ಹಾಸನದಲ್ಲಿ ಬಿಟ್ಟಿ ಪೆಟ್ರೋಲ್‍ಗೆ ಫುಲ್ ಕ್ಯೂ!

ಹಾಸನ: ಯುಗಾದಿ ಹಬ್ಬದ ವರ್ಷ ತೊಡಕಿಗೆ ಬರೀ ಮಟನ್ ಮಾತ್ರವಲ್ಲ ಜಿಲ್ಲೆಯಲ್ಲಿ ಪೆಟ್ರೋಲ್ ಕೂಡ ಉಚಿತವಾಗಿ ನೀಡಲಾಗಿದೆ.

ಹೌದು. ವರ್ಷತೊಡಕು, ವೀಕೆಂಡ್ ಎಲ್ಲವೂ ಒಂದೇ ದಿನ ಬಂದಿರುವುದರಿಂದ ರಾಜಕೀಯ ಪಕ್ಷಗಳು ಇದನ್ನೇ ಬಂಡವಾಳ ಮಾಡಿಕೊಂಡು ಮತದಾರರಿಗೆ ಆಮಿಷ ಒಡ್ಡಿವೆ. ಯುಗಾದಿ ಹಬ್ಬದ ಹಿನ್ನೆಲೆಯಲ್ಲಿ ಹಾಸನದ ಹೊಳೇನರಸೀಪುರದ ಕಾಡನೂರಿನಲ್ಲಿರುವ ಪೆಟ್ರೋಲ್ ಬಂಕ್‍ನಲ್ಲಿ ಉಚಿತ ಪೆಟ್ರೋಲ್ ನೀಡಲಾಗುತ್ತಿದೆ.

ಈ ಸುದ್ದಿ ತಿಳಿದದ್ದೇ ತಡ ಪೆಟ್ರೋಲ್ ಬಂಕ್‍ನ ಮುಂದೆ ವಾಹನ ಸವಾರರು ತಮ್ಮ ವಾಹನಗಳಿಗೆ ಪೆಟ್ರೋಲ್ ಹಾಕಿಸಿಕೊಳ್ಳಲು ನೂಕುನುಗ್ಗಲು ಉಂಟಾಗಿದೆ. ಉಚಿತ ಪೆಟ್ರೋಲ್‍ಗೆ ಜನರು ಮುಗಿಬಿದ್ದಿರುವುದರಿಂದ ಹಾಸನ – ಮೈಸೂರು ರಸ್ತೆಯಲ್ಲಿರುವ ಪೆಟ್ರೋಲ್ ಬಂಕ್ ಮುಂದೆ ದ್ವಿಚಕ್ರ ವಾಹನಗಳು ಸಾಲುಗಟ್ಟಿ ನಿಂತಿದ್ದವು.

ಮಂಡ್ಯದಲ್ಲೂ ಭರ್ಜರಿ ಬಾಡೂಟ:
ಇತ್ತ ಹಬ್ಬಕ್ಕೆ ಮಾಂಸದಡುಗೆ ಮಾಡಲು ಮಂಡ್ಯದ ಎಲ್ಲ ಮಾಂಸದಂಗಡಿಗಳ ಮುಂದೆ ಜನರು ಕ್ಯೂ ನಿಂತಿದ್ದರು. ಗಂಟೆಗಟ್ಟಲೆ ಸರತಿ ಸಾಲಿನಲ್ಲಿ ನೂರಾರು ಜನ ನಿಂತು ಮಟನ್ ಖರೀದಿಸಿದ್ದಾರೆ. ಸದ್ಯ ಜನರು ಚುನಾವಣೆಯ ಯೋಚನೆ ಬಿಟ್ಟು ಮಾಂಸದಡುಗೆ ತಯಾರಿಸಿ ಮಧ್ಯಾಹ್ನ ಭರ್ಜರಿ ಬಾಡೂಟ ಸವಿದಿದ್ದಾರೆ.