ಕಂಡ ಕಂಡವರ ಮೇಲೆ ಮಚ್ಚು-ಲಾಂಗ್ ಬೀಸಿದ ಪುಡಿರೌಡಿಗಳು

ಬೆಂಗಳೂರು: ಮಚ್ಚು ಲಾಂಗು ಹಿಡಿದ ಪುಡಿರೌಡಿಗಳ ಗ್ಯಾಂಗ್‍ವೊಂದು ಕಂಡ ಕಂಡವರ ಮೇಲೆ ಹಲ್ಲೆ ನಡೆಸಿ ರಕ್ತ ಹರಿಸಿದೆ. ಮೂರು ದಿನಗಳಿಂದ ಎರಡು ರೌಡಿ ಗ್ಯಾಂಗ್‍ಗಳ ನಡುವೆ ನಡೆಯುತ್ತಿದ್ದ ಗ್ಯಾಂಗ್‍ವಾರ್ ಜನರ ಮೇಲೆ ಹಲ್ಲೆಗೆ ಕಾರಣ ಎನ್ನಲಾಗಿದೆ.

ವಸೀಂ, ಬಿಲಾಲ್, ಮೋಸಿನ್ ಒಂದು ಗ್ಯಾಂಗ್. ತೌಫಿಕ್ ಅಲಿಯಾಸ್ ಚಪ್ಡಿ ಮತ್ತು ಇತರ ಮೂವರು ಮತ್ತೊಂದು ಗ್ಯಾಂಗ್. ಕಳೆದ ಮೂರು ದಿನಗಳಿಂದ ಕೆ ಜಿ ಹಳ್ಳಿ ಪೊಲೀಸ್ ಠಾಣೆ ಲಿಮಿಟ್ಸ್ ಗೋವಿಂದಪುರ ಬಳಿ ರಸ್ತೆಯಲ್ಲೆ ಲಾಂಗು ಮಚ್ಚುಗಳಿಂದ ಜನರ ಮೇಲೆ ಗಲಾಟೆ ಮಾಡಿ ಹಲ್ಲೆ ನಡೆಸಿದ್ದಾರೆ.

ಭಾನುವಾರ ರಾತ್ರಿ 10 ಗಂಟೆ ಸುಮಾರಿಗೆ ಮಚ್ಚುಲಾಂಗ್ ಹಿಡಿದು ರೋಡಿಗಿಳಿದಿದ್ದ ಪುಡಿ ಡಾನ್‍ಗಳು ರಸ್ತೆಯಲ್ಲಿ ಕಂಡ ಕಂಡವರ ಮೇಲೆ ಹಲ್ಲೆ ಮಾಡಿ ಪರಾರಿಯಾಗಿದ್ದಾರೆ. ಮುಜೀಬ್, ಬುರ್ಹಾನ್, ಅಯಾಜ್ ಮತ್ತು ಬಶೀರ್ ಸೇರಿದಂತೆ ಆರು ಜನರಿಗೆ ಗಂಭೀರ ಗಾಯಗಳಾಗಿ ಅಂಬೇಡ್ಕರ್ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾರೆ.