ನವದೆಹಲಿ: ಅಧಿಕಾರ ವಹಿಸಿಕೊಂಡ ಮೋದಿ ಅವರಿಗೆ ಆರಂಭದಲ್ಲೇ ಕಹಿ ಸುದ್ದಿ ಸಿಕ್ಕಿದೆ. ದೇಶ ಜಿಡಿಪಿ ಕುಸಿತಗೊಂಡಿದ್ದು, 2017-18 ರಲ್ಲಿ ದೇಶದ ನಿರುದ್ಯೋಗ ಪ್ರಮಾಣ ಶೇ.6.1 ಕ್ಕೆ ತಲುಪಿದೆ ಎಂದು ಕೇಂದ್ರ ಸಾಂಖ್ಯಿಕ ಸಚಿವಾಲಯ ತಿಳಿಸಿದೆ.
1972-73 ರ ಬಳಿಕ ದಾಖಲಾದ ಅತಿ ಹೆಚ್ಚು ನಿರುದ್ಯೋಗ ಪ್ರಮಾಣ ಇದಾಗಿದೆ. 45 ವರ್ಷಗಳಲ್ಲಿಯೇ ಅತಿ ಹೆಚ್ಚು ನಿರುದ್ಯೋಗ ಪ್ರಮಾಣದ ಜೊತೆಗೆ ಜನವರಿ ಮಾರ್ಚ್ ತಿಂಗಳ ಅವಧಿಯಲ್ಲಿನ ಜಿಡಿಪಿ ಬೆಳವಣಿಗೆ ದರ ಶೇ.5.8 ರಷ್ಟು ದಾಖಲಿಸಿದೆ.
ನಗರ ಪ್ರದೇಶದಲ್ಲಿ ನಿರುದ್ಯೋಗ ಪ್ರಮಾಣ ಶೇ.7.8 ರಷ್ಟಿದ್ದರೆ, ಗ್ರಾಮೀಣ ಪ್ರದೇಶದಲ್ಲಿ ಶೇ.5.3 ರಷ್ಟಿದೆ. ಶೇ.6.2 ರಷ್ಟು ಪುರುಷರು, ಶೇ.5.7 ರಷ್ಟು ಮಹಿಳೆಯರು ಉದ್ಯೋಗದಿಂದ ವಂಚಿತರಾಗಿದ್ದರೆ.
ದೇಶದ ಜಿಡಿಪಿ ಬೆಳವಣಿಗೆ ದರವೂ 5 ವರ್ಷಗಳ ಕನಿಷ್ಠ ಮಟ್ಟಕ್ಕೆ ಕುಸಿತವಾಗಿದ್ದು, 2018-19ರ ವರ್ಷದಲ್ಲಿ ಶೇ.5.8 ರಷ್ಟು ದಾಖಲಾಗಿದೆ. ದೇಶದ ಪ್ರಮುಖ ವಲಯಗಳಾದ ಕೃಷಿ, ಕೈಗಾರಿಕೆ ಮತ್ತು ತಯಾರಿಕ ವಲಯದಲ್ಲಿನ ಉತ್ಪಾದನೆ ಕುಸಿತಗೊಂಡಿದ್ದರಿಂದ ಜಿಡಿಪಿ ಕುಸಿತಗೊಂಡಿದೆ ಎಂದು ತಿಳಿಸಿದೆ.
ಕಳೆದ ಅಕ್ಟೋಬರ್-ಡಿಸೆಂಬರ್ ಅವಧಿಯಲ್ಲಿ ಶೇ.6.6 ರಷ್ಟಿದ್ದ ಜಿಡಿಪಿ ದರ ಜನವರಿಯಿಂದ ಮಾರ್ಚ್ ಅವಧಿಯ 4ನೇ ತ್ರೈಮಾಸಿಕದಲ್ಲಿ ಶೇ.5.8ಕ್ಕೆ ಕುಸಿತ ಕಂಡಿದೆ. 2013-14 ರಲ್ಲಿ ಜಿಡಿಪಿ ದರ ಶೇ.6.4 ರಷ್ಟು ದಾಖಲಾಗಿತ್ತು.
ಜಿಡಿಪಿ ದರದ ಕುಸಿತದ ಪರಿಣಾಮವಾಗಿ ವಿಶ್ವದಲ್ಲಿ ವೇಗವಾಗಿ ಬೆಳೆಯುತ್ತಿರುವ ಆರ್ಥಿಕತೆಯ ದೇಶ ಎಂಬ ಪಟ್ಟವನ್ನು ಭಾರತ ಕಳೆದುಕೊಂಡಿದ್ದು, ಚೀನಾ ಶೇ.6.4 ಮೊದಲ ಸ್ಥಾನದಲ್ಲಿದೆ. ಕೇಂದ್ರ ಸರ್ಕಾರ ಈ ಬಾರಿ ಶೇ.6.8 ರಷ್ಟು ಜಿಡಿಪಿ ದಾಖಲಾಗಲಿದೆ ಎಂದು ಅಂದಾಜಿಸಿತ್ತು.
