎಂದು ನೊಂದ ಸಂತ್ರಸ್ತೆ ದೂರಿನಲ್ಲಿ ತಿಳಿಸಿದ್ದಾರೆ.
